മലയാളി പ്രേക്ഷകരുടെ ഇഷ്ട നടന്മാരിൽ ഒരാളാണ് ബാല. തമിഴ്, മലയാളം സിനിമകളിൽ സജീവമായിട്ടുള്ള ബാല ഒരു സംവിധായകൻ കൂടിയാണ്. 2003 ൽ അൻപ് എന്ന തമിഴ് സിനിമയിലൂടെയാണ് ബാലയുടെ അഭിനയ ജീവിതം ആരംഭിക്കുന്നത്. തുടർന്ന് മൂന്ന് സിനിമകൾ കൂടി തമിഴിൽ ചെയ്ത ബാല 2006 ൽ കളഭം എന്ന സിനിമയിലൂടെ മലയാളത്തിലേക്കും എത്തുകയായിരുന്നു. പിന്നീട് ബിഗ് ബി, പുതിയ മുഖം, ഹീറോ, എന്ന് നിന്റെ മൊയ്‌ദീൻ തുടങ്ങി നിരവധി മലയാള സിനിമകളിൽ ശ്രദ്ധേയ വേഷങ്ങളിൽ ബാല തിളങ്ങി. വില്ലനായും നായകനായും സ്വഭാവ നടനായുമെല്ലാം മലയാള സിനിമയിൽ തന്റേതായ ഒരിടം കണ്ടെത്താൻ ബാലയ്ക്കായി. എന്നാൽ അടുത്ത കാലത്തായി താരം മലയാള സിനിമകളിൽ അത്ര സജീവമല്ലായിരുന്നു. എന്നാൽ ഇപ്പോൾ ഉണ്ണി മുകുന്ദൻ നായകനായ ഷഫീഖിന്റെ സന്തോഷത്തിലൂടെ വീണ്ടും മലയാള പ്രേക്ഷകർക്ക് മുന്നിലേക്ക് എത്താൻ ഒരുങ്ങുകയാണ്.

അടുത്തിടെയായിരുന്നു സോഷ്യൽ മീഡിയ ട്രോളുകളിലൂടെ ബാല വലിയ ചർച്ചയായി മാറിയിരുന്നു. അടുത്തിടെ ടിനി ടോം, രമേശ് പിഷാരടി എന്നിവർ ഒരു ടെലിവിഷൻ ഷോയിൽ ബാലയെക്കുറിച്ചുള്ള ഒരു കോമഡി പറഞ്ഞതാണ് ഇതിന് തുടക്കം കുറിച്ചത്. ബാല നിർമ്മിച്ച ഹിറ്റ്ലിസ്റ്റ് എന്ന സിനിമയിൽ അഭിനയിക്കാൻ പോയപ്പോഴുള്ള അനുഭവമായിരുന്നു ടിനി ടോം പങ്കുവെച്ചത്. പ്രതിഫലത്തിന്റെ കാര്യം പറയുമ്പാേൾ നാന്, അനൂപ് മേനോൻ, പൃഥിരാജ് എന്നിവരൊന്നിക്കുന്ന സിനിമയാണെന്ന് ബാല പറയുകയും നല്ല സിനിമയാവുമെന്ന് കരുതി പ്രതിഫലം വീണ്ടും കുറയ്ക്കുമെന്നും ഒടുവിൽ പ്രതിഫലമില്ലാതെ സിനിമയിൽ അഭിനയിക്കാൻ തയ്യാറായെന്നുമാണ് ടിനി ടോം പറഞ്ഞത്. ഇതിനിടെ ഷോയിൽ ഒപ്പമുണ്ടായിരുന്ന രമേശ് പിഷാരടിയും അന്നത്തെ കഥയെ ഒന്ന് പൊലിപ്പിച്ചു. ഇതോടെ നാന് പൃഥിരാജ് അനൂപ് മേനോൻ, എന്താ ലെമൺ ടീയൊക്കെ ചോദിച്ചെന്ന് കേട്ടല്ലോ എന്നീ ഡയലോ​ഗുകൾ സോഷ്യൽ മീഡിയയിൽ ഹിറ്റായി. ഈ ഡയലോ​ഗ് വെച്ച് നിരവധി ട്രോളുകളും റീലുകളും പുറത്തിറങ്ങി. ബാലയെന്ന് പറഞ്ഞാൽ നാന് പൃഥിരാജ് അനൂപ് മേനോൻ എന്ന ഡയലോ​ഗ് ഓർക്കുന്ന വിധത്തിലേക്ക് കാര്യങ്ങൾ നീങ്ങി. ഇപ്പോഴിതാ ഇതേപറ്റി സംസാരിച്ചിരിക്കുകയാണ് ബാല. ട്രോളുകൾ ആദ്യം കണ്ടപ്പോൾ ദേഷ്യം തോന്നിയെന്നും എന്നാൽ എല്ലാത്തിനെയും പോസിറ്റീവ് ആയാണ് എടുക്കുന്നതെന്നും ബാല പറഞ്ഞു. 'മാനേജരാണ് ആദ്യം വീഡിയോ കാണിച്ചത്. കോമഡി പറയുമ്പോൾ കുറച്ച് മസാല കൂട്ടിയാലല്ലേ ആളുകൾക്ക് രസിക്കാൻ പറ്റുകയുള്ളൂ. ആദ്യം ദേഷ്യം വന്നു. രണ്ട് ദിവസം കഴിഞ്ഞ് ടിനി വിളിച്ചിരുന്നു. ഞാൻ അങ്ങോട്ട് മെസേജ് അയച്ചില്ല. പിഷാരടിയുടെ അടുത്ത് മമ്മൂക്ക വിളിച്ചിട്ട് പറഞ്ഞു ഇവനോട് മര്യാദക്ക് ഒരു നാല് പടം കോമഡി ചെയ്യാൻ പറയൂ. സൂപ്പർ ഹിറ്റ് ആവുമെന്ന്,' ബാല പറഞ്ഞു. അതേസമയം ഹിറ്റ്ലിസ്റ്റ് എന്ന സിനിമയിൽ തനിക്ക് പ്രതിഫലം ലഭിച്ചിട്ടുണ്ടെന്ന് ടിനി ടോം ആ വീഡിയോയിൽ തന്നെ വ്യക്തമാക്കിയിരുന്നു. ഡബ്ബിം​ഗിന് വരില്ലെന്ന് പറഞ്ഞപ്പോൾ മുഴുവൻ പണവും തന്നെന്നും ബാല തന്റെ നല്ല സുഹൃത്താണെന്നും ടിനി ടോം പറഞ്ഞു. തനിക്കിതൊന്നും വലിയ തമാശയായി തോന്നുന്നില്ലെന്ന് ബാല നേരത്തെയും പറഞ്ഞിരുന്നു.