കോണ്‍ഗ്രസ് അധ്യക്ഷ സ്ഥാനത്തേക്ക് നടക്കുന്ന തിരഞ്ഞെടുപ്പില്‍ തിരുവനന്തപുരം എം പി ശശി തരൂര്‍ മത്സരിക്കാന്‍ പാടില്ലായിരുന്നെന്ന് അഭിപ്രായവുമായി സംവിധായകന്‍ സനല്‍ കുമാര്‍ ശശിധരന്‍ കഴിഞ്ഞ ദിവസം രംഗത്തെത്തിയിരുന്നു. മോദിയെയും പിണറായിയെയും ഒക്കെ പരസ്യമായി പിന്താങ്ങാന്‍ മടിയില്ലാത്ത, തനിക്ക് വേറെയും അവസരങ്ങള്‍ ഉണ്ട് എന്ന് പിറുപിറുക്കുന്ന തരൂര്‍ പ്രവര്‍ത്തകരില്‍ സംശയങ്ങള്‍ മാത്രമേ ഉയര്‍ത്തുവെന്ന് സനല്‍ കുമാര്‍ ശശിധരന്‍ പറഞ്ഞിരുന്നു. ഇപ്പോഴിതാ മഞ്ജു വാര്യരുമായി ഉണ്ടായ വിഷയത്തെക്കുറിച്ച് തുറന്ന് പറയുകയാണ് സനൽകുമാർ ശശിധരൻ. മഞ്ജു വാര്യരോട് പ്രണയം തുറന്നു പറഞ്ഞുവെന്നത് സത്യം തന്നെയാണെന്ന് ആവർത്തിക്കുകയാണ് സംവിധായകൻ. പല പ്രോജക്‌ടുകളും മാറ്റിവച്ചാണ് കയറ്റം എന്ന സിനിമയ്ക്ക് വേണ്ടി അവർ തനിക്ക് ഡേറ്റ് തന്നതെന്നും സനൽ വെളിപ്പെടുത്തുകയാണ്. ഒരു ചാനലിൽ നൽകിയ അഭിമുഖത്തിലായിരുന്നു താരത്തിന്റെ വെളിപ്പെടുത്തൽ. ''കയറ്റം എന്ന സിനിമയുടെ കാരണം മഞ്ജു വാര്യരാണ്. അവരാണ് ആദ്യം എനിക്ക് മെസേജ് അയക്കുന്നത്. സെക്‌സി ദുർഗയുടെ ലിങ്ക് കൊടുക്കാവോ എന്ന് ചോദിച്ചുകൊണ്ടായിരുന്നു മെസേജ്. ആദ്യം എനിക്ക് വിശ്വാസമായില്ല. പിന്നീട് അവരത് കണ്ടിട്ട് വളരെ ഇഷ്‌ടപ്പെട്ടെന്ന് പറഞ്ഞു. എനിക്കൊപ്പം വർക്ക് ചെയ്യാൻ താൽപര്യമുണ്ടെന്നും അറിയിച്ചു. കയറ്റം സിനിമയുടെ സ്ക്രിപ്‌റ്റിനെ കുറിച്ചു പറയുമ്പോൾ ഒരുപാട് അപകടങ്ങൾ സംഭവിച്ചേക്കാം എന്നാണ് ഞാൻ പറഞ്ഞത്.

പക്ഷേ അതൊന്നും പ്രശ്‌നമല്ലെന്ന് അവർ പറഞ്ഞു. പല പ്രോജക്‌ടുകളും മാറ്റിവച്ചാണ് ഓഗസ്‌റ്റിൽ ഷൂട്ട് ചെയ്യാൻ മഞ്ജു തയ്യാറായത്. അവർക്കൊപ്പമുള്ള ഷൂട്ടിംഗ് കൺമുന്നിൽ നടക്കുന്ന അത്ഭുതമായിട്ടാണ് എനിക്ക് തോന്നിയത്.മഞ്ജു വാര്യരോട് താൻ പ്രണയാഭ്യർത്ഥന നടത്തിയെന്നത് ശരിയാണെന്ന് സനൽകുമാർ ശശിധരൻ പറഞ്ഞു. അവർക്ക് തന്നോട് ആകർഷണം തോന്നിയിട്ടുള്ളതായി പലതവണ തോന്നിയിട്ടുണ്ടെന്നും, ചില പെരുമാറ്റങ്ങളിൽ നിന്ന് അത് വ്യക്തമായിരുന്നുവെന്നും സനൽ പറയുന്നു.