നടന്‍ ബാലയുമായി ബന്ധപ്പെട്ട ഒരു ഓര്‍മ പങ്കുവെച്ച് ടിനി ടോമിന്റേയും രമേഷ് പിഷാരടിയുടേയും വീഡിയോ വൈറലായിരുന്നു. ബാല സംവിധാനം ചെയ്ത ഹിറ്റ്ലിസ്റ്റ് സിനിമയിലേക്ക് ടിനിയെ അഭിനയിക്കാന്‍ വിളിച്ചതുമായി ബന്ധപ്പെട്ട ഒരു സംഭവമായിരുന്നു അത്. ബാലയുടെ ശബ്ദം അനുകരിച്ചുകൊണ്ടായിരുന്നു ടിനി സംഭവം വിവരിച്ചത്. പിന്തുണയുമായി രമേഷ് പിഷാരടിയും ടിനിക്കൊപ്പമുണ്ടായിരുന്നു. ഇത് വൈറലായതിന് തൊട്ടുപിന്നാലെ സമൂഹമാധ്യമങ്ങളില്‍ ട്രോളുകളില്‍ നിറഞ്ഞു. ബാലയും പ്രതികരിച്ച് ടിനിയോട് ദേഷ്യം തോന്നിയെന്നെല്ലാം പറഞ്ഞിരുന്നു. സിനിമകൾ ഇല്ലെങ്കിലും അടുത്തിടെയായി സോഷ്യൽ മീഡിയയിൽ വളരെയധികം ചർച്ച ചെയ്യപ്പെട്ടിട്ടുള്ള വ്യക്തികൂടിയാണ് ബാല. ബാലയുടെ വ്യക്തിജീവിതമാണ് പലപ്പോഴും ചർച്ച ആയിട്ടുള്ളത്. ബാലയുടെ രണ്ടാം വിവാഹവും അതിന് പിന്നാലെ മാധ്യമങ്ങൾക്ക് നൽകിയ ചില പ്രതികരണവുമൊക്കെ സോഷ്യൽ മീഡിയ വലിയ രീതിയിൽ ചർച്ച ചെയ്തിരുന്നു. കുന്ദംകുളം സ്വദേശിനി എലിസബത്തിനെയാണ് ബാല വിവാഹം ചെയ്തത്. അതേസമയം, ഒരുപാട് സൈബർ ആക്രമങ്ങൾക്കും ട്രോളുകൾക്കും താരം ഇരയായിട്ടുണ്ട്.

തമിഴ് കലർന്ന ബാലയുടെ ഉച്ചാരണമാണ് ട്രോളന്മാർ പലപ്പോഴും ആയുധമാക്കിയത്. ബാലയുടെ വ്യക്തിജീവിതം സംബന്ധിച്ച ചില ചോദ്യങ്ങളും അതിനിടയിൽ ഉയർന്നിരുന്നു. അതിനും താരം അഭിമുഖങ്ങളിൽ വ്യക്തമായ മറുപടി നൽകി. എന്നാൽ ബാല ഇതുസംബന്ധിച്ച് നൽകിയ പ്രതികരണങ്ങളെക്കാൾ ചില ആളുകൾ ശ്രദ്ധിച്ചത് ബാലയുടെ പുതിയ ലുക്കാണ്. ഒരുകാലത്ത് ലുക്ക് കൊണ്ടും സ്റ്റൈൽ കൊണ്ടും മലയാളത്തിലെ യുവ താരങ്ങൾക്ക് മുകളിൽ നിന്നിരുന്ന ബാലയ്ക്ക് ഇപ്പോൾ എന്തുപറ്റി എന്നാണ് എല്ലാവരും ചോദിക്കുന്നത്. താടിയും മുടിയും നീട്ടി വളർത്തി അൽപം മെലിഞ്ഞ ലുക്ക് എന്ത് കൊണ്ടാണ് എന്നാണ് ആരാധകർ ചോദിക്കുന്നത്. കുറച്ചു നാളുകളായി ബാലയുടേതായി പുറത്തുവരുന്ന അഭിമുഖങ്ങൾക്ക് താഴെയെല്ലാം ആരാധകരുടെ ഈ കമന്റുകൾ കാണാം.

