യു.എ.ഇ ഗോൾഡൻ വിസ സ്വീകരിച്ച് നടൻ ടിനി ടോം. അബുദാബി സാംസ്‌കാരിക-വിനോദ സഞ്ചാര വകുപ്പ് ഉദ്യോഗസ്ഥരുടെ സാന്നിധ്യത്തിൽ നടന്ന ചടങ്ങിൽ അബുദാബി ചേംബർ വൈസ് ചെയർമാനും ലുലു ഗ്രൂപ്പ് ചെയർമാനുമായ എം എ യൂസഫലിയിൽ നിന്നാണ് ടിനി ടോം ഗോൾഡൻ വിസ സ്വീകരിച്ചത്.

പുതുവത്സരവേളയിൽ മലയാളികളുടെ അഭിമാനമായ എം എ യൂസഫലിയുടെ കയ്യിൽ നിന്ന് ഗോൾഡൻ വിസ ഏറ്റുവാങ്ങാനായതിൽ ഏറെ സന്തോഷമുണ്ട്. ഗോൾഡൻ വിസ ലഭിച്ചതിൽ യുഎഇ സർക്കാരിനും ഗോൾഡൻ വിസ ലഭിക്കാൻ അവസരം ഒരുക്കിത്തന്ന എം എ യൂസഫലിക്കും അദ്ദേഹം നന്ദി അറിയിക്കുകയും ചെയ്തു.

കലാ സാംസ്‌കാരിക രംഗത്തെ പ്രമുഖർക്കാണ് യുഎഇ ഗോൾഡൻ വിസ സമ്മാനിക്കുന്നത്. 10 വർഷമാണ് യുഎഇ ഗോൾഡൻ വിസയുടെ കാലാവധി. നേരത്തെ, മലയാള ചലച്ചിത്ര താരങ്ങൾ ഉൾപ്പെടെ നിരവധി പേർക്ക് യുഎഇ ഗോൾഡൻ വിസ ലഭിച്ചിരുന്നു.