ശകുനിയിൽ കാർത്തിയുടെ നായികയായി വന്ന് പ്രേക്ഷക ശ്രദ്ധ നേടിയ താരമാണ് പ്രണിത സുഭാഷ്. കന്നട, തെലുങ്ക്, തമിഴ് സിനിമകളിലാണ് താരം കൂടുതൽ ശോഭിക്കുന്നത്. ബാംഗ്ലൂരിൽ വളർന്ന പ്രണിത സിനിമകളിലേക്ക് കടക്കുന്നതിന് മുമ്പ് മോഡലിംഗ് രംഗത്തായിരുന്നു ശ്രദ്ധിക്കപ്പെട്ടിരുന്നുത്. ജ്വല്ലറി പരസ്യങ്ങളിൽ സ്ഥിരമായി കാണുന്ന മുഖവും പ്രണിതയുടേതായിരുന്നു. 2010ൽ പോർക്കി എന്ന കന്നട ചിത്രത്തിൽ അഭിനയിച്ചുകൊണ്ടായിരുന്നു സിനിമയിലേക്കുള്ള അരങ്ങേറ്റം. 2021ലാണ് താരം വിവാഹിതയായത്. വ്യവസായിയായ നിതിന്‍ രാജുവിനെയാണ് താരം വിവാഹം ചെയ്തത്. ബെംഗളൂരുവില്‍ ലളിതമായ വിവാഹ ചടങ്ങാണ് നടന്നത്. വിവാഹ ശേഷം നടി തന്നെയാണ് തന്റെ ഇന്‍സ്‌റാഗ്രാമിലൂടെ വിവാഹ വാര്‍ത്ത പുറത്തുവിട്ടത്. ഇപ്പോഴിതാ സോഷ്യൽ മീഡിയയിൽ ശ്രദ്ധനേടുന്നത് നടി പ്രണിത പങ്കുവച്ച ചിത്രങ്ങളാണ്. ഭർത്താവിന്റെ കാൽപാദങ്ങൾ പ്ലേറ്റിൽ വച്ച്‌ പൂജിക്കുന്ന നടിയുടെ ചിത്രങ്ങൾ സമൂഹമാധ്യമങ്ങളിൽ വൈറലാകുകയാണ്. ഭീമന അമാവാസ്യ എന്ന ചടങ്ങിലെ ചിത്രമാണിത്. കർണാടക, ആന്ധപ്രദേശ്, തമിഴ്നാട് തുടങ്ങിയ സംസ്ഥാനങ്ങളിൽ പ്രചാരത്തിലിരിക്കുന്ന ഒരു ആചാരമാണിത്. എന്നാൽ, താരത്തിന്റെ ഈ ചിത്രങ്ങൾക്ക് നേരെ വിമർശനം ഉയരുകയാണ്. സ്ത്രീപുരുഷ സമത്വത്തിൽ വിശ്വസിക്കുന്ന ആധുനിക സമൂഹത്തെ അതിനെ പിറകോട്ട് വലിക്കുന്ന തരത്തിലുള്ളതാണ് ഇത്തരം ചിത്രങ്ങളെന്നു വിമർശകർ പറയുന്നു. പ്രണിത അവരുടെ ഭർത്താവിനെ സ്നേഹിക്കുന്നതിനാലാണ് ഈ ചിത്രം പങ്കുവച്ചതെന്നും ഇത് വിധേയത്വമാണെന്ന് വ്യാഖ്യാനിക്കുന്നത് ശരിയല്ലെന്നുമുള്ള അഭിപ്രായവും ചിലർ പങ്കുവയ്ക്കുന്നുണ്ട്.