കഴിഞ്ഞ ദിവസം ബാല നൽകിയ അഭിമുഖത്തിന് താഴെയും ബാലയ്ക്ക് എന്തു പറ്റി, ആകെ മെലിഞ്ഞ് പോയല്ലോ, എന്തെങ്കിലും രോഗാവസ്ഥയാണോ, മനസിലെ വിഷമമാണോ മുഖത്ത് കാണുന്നത്, നേരത്തെ എന്ത് ഭംഗി ആയിരുന്നു എന്നിങ്ങനെയുള്ള കമന്റുകളാണ് നിറയുന്നത്. അടുത്തിടെ ഒരു അഭിമുഖത്തിൽ ബാല തന്നെ ഇതിന് മറുപടി പറഞ്ഞിരുന്നു. താൻ ശരീര ഭാരം കുറച്ചത് ആന്നെന്നാണ് ബാല വ്യക്തമാക്കിയത്. സിനിമയ്ക്കായാണ് താടിയും മുടിയും വളർത്തിയ ലുക്കെന്നും നടൻ പറഞ്ഞിരുന്നു. 'ലാലേട്ടൻ തടി കുറച്ചാൽ കഥാപാത്രം, പൃഥ്വിരാജ് തടി കുറച്ചാൽ കഥാപാത്രം ബാല തടി കുറച്ചാൽ ഷു​ഗർ രോ​ഗി. ഇത് എന്ത് ന്യായം' എന്നും ബാല ചോദിച്ചിരുന്നു.

ബാലയുടെ പുതിയ ചിത്രമായ ഷെഫീഖിന്റെ സന്തോഷം സംവിധാനം ചെയ്യുന്നത് നവാഗതനായ അനൂപ് പന്തളം ആണ്. ബാല, ഉണ്ണി മുകുന്ദൻ എന്നിവരെ കൂടാതെ, മനോജ് കെ ജയൻ, ദിവ്യ പിള്ള. ആത്മിയ രാജൻ, ഷഹീൻ സിദ്ദിഖ്, മിഥുൻ രമേശ് എന്നിവരും ചിത്രത്തിൽ അഭിനയിക്കുന്നുണ്ട്. ഇതുകൂടാതെ, തമിഴിൽ നടൻ സൂര്യയെ നായകനാക്കി പുതിയൊരു സിനിമ ബാല സംവിധാനം ചെയ്യുന്നുണ്ട്. അതിന്റെ പ്രീപ്രൊഡക്ഷൻ വർക്കുകൾ നടന്നുകൊണ്ടിരിക്കുകയാണ്. തമിഴ്, മലയാളം സിനിമകളിൽ സജീവമായിട്ടുള്ള ബാല ഒരു സംവിധായകൻ കൂടിയാണ്. 2003 ൽ അൻപ് എന്ന തമിഴ് സിനിമയിലൂടെയാണ് ബാലയുടെ അഭിനയ ജീവിതം ആരംഭിക്കുന്നത്. തുടർന്ന് മൂന്ന് സിനിമകൾ കൂടി തമിഴിൽ ചെയ്ത ബാല 2006 ൽ കളഭം എന്ന സിനിമയിലൂടെ മലയാളത്തിലേക്കും എത്തുകയായിരുന്നു. പിന്നീട് ബിഗ് ബി, പുതിയ മുഖം, ഹീറോ, എന്ന് നിന്റെ മൊയ്‌ദീൻ തുടങ്ങി നിരവധി മലയാള സിനിമകളിൽ ശ്രദ്ധേയ വേഷങ്ങളിൽ ബാല തിളങ്ങി. വില്ലനായും നായകനായും സ്വഭാവ നടനായുമെല്ലാം മലയാള സിനിമയിൽ തന്റേതായ ഒരിടം കണ്ടെത്താൻ ബാലയ്ക്കായി. എന്നാൽ അടുത്ത കാലത്തായി താരം മലയാള സിനിമകളിൽ അത്ര സജീവമല്ലായിരുന്നു. എന്നാൽ ഇപ്പോൾ ഉണ്ണി മുകുന്ദൻ നായകനായ ഷഫീഖിന്റെ സന്തോഷത്തിലൂടെ വീണ്ടും മലയാള പ്രേക്ഷകർക്ക് മുന്നിലേക്ക് എത്താൻ ഒരുങ്ങുകയാണ്.