മലയാള സിനിമയിലെ ഒഴിച്ചുകൂടാനാകാത്ത ഒരു നടനാണ് ഇന്നസെന്റ്. മലയാള സിനിമയിലെ തന്നെ മിക്ക താരങ്ങളോടൊപ്പം താരം അഭിനയിച്ചിട്ടുണ്ട്. അതുപോലെ തന്നെ എല്ലാ താരങ്ങളുമായി അദ്ദേഹം അടുത്ത ബന്ധം സൂക്ഷിക്കുന്നുമുണ്ട്. ഒരവസരത്തില്‍ നാഷണല്‍ അവാര്‍ഡ് പ്രഖ്യാപനത്തിന്റെ സമയത്ത് തന്റെ ഏറ്റവും അടുത്ത് സുഹൃത്തായ മമ്മൂട്ടിയ്ക്ക് നാഷണല്‍ അവാര്‍ഡ് കിട്ടരുതെന്ന് ഒരു നിമിഷം ആലോചിച്ചു പോയിരുന്നുവെന്ന് തുറന്നുപറഞ്ഞിരിക്കുകയാണ് ഇന്നസെന്റ്.

അവാര്‍ഡ് പ്രഖ്യാപനത്തിന്റെ സമയത്ത് അമിതാഭ് ബച്ചന്‍, മമ്മൂട്ടി, ഇന്നസെന്റ് എന്ന പേരുകള്‍ കണ്ടപ്പോഴാണ് അമിതാഭ് ബച്ചന് അവാര്‍ഡ് കിട്ടിയാലും മമ്മൂട്ടിയ്ക്ക് കിട്ടരുതെന്ന് ആഗ്രഹിച്ചതെന്ന് ഒരു അഭിമുഖത്തിലാണ് ഇന്നസെന്റ് ഇക്കാര്യം തുറന്നുപറഞ്ഞത്.

നാഷണല്‍ അവാര്‍ഡിന്റെ ദിവസം ടിവിയില്‍ നോക്കിയപ്പോള്‍ മൂന്ന് പേരാണ് നാഷണല്‍ അവാര്‍ഡിന്റെ അവസാന ഘട്ടത്തിലേയ്ക്ക് ഘട്ടത്തിലേയ്ക്ക് എത്തിയതെന്ന് ഇന്നസെന്റ് പറഞ്ഞു. അമിതാഭ് ബച്ചന്‍, മമ്മൂട്ടി, ഇന്നസെന്റ് എന്നിങ്ങനെ മൂന്ന് പേരുകള്‍ ടിവിയില്‍ എഴുതിക്കാണിക്കുന്നുണ്ടായിരുന്നു. ഇക്കാര്യം ഭാര്യ ആലീസിനെ വിളിച്ച് കാണിച്ചെന്നും ഇന്നസെന്റ് ഓര്‍ക്കുന്നു.

അമിതാഭ് ബച്ചന് കിട്ടിയാലും മമ്മൂട്ടിയ്ക്ക് കിട്ടരുതെന്നായിരുന്നു ആ സമയം തന്റെ മനസിലൂടെ കടന്നുപോയതെന്നും പിന്നീട് നോക്കിയപ്പോള്‍ തന്റെ പേരില്ലാത്തതാണ് അതിന് കാരണമെന്നും ഇന്നസെന്റ് പറഞ്ഞു. ഒന്നുകൂടി തന്റെ പേര് വന്നാലോ എന്ന് കരുതി കുറേ നേരം ടിവി നോക്കിയിരുന്നു. മമ്മൂട്ടിയ്ക്ക് കിട്ടരുതെന്ന് അറിയാതെ മനസില്‍ തോന്നിയതാണെന്ന് പറഞ്ഞ ഇന്നസെന്റ് ആര്‍ക്കം തന്നോട് വിഷമം തോന്നരുതെന്നും കൂട്ടിച്ചേര്‍ത്തു.

അമിതാഭ് ബച്ചന് കിട്ടിക്കോട്ടെ മമ്മൂട്ടിയ്ക്ക് കിട്ടരുതെന്ന് ആലീസിനോട് പറഞ്ഞു. അടുത്ത റൗണ്ട് വന്നപ്പോള്‍ മമ്മൂട്ടിയെ കാണാനില്ല. അറ്റത്ത് മമ്മൂട്ടി വരുമോയെന്ന് ചിന്തിച്ചിരുന്നെങ്കിലും അതുണ്ടായില്ല. നാഷണല്‍ അവാര്‍ഡ് അമിതാഭ് ബച്ചന് കിട്ടി. എന്തിനാണ് നിങ്ങള്‍ അങ്ങനെ ആലോചിച്ചതെന്ന് ഭാര്യ തന്നോട് ചോദിച്ചെന്നും പെട്ടെന്ന് അങ്ങനെ ആലോചിച്ച് പോയതാണെന്നും ഇന്നസെന്റ് പറഞ്ഞു.

തനിയ്ക്ക് എത്രയോ അടുപ്പമുള്ള ആളാണ് മമ്മൂട്ടിയെന്നും അദ്ദേഹത്തിന്റെ അച്ഛനായും ചേട്ടനായുമെല്ലാം ഒരുപാട് സിനിമകളില്‍ അഭിനയിച്ചിട്ടുണ്ടെന്നും ഇന്നസെന്റ് വ്യക്തമാക്കി. കുടുംബ കാര്യങ്ങള്‍ പോലും പരസ്പരം പങ്കുവെയ്ക്കാറുണ്ട്. അങ്ങനെ ഒക്കെ ചിന്തിച്ചതില്‍ പിന്നീട് ഒരുപാട് വിഷമിച്ചു. അങ്ങനെ ഒരിക്കലും ചിന്തിക്കാന്‍ പാടില്ലെന്ന് തിരിച്ചറിഞ്ഞെന്നും അത്രയും പ്രിയപ്പെട്ടവരെ കുറിച്ച് പോലും ചില സമയത്ത് നമുക്ക് അങ്ങനെയൊക്കെ തോന്നിപ്പോകുമെന്ന് മനസിലാക്കിയെന്നും ഇന്നസെന്റ് കൂട്ടിച്ചേര്‍ത്തു.

പത്താം നിലയിലെ തീവണ്ടി എന്ന ജോഷി മാത്യു സംവിധാനം ചെയ്ത ചിത്രത്തില്‍ ഇന്നസെന്റ് മാനസിക രോഗിയുടെ വേഷം ചെയ്തിരുന്നു. ഈ ചിത്രത്തെ നാഷണല്‍ അവാര്‍ഡിന് വേണ്ടിയുള്ള തിരഞ്ഞെടുപ്പിനായി അയച്ചു. താന്‍ ഇക്കാര്യം അറിഞ്ഞില്ലെന്നും സിനിമയില്‍ നമുക്ക് എന്തെങ്കിലും കിട്ടുമെന്ന് ഒരിക്കലും വിചാരിച്ചിട്ടില്ലെന്നും ഇന്നസെന്റ് പറഞ്ഞു.