മലയാളത്തിന് പുറമെ മറുഭാഷകളിലും പ്രശസ്തിയാർജിച്ച നടിയാണ് ഭാവന. തമിഴിലും തെലുങ്കിലും കന്നഡയിലും അഭിനയിച്ച ഭാവന കന്നഡയിലാണ് കൂടുതൽ ശ്രദ്ധിക്കപ്പെട്ടത്. മലയാളത്തിൽ നിന്ന് നീണ്ട ഇടവേളയെടുത്ത ഭാവന കന്നഡയിൽ നിരവധി സിനിമകളിൽ അഭിനയിച്ചിട്ടുണ്ട്. നടിയുടെ ഭർത്താവ് നവീനും കന്നഡ സിനിമകളുടെ നിർമാതാവാണ്. നീണ്ട വർഷങ്ങൾക്ക് ശേഷം മലയാള സിനിമയിൽ സജീവമാകാൻ ഒരുങ്ങുകയാണ് ഭാവന. ഇതിനിടെ കഴിഞ്ഞ ദിവസം തനിക്കെതിരെ സോഷ്യല്‍ മീഡിയയില്‍ അരങ്ങേറുന്ന സൈബര്‍ ആക്രമണങ്ങള്‍ക്കും സദാചാര ആക്രമണങ്ങള്‍ക്കുമെതിരെ ഭാവന രംഗത്തെത്തിയിരുന്നു. വസ്ത്രത്തിന്റെ പേരുള്ള സൈബര്‍ ആക്രമണത്തിനെതിരെയായിരുന്നു ഭാവന രംഗത്തെത്തിയത്. ഇപ്പോഴിതാ സംഭവത്തില്‍ കൂടുതല്‍ പ്രതികരണവുമായി എത്തിയിരിക്കുകയാണ് ഭാവന. സോഷ്യല്‍ മീഡിയയില്‍ ഒരുപാട് നല്ല കാര്യങ്ങളുണ്ട്. പക്ഷെ മൊബൈലിന്റേയും കമ്പ്യൂട്ടറിന്റേയും മറവിലിരുന്ന് മറ്റുള്ളവരെക്കുറഇച്ച് മോശമായി കമന്റിടുകയും സൈബര്‍ അറ്റാക്ക് ചെയ്യുകയും ചെയ്യുന്ന ഒരുപാട് പേരുണ്ടെന്നും അത് വളരെ മോശമായ കാര്യമാണെന്നും ഭാവന പറയുന്നു. സൈബര്‍ ബുള്ളിയിംഗ് നടത്തുന്നവര്‍ക്കെതിരെ കേസ് കൊടുത്താല്‍ പോലും ഐഡി ട്രാക്ക് ചെയ്ത് വരുമ്പോഴേക്കും അത് ഡീലീറ്റായിപ്പോയിരിക്കുമെന്നാണ് ഭാവന പറയുന്നത്. ഒരു കാലത്തും സംശയം തോന്നാത്ത ഒറിജിനല്‍ ഐഡിയുള്ളവര്‍ പോലും ഫേക്ക് ഐഡികളുണ്ടാക്കി മറ്റുള്ളവരെ മോശമായി ചിത്രീകരിക്കാന്‍ ഇറങ്ങാറുണ്ടെന്നാണ് ഭാവന തുറന്നു പറയുന്നത്. സൈബര്‍ ബുള്ളിയിംഗ് എന്നത് ഒരു ജോലി പോലെയാണെന്നാണ് താന്‍ മനസിലാക്കുന്നതെന്നാണ് ഭാവന പറയുന്നത്. ഒരു കൂട്ടം ആളുകളെ ജോലിക്ക് വെച്ച് ചില വ്യക്തികളെയോ പ്രൊജക്ടുകളേയോ സ്ഥാപനങ്ങളെയോ ആക്രമിക്കുന്ന രീതി ഇവിടെയുണ്ടെന്നാണ് താന്‍ മനസിലാക്കുന്നതെന്നും ഭാവന പറയുന്നു. എന്നാല്‍ ഇതേക്കുറിച്ച് കൂടുതല്‍ വിവരമൊന്നും തനിക്കറിയില്ലെന്നും സിനിമാ മേഖലയിലും സോഷ്യല്‍ മീഡിയയിലും ജോലി ചെയ്യുന്നവര്‍ക്ക് അറിയാമെന്നാണ് ഭാവന പറയുന്നത്. അതേസമയം സിനിമയിലുള്ളവര്‍ ഇത് സമ്മതിക്കാനോ തുറന്ന് സംസാരിക്കാനോ തയ്യാറാവില്ലായിരിക്കുമെന്നും ഭാവന പറയുന്നു. എന്നാല്‍ തന്റെ അറിവില്‍ സൈബര്‍ ബുള്ളിയിംഗിന് വേണ്ടി ക്വട്ടേഷന്‍ കൊടുക്കുന്ന പരിപാടിയുണ്ടെന്നും അതിന് പ്രതിഫലം ലഭിക്കുകയും ചെയ്യുന്നുണ്ടെന്നും ഭാവന അടിവരയിട്ട് പറയുന്നുണ്ട്.