സമീപകാലത്ത് തീയേറ്ററുകളിലെത്തിയ അക്ഷയ് കുമാറിന്റെ ചിത്രങ്ങളെല്ലാം തുടരെ പരാജയങ്ങളാണ് ഏറ്റുവാങ്ങിയത്. അതോടെ മനസ് മാറ്റുകയാണ് അക്ഷയ് കുമാര്‍. ആനന്ദ് എല്‍ റായിയുടെ രക്ഷാബന്ധന്‍ എന്ന ചിത്രത്തിലൂടെ തിരിച്ചുവരവിന് തയ്യാറെടുക്കുകയാണ് താരം.

ഇപ്പോളിതാ, സിനിമയെ കുറിച്ചും തന്റെ സിനിമ തെരഞ്ഞെടുപ്പുകളെ കുറിച്ചും സംസാരിക്കുകയാണ് അക്ഷയ്. മോശമെന്ന് തോന്നുന്ന സിനിമകള്‍ ഇനി ചെയ്യില്ലെന്നും വ്യത്യസ്ത വിഷയങ്ങള്‍ കൈകാര്യം ചെയ്യുന്ന സിനിമകളില്‍ അഭിനയിക്കാനാണ് തന്റെ ശ്രമമെന്നുമാണ് നടന്‍ പറയുന്നത്. രക്ഷാബന്ധന്‍ എന്ന ചിത്രത്തിന്റെ പ്രൊമോഷന്റെ ഭാഗമായി ഒരു മാധ്യമത്തിന് നല്‍കിയ അഭിമുഖത്തിലാണ് താരം ഇക്കാര്യങ്ങള്‍ പറഞ്ഞത്.

' വ്യത്യസ്ത വിഷയങ്ങള്‍ കൈകാര്യം ചെയ്യുന്ന സിനിമകളില്‍ അഭിനയിക്കാനാണ് ഇനി ശ്രമിക്കുക. പ്രേക്ഷകരില്‍ വെറുപ്പുണ്ടാക്കുന്ന തരത്തിലുള്ള സിനിമകള്‍ ഇനി ചെയ്യില്ല. ഫാമിലി എന്റര്‍ടെയ്‌നറുകളായിരിക്കും ചെയ്യുകയെന്ന് ഉറപ്പ് നല്‍കുന്നു. ഏതെങ്കിലും തരത്തിലുള്ള ഇമേജ് സൃഷ്ടിക്കാന്‍ ഉദ്ദേശിക്കുന്നില്ല.

പക്ഷേ ചെയ്യുന്ന ചിത്രങ്ങള്‍ കുടുംബങ്ങളെ തൃപ്തിപ്പെടുത്തുന്നുവെന്ന് ഉറപ്പുവരുത്താറുണ്ട്. സൈക്കോ ത്രില്ലറോ സോഷ്യല്‍ ഡ്രാമയോ ആകട്ടെ. യാതൊരു മടിയുമില്ലാതെ കുടുംബങ്ങള്‍ കയറി കാണണം. കുടുംബങ്ങള്‍ കണ്ട് അവരുടെ മനസ്സ് നിറയ്ക്കുന്ന സിനിമകള്‍ ചെയ്യണമെന്നാണ് കരുതുന്നത്', അക്ഷയ് കുമാര്‍ പറഞ്ഞു