പൊതുസ്ഥലത്ത് അപമാനിച്ചുവെന്ന അവതാരകയുടെ പരാതിയിൽ അറസ്റ്റിലായ നടൻ ശ്രീനാഥ് ഭാസിക്ക് ജാമ്യം ലഭിച്ചിരുന്നു. വിഷയത്തില്‍ ഖേദം പ്രകടിപ്പിക്കുന്നതായി ശ്രീനാഥ് ഭാസി അറിയിച്ചിരുന്നു. തന്റെ ഭാഗത്ത് നിന്നുണ്ടായ തെറ്റിന് ആരോട് വേണമെങ്കിലും താന്‍ ക്ഷമാപണം നടത്താന്‍ തയ്യാറാണെന്നും ആരേയും മാനസികമായി തളര്‍ത്തുന്ന രീതിയില്‍ ഒന്നും പറഞ്ഞിട്ടില്ല എന്നുമാണ് ശ്രീനാഥ് ഭാസി പ്രതികരിച്ചിരുന്നത്. അതേസമയം ശ്രീനാഥ് ഭാസിക്കെതിരെ ഔദ്യോ​ഗികമായി പരാതി ലഭിച്ചതിന്റെ അടിസ്ഥാനത്തിൽ ഇന്ന് ഫിലിം ചേംബർ യോ​ഗം ചേരുമെന്ന് ഫിലിം ചേംബർ സെക്രട്ടറി അനിൽ തോമസ് അറിയിച്ചു. ചട്ടമ്പി സിനിമയുടെ അണിയറ പ്രവർത്തകർ, പരാതിക്കാരി, ശ്രീനാഥ് ഭാസി എന്നിവരോട് യോഗത്തിൽ വിശദീകരണം തേടും. 'ഫിലിം ചേംബറിന്റെ പ്രൊഡ്യൂസേഴ്സ് അസോസിയേഷനിൽ ആണ് ഓൺലൈൻ മാധ്യമ പ്രവർത്തക പരാതി നൽകിയത്. അതിനേക്കുറിച്ച് ഒരു ചർച്ച നടക്കുകയും ചെയ്തിട്ടുണ്ട്. അതിന്റെ തുടർ നടപടി എന്ന നിലയിൽ ബന്ധപ്പെട്ട എല്ലാവരേയും അവരവരുടെ ഭാഗം കേൾക്കുന്നതിനായി വിളിച്ചിട്ടൂണ്ട്. '

ചട്ടമ്പി' എന്ന സിനിമയുടെ പ്രമോഷനുമായി ബന്ധപ്പെട്ട് ആയതുകൊണ്ട് നിർമ്മാതാക്കളുടെ സംഘടനയ്ക്ക് ഒരു പരാതി ലഭിച്ചപ്പോൾ എന്താണ് അതിന് എടുക്കേണ്ട നടപടികൾ എന്നതിനേക്കുറിച്ച് ആലോചിക്കേണ്ടതുണ്ട്. എല്ലാവരുടേയും ഭാഗം കേൾക്കാൻ ഫിലിം ചേംബർ തീരുമാനം എടുത്തിട്ടുണ്ട്. അദ്ദേഹത്തിനെതിരെ പരാതികൾ ആയി ഇതുവരെ വന്നിട്ടില്ല. ഷൂട്ടിങ്ങുമായി ബന്ധപ്പെട്ട് ചില ബുദ്ധിമുട്ടുകൾ വന്നിട്ടുണ്ട്. ഔദ്യോഗികമായി ഒന്നും ലഭിച്ചിരുന്നില്ല. ഇപ്പോഴാണ് അതുണ്ടാകുന്നത്. പരാതി ലഭിച്ചപ്പോൾ തുടർ നടപടികൾ സ്വീകരിക്കേണ്ടതുണ്ടെന്ന് ബോധ്യപ്പെട്ടതിനാൽ ശ്രീനാഥ് ഭാസിക്കും, ചിത്രത്തിൻ്റെ നിർമ്മാതാവിനും പിആർഒയ്ക്കും അറിയിപ്പ് കൊടുത്തിട്ടുണ്ട്. ഇന്ന് ഉച്ചയ്ക്ക് ശേഷം യോഗം ചേരാനാണ് തീരുമാനമെന്നും അറിയിച്ചിരിക്കുകയാണ്.