നടന്‍ ശ്രീനാഥ് ഭാസിക്കെതിരായ കേസ് ഹൈക്കോടതി സ്റ്റേ ചെയ്തിരുന്നു. കേസ് റദ്ദാക്കണമെന്ന് ആവശ്യപ്പെട്ട് ശ്രീനാഥ് ഭാസി നല്‍കിയ ഹര്‍ജിയിലായിരുന്നു നടപടി. പരാതിയുമായി മുന്നോട്ടുപോകാന്‍ താല്‍പര്യമില്ലെന്ന് പരാതിക്കാരിയും അറിയിച്ചിരുന്നു. ഇതേതുടർന്നാണ് എഫ്ഐആർ റദ്ദാക്കണമെന്ന് ആവശ്യപ്പെട്ട് ശ്രീനാഥ് ഭാസി ഹൈക്കോടതിയെ സമീപിച്ചത്. അഭിമുഖത്തിനിടെ ശ്രീനാഥ് ഭാസി അപമാനിച്ചെന്നാണ് ഓൺലൈൻ അവതാരക പരാതി നൽകിയത്. സംഭവം വിവാദമായതോടെ സിനിമാ നിർമാതാക്കളുടെ സംഘടന ഇരുവരെയും വിളിച്ചു നടത്തിയ ചർച്ചയിൽ ശ്രീനാഥ് ഭാസി ക്ഷമാപണം നടത്തിയെന്നും അതിനാലാണ് പരാതി പിൻവലിക്കുന്നതെന്നും അഭിഭാഷകൻ പറഞ്ഞു. പരാതി പിൻവലിക്കുകയാണെന്നു കാട്ടി കോടതിക്കു നൽകാനുള്ള ഹർജിയിൽ പരാതിക്കാരിയായ മാധ്യമപ്രവർത്തക ഒപ്പിട്ടു നൽകുകയും ചെയ്തു. ഇപ്പോഴിതാ ശ്രീനാഥ് ഭാസിയെ പരോക്ഷമായി വിമർശിച്ച് രംഗത്തെത്തിയിരിക്കുകയാണ് സംവിധായകൻ ഒമർ ലുലു. താൻ കഷ്ടപ്പെട്ട് തന്നെയാണ് സിനിമയിൽ എത്തിയതെന്നും, ഇനിയും അഭിനയിക്കുമെന്നും അല്ലെങ്കിൽ വാർക്കപണിക്ക് പോകുമെന്നും ശ്രീനാഥ് അടുത്തിടെ ഒരു അഭിമുഖത്തിൽ പറഞ്ഞിരുന്നു.

ഇതിനെയാണ് സംവിധായകൻ പരോക്ഷമായി വിമർശിക്കുന്നത്. ശ്രീനാഥ് ഭാസിയുടെ പേരെടുത്ത് പറയാതെയായിരുന്നു പരിഹാസം. ഒരിക്കലെങ്കിലും വാർക്കപണിക്ക് പോയിട്ട് ഇരുന്ന് തള്ളാൻ ഒമർ ലുലു ഫേസ്‌ബുക്കിൽ പങ്കുവെച്ച പോസ്റ്റിൽ പറഞ്ഞു. ‘സിനിമയിൽ നിന്ന് വിലക്കിയാൽ വാർക്ക പണിക്ക് പോകും. ഈ വാർക്ക പണിയുടെ ബുദ്ധിമുട്ട് എന്താ എന്ന് മോന് അറിയുമോ? ഒരു ദിവസം ആ ജോലിക്ക് പോവൂ എന്നിട്ട് ഇമ്മാതിരി തള്ള് ഒക്കെ പോരെ മോനെ’, ഒമർ ലുലു ഫേസ്‌ബുക്കിൽ കുറിച്ചു. താൻ സിവിൽ എഞ്ചിനീയറിംഗ് ആണ് പഠിച്ചതെന്നും, 3 മാസം സൈറ്റ് സൂപ്പർ വൈസർ ആയി ജോലി ചെയ്ത് വാർക്ക പണിയുടെ ബുദ്ധിമുട്ട് അനുഭവിച്ചിട്ടുണ്ടെന്നും അതിന്റെ ചൂട് ഇപ്പോഴും മനസ്സിൽ ഉണ്ടെന്നും സംവിധായകൻ വ്യക്തമാക്കുന്നു.