ഓണ്‍ലൈന്‍ അവതാരകയെ അപമാനിച്ചെന്ന പരാതിയില്‍ നടന്‍ ശ്രീനാഥ് ഭാസിയെ മരട് പോലീസ് അറസ്റ്റ് ചെയ്തശേഷം ജാമ്യത്തില്‍വിട്ടയച്ചിരുന്നു. സിനിമയുടെ പ്രമോഷനുമായി ബന്ധപ്പെട്ട് നടത്തിയ അഭിമുഖത്തിനിടെ ഭീഷണിപ്പെടുത്തിയെന്നും അധിക്ഷേപിച്ചെന്നുമാണ് അവതാരകയുടെ പരാതി. തിങ്കളാഴ്ച രാവിലെ 10-ന് സ്റ്റേഷനില്‍ ഹാജരാകാനാണ് ശ്രീനാഥ് ഭാസിയോട് മരട് പോലീസ് നിര്‍ദേശിച്ചത്. കുറച്ചുകൂടി സമയം അനുവദിക്കണമെന്ന് ശ്രീനാഥ് ഭാസി ആവശ്യപ്പെട്ടെങ്കിലും പോലീസ് അനുവദിച്ചില്ല. ഇതോടെ ഒരുമണിയോടെ നടന്‍ സുഹൃത്തുക്കള്‍ക്കൊപ്പം ഹാജരാവുകയായിരുന്നു. ചോദ്യംചെയ്തശേഷം അഞ്ചുമണിയോടെ അറസ്റ്റ് രേഖപ്പെടുത്തി. സ്റ്റേഷന്‍ ജാമ്യം ലഭിക്കുന്ന വകുപ്പുപ്രകാരമാണ് കേസെടുത്തത്. വൈകീട്ടോടെയാണ് നടനെ ജാമ്യത്തില്‍വിട്ടത്. വനിതാകമ്മിഷനും പ്രൊഡ്യൂസേഴ്‌സ് അസോസിയേഷനും മാധ്യമപ്രവര്‍ത്തക പരാതി നല്‍കിയിട്ടുണ്ട്. അതേസമയം, ശ്രീനാഥ് ഭാസിക്കെതിരേയുള്ള കേസുമായി മുന്നോട്ടുപോകുമെന്നും തെളിവുകളെല്ലാം കൈയിലുണ്ടെന്നും പരാതിക്കാരി പറഞ്ഞു. ന്യായവും സത്യവും തന്റെ ഭാഗത്താണെന്ന ധൈര്യത്തിന്റെ പുറത്താണ് കേസുമായി മുന്നോട്ടുപോകാന്‍ തീരുമാനിച്ചത്. ഇതുപോലെ നാളെ മറ്റൊരു ശ്രീനാഥ് ഭാസി ഉണ്ടാകരുത്. ആരോടും എന്തും പറയാമെന്നുള്ള അവസ്ഥയുണ്ടാകരുതെന്നും പ്രതികരിച്ചാല്‍ മാത്രമേ ഇതിനെല്ലാം ഒരുമാറ്റം ഉണ്ടാവുകയുള്ളുവെന്നും പരാതിക്കാരി പറഞ്ഞു.

കൂടാതെ തന്റെ ചാനലിനേയും തന്നെയും അറിയില്ല എന്ന് ശ്രീനാഥ് ഭാസി പറഞ്ഞത് കള്ളമെന്ന് പരാതിക്കാരി പറഞ്ഞു. ശ്രീനാഥ് എത്തിയപ്പോൾ തന്നെ തന്റെ അഭിമുഖങ്ങൾ കാണാറുണ്ടെന്നും നിങ്ങൾ ധ്യാൻ ശ്രീനിവാസനെ രക്ഷപ്പെടുത്തുന്ന ചാനലല്ലേ എന്ന് ചോദിച്ചു എന്നും പരാതിക്കാരിയായ അവതാരക പറഞ്ഞു. തന്റെ അഭിമുഖങ്ങൾ കാണാത്ത, തന്നെ അറിയാത്ത ഒരാൾ എങ്ങനെയാണ് ഇക്കാര്യങ്ങൾ ചോദിക്കുന്നതെന്നും പരാതിക്കാരി ഉന്നയിക്കുന്നു. ‘ശ്രീനാഥ് ഭാസിയുടെ അഭിമുഖം 1.30നാണ് നിശ്ചയിച്ചിരുന്നത്. സിനിമയുടെ പിആര്‍ഒ പറഞ്ഞത് അനുസരിച്ച് 12.30ന് എത്തി എല്ലാം സെറ്റ് ചെയ്ത് കാത്തിരുന്നു. ശ്രാനാഥ് ഭാസി അവിടെ വന്നത് 3.30നാണ്. അത്രയും നേരം അവിടെ ഇരുന്നപ്പോഴേക്ക് ഉറങ്ങി പോയി. അദ്ദേഹം വന്ന് എന്തുചെയ്യുകയായിരുന്നു എന്ന് ചോദിച്ചപ്പോള്‍, നോക്കിയിരുന്ന് ഉറങ്ങിപ്പോയി എന്ന് കൂടെയുള്ള അവതാരക പറഞ്ഞു. ശ്രീനാഥ് ഭാസി വന്നപ്പോള്‍ തന്നെ എന്റെ അഭിമുഖങ്ങള്‍ കാണാറുണ്ട് എന്ന് പറഞ്ഞു. ‘നിങ്ങള്‍ ആ ധ്യാന്‍ ശ്രീനിവാസനെ രക്ഷപ്പെടുത്തുന്ന ചാനല്‍ അല്ലേ’ എന്ന് അദ്ദേഹം ചോദിച്ചു. അപ്പോള്‍ ഞാന്‍ പറഞ്ഞത് ‘ധ്യാന്‍ ശ്രീനിവാസനെ രക്ഷപ്പെടുത്തുന്ന ചനല്‍ അല്ല, ധ്യാന്‍ ഞങ്ങളെയാണ് രക്ഷപ്പെടുത്തുന്നത്’ എന്നാണ്. അപ്പോള്‍ ‘മച്ചാന്‍ പൊളിയാണ്, ചില്‍ ആണ്’ എന്നൊക്കെ എന്നോട് പറഞ്ഞു. എന്റെ അഭിമുഖങ്ങള്‍ കാണാത്തൊരാള്‍ എങ്ങനെ ഇത് പറയുമെന്നും അവതാരക ചോദിക്കുകയാണ്.