അമ്മയാകുകയാണ് എന്ന സന്തോഷ വാര്‍ത്ത അറിയിച്ചതോടെ രൺബീർ - ആലിയ ജോഡി കളുടെ ആരാധകര്‍ ആവേശത്തിലാണ്. ഒപ്പം, ഗര്‍ഭവതിയായ ആലിയയുടെ ചിത്രങ്ങള്‍ക്കായി പാപ്പരാസികളുടെ നീണ്ട കാത്തിരിപ്പാണ്. ബ്രഹ്മാസ്ത്ര ചിത്രം തിയേറ്ററുകളില്‍ വന്‍ വിജയം നേടി മുന്നേറുമ്പോള്‍ രൺബീർ - ആലിയ ജോഡി ഓണ്‍ സ്ക്രീനിലും ഓഫ് സ്ക്രീനിലും ചര്‍ച്ചയായി മാറുകയാണ്. ഇപ്പോഴിതാ ടൈം 100 ഇംപാക്ട് 2022 അവാർഡ്സിൽ മിന്നിത്തിളങ്ങിയിരിക്കുകയാണ് ആലിയ ഭട്ട്.

ഗര്‍ഭകാലത്തും ഫാഷന് വിട്ടുവീഴ്ച ഇല്ലാതെ നല്ല സ്‌റ്റൈലായി വസ്ത്രം ധരിക്കുന്ന ആലിയയുടെ ചിത്രങ്ങള്‍ ആരാധകർ ഇപ്പോഴും ഏറ്റെടുക്കാറുണ്ട്. അതുപോലെതന്നെയാണ് പുരസ്‌കാരം നേടിയതിന്‍റെ സന്തോഷം പങ്കുവച്ച് ആലിയ പങ്കുവച്ച ചിത്രങ്ങള്‍ ആരാധകർ ഏറ്റെടുത്തത്. ഇതിന് താഴെ നിരവധി പേര്‍ ആലിയയെ അഭിനന്ദിച്ച് കമന്‍റ് ചെയ്തിട്ടുണ്ട്. എന്നാല്‍ ഫാഷന്‍ പ്രേമികളുടെ കണ്ണുടക്കിയത് ആലിയയുടെ വസ്ത്രത്തില്‍ തന്നെയാണ്. മനോഹരമായ ബ്രോൺസ് ഗോള്‍ഡണ്‍ ഗൗണിൽ ആണ് താരം അവാര്‍ഡ് നൈറ്റില്‍ തിളങ്ങിയത്. ഡീപ് വി നെക്കും കെയ്പ് സ്ലീവുമാണ് ഗൗണിന്‍റെ പ്രത്യേകത. ഇന്ത്യൻ ഡിസൈനർമാരായ ഗൗരി, നൈനിക എന്നിവരുടെ ലേബലില്‍ നിന്നുള്ളതാണ് ഈ വസ്ത്രം. 189000 രൂപയാണ് ആലിയ ധരിച്ച ഈ വസ്ത്രത്തിന്‍റെ വില. വളരെ ലളിതവും അയവുള്ളതുമായ മെറ്റേണിറ്റി വെയറുകളാണ് ആലിയ ധരിക്കുന്നത്. ഇതിനിടെ സ്വന്തമായി ഒരു മെറ്റേണിറ്റി വസ്ത്രങ്ങളുടെ ബ്രാന്‍ഡും താരം തുടങ്ങി. ‘എഡമമ്മ’ എന്നാണ് ബ്രാന്‍ഡിന്റെ പേര്. ഇതിലെ വസ്ത്രങ്ങള്‍ പരിചയപ്പെടുത്തിയുള്ള ഒരു വീഡിയോയും ആലിയ ഇന്‍സ്റ്റഗ്രാമില്‍ പങ്കുവച്ചിരുന്നു.