മോഹന്‍ലാല്‍ ആദ്യമായി സംവിധായകനാകുന്ന 'ബറോസ്' എന്ന സിനിമയുടെ പൂജയും ചിത്രീകരണവും കഴിഞ്ഞ ദിവസം കൊച്ചി കാക്കനാട് നവോദയ സ്റ്റുഡിയോയിൽ നടന്നു. മമ്മൂട്ടി, ദിലീപ്, പൃഥ്വിരാജ് സുകുമാരന്‍ ഉള്‍പ്പെടെ നിരവധി താരങ്ങളും പ്രിയദർ‍ശൻ, ഫാസിൽ, സിബി മലയിൽ, സത്യൻ അന്തിക്കാട്, ലാൽ തുടങ്ങി നിരവധി സംവിധായകരും പൂജയില്‍ പങ്കെടുക്കാനെത്തിയിരുന്നു. പൂജാ വേളയിലെ ചിത്രങ്ങളിൽ സോഷ്യൽ മീഡിയയിൽ ഏറെ വൈറലായിരിക്കുന്നത് മമ്മൂക്കയും ലാലേട്ടനും ഒരുമിച്ചിരിക്കുന്ന ചിത്രങ്ങളാണ്.  മുടി നീട്ടി ഗ്ലാസ് വച്ച മമ്മൂട്ടിയുടെ ചിത്രം സോഷ്യല്‍ മീഡിയയില്‍ വൈറലായിരുന്നു. അടുത്ത ഒരാഴ്ച സോഷ്യല്‍ മീഡിയ ഭരിച്ചത് ആ ചിത്രമായിരുന്നു. എന്നാല്‍ ആ ചിത്രത്തില്‍ മമ്മൂട്ടി വച്ച ആ ഗ്ലാസിന് ഒരു പ്രത്യേകതയുണ്ട്. 34 വര്‍ഷം പഴക്കമുള്ള ഗ്ലാസാണ് അത്. മോഹന്‍ലാലിന്റെ കല്യാണത്തിന് മമ്മൂട്ടി ധരിച്ചിരുന്ന അതേ കണ്ണടയാണ് ബറോസിന്റെ പൂജയ്ക്കും മമ്മൂട്ടി ധരിച്ചത്. മമ്മൂട്ടി തന്നെയാണ് ഇക്കാര്യം പറഞ്ഞത്. റോഷാക്കിന്റെ പ്രമോഷന്റെ ഭാഗമായി സംസാരിക്കുമ്പോഴാണ് മമ്മൂട്ടി ഇക്കാര്യം പറഞ്ഞത്. ഫാഷന്‍ ഫ്രീക്കാണ് മമ്മൂട്ടി എന്ന് അറിയാം. എന്നാല്‍ ഇത്ര പഴക്കമുള്ള സാധനം സൂക്ഷിച്ച് വയ്ക്കുമെന്ന് തങ്ങള്‍ക്ക് അറിയില്ലായിരുന്നുവെന്നാണ് ആരാധകര്‍ പറയുന്നത്.