മോഡലിങ് രംഗത്ത് നിന്നും സിനിമയിലേക്കെത്തി പിന്നീട് തെന്നിന്ത്യയാകെ നിറഞ്ഞുനിന്ന അഭിനേത്രിയാണ് പ്രണിത സുഭാഷ്. തെലുങ്ക്, തമിഴ്, കന്നഡ തുടങ്ങി നിരവധി ഭാഷകളില്‍ സജീവമായിരുന്ന പ്രണിത ഹിന്ദിയില്‍ ഹംഗാമ എന്ന ചിത്രത്തിലൂടെ ബോളിവുഡിലേക്കും ചേക്കേറി. വിവാഹത്തോടെയാണ് താരം അഭിനയരംഗത്ത് നിന്നും ഒരിടവേളയെടുത്തത്. 2021 മെയ് 30 ന് ആയിരുന്നു ബിസിനസുകാരനായ നിതിന്‍ രാജുവും പ്രണിത സുഭാഷും തമ്മിലുള്ള വിവാഹം.

അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തില്‍ വളരെ സ്വകാര്യമായിട്ടായിരുന്നു വിവാഹചടങ്ങുകള്‍. വിവാഹത്തിനു ശേഷമാണ് ഇക്കാര്യം നടി തന്റെ സോഷ്യല്‍ മീഡിയ പേജിലൂടെ ആരാധകരെ അറിയിച്ചത്. ഈ വർഷം ജൂണിൽ ദമ്പതികൾക്ക് ഒരു പെൺകുഞ്ഞ് ജനിച്ചിരുന്നു. സോഷ്യൽ മീഡിയയിൽ  താരം ഭർത്താവിന്റെ കാൽകീഴിൽ ഇരുന്ന് അദ്ദേഹത്തെ ശുശ്രൂഷിക്കുന്ന ചിത്രം സോഷ്യൽ മീഡിയയിൽ പങ്കുവച്ചിരുന്നു. ഇതിനെ തുടർന്ന് താരത്തിന് രൂക്ഷ വിമർശനങ്ങളാണ് ഉയരുന്നത്.

ഭീമന അമാവാസ്യ എന്ന ചടങ്ങിനായി ഭർത്താവ് നിതിൻ രാജുവിന്റെ മുന്നിലിരിക്കുകയാണ് താരം. ഭർത്താവിന്റെ കാൽപാദങ്ങൾ പ്ലേറ്റിൽ വച്ച് പൂജിക്കുകയാണ് പ്രണിത. ചടങ്ങിന്റെ പേര് കുറിച്ചാണ് പ്രണിത ചിത്രം പങ്കുവച്ചത്. നിമിഷങ്ങൾക്കകം തന്നെ ട്വിറ്ററിൽ ചിത്രം വൈറലായി. ഏത് പെൺകുട്ടിയെ വിവാഹം ചെയ്താലാണ് നിങ്ങൾക്കു വേണ്ടി ഇക്കാര്യം ചെയ്യുക’.എന്ന കുറിപ്പോടെയാണ് ഒരാൾ ചിത്രം പങ്കുവച്ചത്.

‘ഇക്കാര്യം ആവശ്യപ്പെടാത്ത ഒരു പുരുഷനെ പെൺകുട്ടികൾ വിവാഹം കഴിക്കണം എന്ന് മറ്റൊരാളും കുറിച്ചു. ഇതോടെ സംഭവം വിവാദമായി. ഇത്തരം കാര്യങ്ങൾ ആവശ്യപ്പെടുന്നവരെ വിവാഹം ചെയ്യുന്നതിലും നല്ലത് ജീവിതകാലം മുഴുവന്‍ ഒറ്റയ്ക്ക് നിൽക്കുകയാണ്.’എന്നായിരുന്നു മറ്റൊരാളുടെ കമന്റ്. വെറുതെ ചോദിക്കുന്നു.. നിങ്ങൾ എന്തിനാണ് നിങ്ങളുടെ ഭർത്താവിന്റെ കാൽക്കൽ ഇരിക്കേണ്ടത്... നിങ്ങൾ രണ്ടുപേരും തുല്യരാണ്... ഈ പുരുഷാധിപത്യം നിർത്തുക...എന്നായിരുന്നു വേറൊരാളുടെ കമന്റ്.

ഇതിന് മറുപടിയെന്നോണം താരം തന്നെ ഒടുവിൽ രംഗത്ത് എത്തി. ''ശരി, ജീവിതത്തിലെ എല്ലാത്തിനും രണ്ട് വശങ്ങളുണ്ട്. എന്നാൽ ഇക്കാര്യത്തിൽ 90 ശതമാനം ആളുകൾക്കും നല്ലത് മാത്രമാണ് പറയാനുള്ളത്. ബാക്കിയുള്ളവ, ഞാൻ അവഗണിക്കുന്നു. ഞാൻ ഒരു അഭിനേത്രി ആയതുകൊണ്ടും ഫീൽഡ് അതിന്റെ ഗ്ലാമറിന് പേരുകേട്ടതുകൊണ്ടും, ഞാൻ കണ്ടു വളർന്നതും പൂർണ്ണമായും വിശ്വസിക്കുന്നതുമായ ഒരു ആചാരം പിന്തുടരാൻ എനിക്ക് കഴിയില്ലെന്ന് അർത്ഥമാക്കുന്നില്ല. എന്റെ എല്ലാ ബന്ധുക്കളും അയൽക്കാരും സുഹൃത്തുക്കളും ഈ പൂജ ചെയ്തിട്ടുണ്ട്. ഞാൻ വിവാഹിതയായപ്പോൾ കഴിഞ്ഞ വർഷവും ഈ പൂജ നടത്തിയിരുന്നു, എന്നാൽ ചിത്രം പങ്കുവെച്ചിരുന്നില്ലെന്നും താരം പറയുന്നു.

“വാസ്തവത്തിൽ, ഇത് എനിക്ക് പുതിയ കാര്യമല്ല. ഞാൻ എപ്പോഴും ഹൃദയത്തിൽ ഒരു പരമ്പരാഗത പെൺകുട്ടിയാണ്, മൂല്യങ്ങൾ, ആചാരങ്ങൾ, കുടുംബം എന്നിവയുമായി ബന്ധപ്പെട്ട എന്തിനേയും സ്നേഹിക്കുന്നു. വീട്ടിലിരിക്കുക എന്നത് എനിക്ക് എന്നും ഇഷ്ടമാണ്, കൂട്ടു കുടുംബത്തിലാണ് ജീവിക്കുന്നത്. എന്റെ മാതാപിതാക്കളെ കൂടാതെ, അമ്മായിമാർ, മുത്തശ്ശിമാർ, അമ്മാവൻമാർ എന്നിവരാൽ ചുറ്റപ്പെട്ട ഞാനും വളർന്നു, ഞാൻ അത് ഇഷ്ടപ്പെടുന്നു. സനാതന ധർമ്മം വളരെ മനോഹരവും എല്ലാവരേയും ഉൾക്കൊള്ളുന്നതുമായ ഒരു ആശയമാണ്, അതിൽ ഞാൻ ഉറച്ചു വിശ്വസിക്കുന്നു. ഒരാൾക്ക് മുന്നോട്ട് ചിന്തിക്കാനും ആധുനികനാകാനും കഴിയും, എന്നാൽ അതിനർത്ഥം ഒരാൾ തന്റെ വേരുകൾ മറക്കുന്നു എന്നല്ല, ”പ്രണിത സുഭാഷ് പറഞ്ഞു.