നടി ഷെര്‍ലിന്‍ ചോപ്ര ഗുരുതര പരാതിയുമായി രംഗത്തെത്തി. സിനിമാ സംവിധായകന്‍ സാജിദ് ഖാന്‍ ലൈംഗികാതിക്രമം നടത്തിയെന്നാണ് പരാതി. സംഭവത്തില്‍ മുംബൈ പോലീസിനാണ് നടി പരാതി നല്‍കിയത്. അദ്ദേഹത്തെപ്പോലെ ഒരു വലിയ വ്യക്തിക്കെതിരെ പരാതി നല്‍കാന്‍ നേരത്തെ ധൈര്യമില്ലായിരുന്നു. എന്നാല്‍ മീടൂ-വിന് ശേഷം സ്ത്രീകള്‍ സധൈര്യം മുമ്ബോട്ട് വരികയാണ്. അയാള്‍ ജയില്‍ ശിക്ഷ അനുഭവിക്കണമെന്നാണ് തനിക്ക് പറയാനുള്ളതെന്നും നടി പ്രതകരിച്ചു.

2005ലാണ് കേസിനാസ്പദമായ സംഭവം നടന്നത്. സാജിദ് ഖാനെപ്പോലെ പ്രമുഖനായ വ്യക്തിക്കെതിരെ ലൈംഗികാതിക്രമ പരാതി നല്‍കാനുള്ള ധൈര്യം അന്നുണ്ടായിരുന്നില്ല. 2018ലെ മീടൂ മൂവ്‌മെന്റിന് ശേഷം സ്ത്രീകള്‍ അവരുടെ ഭയാനകമായ കഥകള്‍ പങ്കുവെക്കുന്നത് കണ്ടപ്പോഴാണ് ധൈര്യം വന്നതെന്നും ഷെര്‍ളിന്‍ ചോപ്ര മാദ്ധ്യമങ്ങളോട് പ്രതികരിച്ചു.

സാജിദ് ഖാന്‍ സ്ത്രീകളോട് എങ്ങനെയാണ് പെരുമാറിയിട്ടുള്ളതെന്ന് മിക്കവര്‍ക്കും അറിയുന്ന കാര്യമാണ്. ഒരു ദിവസം എത്ര തവണ സെക്സില്‍ ഏര്‍പ്പെടും, എത്ര കാമുകന്‍മാരുണ്ട് എന്നിങ്ങനെയുള്ള ചോദ്യങ്ങളാണ് അയാള്‍ പൊതുവെ ഉന്നയിക്കാറുള്ളത്. തനിക്ക് മുമ്ബില്‍ അയാളുടെ ജനനേന്ദ്രിയമാണ് തുറന്നുകാണിച്ചത്. അവിടെ തന്നെക്കൊണ്ട് സ്പര്‍ശിപ്പിക്കുകയും ചെയ്തു. ഇതെല്ലാം നടന്ന് വര്‍ഷങ്ങള്‍ പിന്നിട്ടുവെന്നത് സത്യമാണ്. എന്നാല്‍ ഒരു സ്ത്രീ നേരിട്ട ദുരനുഭവം വര്‍ഷങ്ങള്‍ പിന്നിട്ടതിന് ശേഷം തുറന്നുപറയരുതെന്നുണ്ടോ? അന്നില്ലാതിരുന്ന ധൈര്യം ഇന്നുണ്ട്. സാജിദ് ഖാനോ രാജ് കുന്ദ്രയോ ആരുമാകട്ടെ.. തെറ്റുചെയ്താല്‍ അവര്‍ക്കെതിരെ ശബ്ദമുയര്‍ത്തുക തന്നെ ചെയ്യുമെന്നും ചോപ്ര പറഞ്ഞു.

ഖാനെതിരായി തെളിവുകളൊന്നും തന്റെ കൈവശമില്ല. സിനിമയുടെ സംവിധായകരുമായും നിര്‍മാതാക്കളുമായും ഔദ്യോഗികമായി നടത്തുന്ന കൂടിക്കാഴ്ചക്കിടെ താനൊരിക്കലും രഹസ്യ ക്യാമറ കൈവശം കരുതാറില്ല. അതിനാല്‍ ഇക്കാര്യങ്ങള്‍ സാധൂകരിക്കാന്‍ തെളിവുകള്‍ പക്കലില്ലെന്നും യുവതി പറഞ്ഞു. അതേസമയം സല്‍മാന്‍ ഖാന്‍ അവതാരകനായ ടിവി റിയാലിറ്റി ഷോ 'ബിഗ് ബോസ് 16'ല്‍ പങ്കാളിയാണ് സാജിദ് ഖാന്‍. ലൈംഗികാരോപണം ഉയര്‍ന്നുവന്ന സാഹചര്യത്തില്‍ ഇയാളെ പുറത്താക്കണമെന്ന് നിരവധി പേര്‍ ആവശ്യപ്പെട്ടിരുന്നു.