മലയാളി പ്രേക്ഷകരുടെ പ്രിയപ്പെട്ട റിയാലിറ്റി ഷോയായി മാറിയിരിക്കുകയാണ് ഇന്ന് ബിഗ് ബോസ്. മലയാളത്തില്‍ നാലാം സീസണില്‍ എത്തി നില്‍ക്കുകയാണ് ബിഗ് ബോസ്. ഈ അടുത്തിടെ അവസാനിച്ച നാലാം സീസണില്‍ മത്സരാര്‍ത്ഥികളില്‍ മിക്കവരും പ്രേക്ഷകര്‍ക്ക് പുതുമുഖങ്ങളായിരുന്നു. ദില്‍ഷ പ്രസന്നനാണ് നാലം സീസണില്‍ ബിഗ് ബോസിന്റെ ട്രോഫിയും അമ്പത് ലക്ഷം രൂപയും സ്വന്തമാക്കി ഒന്നാംസ്ഥാനം നേടിയത്. ബ്ലെസ്ലിയാണ് രണ്ടാം സ്ഥാനത്ത്. മൂന്നാം സ്ഥാനം റിയാസ് സലീമിനായിരുന്നു. ബിഗ് ബോസ് സീസൺ നാലിന്റെ യഥാർത്ഥ വിജയി എന്ന് ഒരുകൂട്ടം പ്രേക്ഷകരും ഷോയിൽ നിന്ന് എവിക്ട് ആയി പോയ മത്സരാര്ഥികളും വിധി എഴുതിയ മത്സരാർത്ഥിയായായിരുന്നു റിയാസ്. ബിഗ് ബോസ് സീസൺ നാലിന്റെ 42-ാം ദിവസമാണ് വൈൽഡ് കാർഡ് എൻട്രിയായി റിയാസ് വീടിനുള്ളിൽ എത്തിയത്. റിയാസിന്റെ വരവോടെ ഷോ അതുവരെ പോയിരുന്ന ട്രാക്കിൽ നിന്ന് മറ്റൊരു തലത്തിലേക്ക് എത്തുകയായിരുന്നു. ഷോയിലെത്തിയ ആദ്യ ആഴ്ചകളിൽ റിയാസിനെ മാറ്റി നിർത്തിയവർ തന്നെ അവസാനം ചേർത്ത് പിടിക്കുന്നതാണ് കണ്ടത്. ബിഗ് ബോസ് വീടിനുള്ളിൽ റിയാസിനെ ചേർത്ത് നിർത്തിയ മത്സരാർത്ഥികളായിരുന്നു നിമിഷ, ജാസ്മിൻ, റോൺസൺ എന്നിവർ.

കഴിഞ്ഞ ദിവസം ഈ നാൽവർ സംഘം വയനാട്ടിൽ ഒത്തുകൂടിയിരുന്നു. റോൺസണിന്റെ ബർത്ത്ഡേ ആഘോഷമാക്കിയ ഇവരുടെ ചിത്രങ്ങളും വീഡിയോയും ഒക്കെ വൈറലായിരുന്നു. ഇപ്പോൾ ജാസ്മിനൊപ്പം ബാംഗ്ലൂരിലാണ് നിമിഷയും റിയാസും. അതിനിടെ ഇൻസ്റ്റാഗ്രാമിൽ ഒരു ആരാധകൻ റിയാസിനോട് ചോദിച്ച ചോദ്യവും അതിന് റിയാസ് നൽകിയ ഉത്തരവുമാണ് ശ്രദ്ധനേടുന്നത്. നിമിഷയുടെ ഇൻസ്റ്റാഗ്രാം പേജിലൂടെ ആരാധകർക്ക് ചോദ്യം ചോദിക്കാൻ നൽകിയ അവസരത്തിലാണ് രസകരമായ ചോദ്യം. നിമിഷ, ജാസ്‌മിൻ എന്നിവരിൽ ഒരാളോടൊപ്പം ജീവിക്കാൻ അവസരം കിട്ടിയാൽ ആരെ തിരഞ്ഞെടുക്കും എന്നായിരുന്നു റിയാസിനോടുള്ള ചോദ്യം. അതിന് ആരെയും തിരഞ്ഞെടുക്കില്ല എന്ന മറുപടിയാണ് റിയാസ് നൽകിയത്. മറ്റു നിരവധി ചോദ്യങ്ങളും ആരാധകർ ചോദിക്കുന്നുണ്ട്. റോൺസൺ, നിമിഷ, ജാസ്മിൻ ഇവരിൽ ആരോടാകും രഹസ്യങ്ങൾ പങ്കുവെക്കുക എന്നൊരാളുടെ ചോദ്യത്തിന് ആരോടും ഇല്ല. മൂന്ന് പേരെയും ഞാൻ വിശ്വസിക്കുന്നില്ല എന്നാണ് റിയാസ് മറുപടി നൽകിയത്. ടി ഷർട്ടിൽ ബിഗ് ബോസിലെ ഒരു ഡയലോഗ് അടിക്കുകയാണെങ്കിൽ അത് എന്തായിരിക്കും എന്ന ചോദ്യത്തിന് 'സ്റ്റേ എവേ' എന്ന തന്റെ ഡയലോഗാണ് റിയാസ് പറഞ്ഞത്. റിയാസിന്റെ മനോഹരമായ പിരികത്തിന്റെ രഹസ്യം എന്താണെന്ന് ചോദിച്ചപ്പോൾ അത് അവൻ അതിൽ രണ്ടു മണിക്കൂർ പണിയെടുക്കുന്നത് കൊണ്ടാണെന്നാണ് നിമിഷ പറഞ്ഞത്. നിമിഷയോടും ആരാധകരുടെ ചോദ്യമുണ്ടായി. എല്ലാവരും ആയുള്ള പ്രശ്‌നങ്ങൾ തീർത്തില്ലേ. ബ്ലെസ്‌ലിയുമായുള്ള പ്രശ്‌നങ്ങൾ തീർത്തു കൂടെ എന്നായിരുന്നു ഒരാളുടെ ചോദ്യം. അതിന് എന്ത് മനോഹരമായ നടക്കാത്ത സ്വപ്‍നം എന്നായിരുന്നു നിമിഷയുടെ മറുപടി.