രണ്ട് വര്‍ഷത്തെ വിലക്കിനു ശേഷം ബോളിവുഡ് നടി കങ്കണ റണൗട്ട് വീണ്ടും ട്വിറ്ററില്‍. പ്രകോപനപരമായി ട്വീറ്റുകള്‍ ചെയ്തതിന് 2021 ല്‍ മൈക്രോബ്ലോഗിംഗ് വെബ്‌സൈറ്റായ ട്വിറ്റര്‍ കങ്കണയുടെ അക്കൗണ്ട് നിരോധിച്ചിരുന്നു. ട്വിറ്ററില്‍ തിരിച്ചെത്തിയതില്‍ സന്തോഷമുണ്ടെന്നും കങ്കണ ട്വീറ്റ് ചെയ്തു. തന്റെ പുതിയ ചിത്രമായ 'എമര്‍ജന്‍സി'യുടെ പിന്നണി ദൃശ്യങ്ങളും കങ്കണ പങ്കുവച്ചു.

പശ്ചിമ ബംഗാള്‍ നിയമസഭാ തിരഞ്ഞെടുപ്പിനെ തുടര്‍ന്നുണ്ടായ അക്രമങ്ങളെക്കുറിച്ചും മമത ബാനര്‍ജിയുടെ വിജയത്തെക്കുറിച്ചും പ്രകോപനപരമായ ട്വീറ്റുകള്‍ ചെയ്തതിന്റെ പേരില്‍ കങ്കണ റണാവത്തിനു ട്വിറ്റര്‍ വിലക്കേര്‍പ്പെടുത്തിയിരുന്നു. ട്വിറ്ററിലെ വിലക്ക് നീക്കിയതിന്റെ സന്തോഷത്തിലാണ് കങ്കണ ഇപ്പോള്‍. 'എമര്‍ജന്‍സി' എന്ന ചിത്രം പൂര്‍ത്തിയായെന്ന കങ്കണയുടെ ട്വീറ്റ് ആരാധകര്‍ ഏറ്റെടുത്ത് കഴിഞ്ഞു. കങ്കണ റണൗട്ട് തന്നെ സംവിധാനം ചെയ്ത ചിത്രം കൂടിയാണ്'എമര്‍ജന്‍സി'.

പേര് സൂചിപ്പിക്കുന്നത് പോലെ, അടിയന്തരാവസ്ഥയുടെ പശ്ചാത്തലത്തില്‍ ഒരുങ്ങുന്ന ചിത്രത്തിന്റെ ഷൂട്ടിംഗ് പൂര്‍ത്തിയായതായി കഴിഞ്ഞ 21 നു കങ്കണ പ്രഖ്യാപിച്ചിരുന്നു. റിതേഷ് ഷായാണ് ചിത്രത്തിന്റെ തിരക്കഥയും സംഭാഷണവും ഒരുക്കിയിരിക്കുന്നത്.

മണികര്‍ണിക ഫിലിംസിന്റെ ബാനറില്‍ കങ്കണ റണാവത്തും രേണു പിറ്റിയും ചേര്‍ന്നാണ് ചിത്രം നിര്‍മ്മിക്കുന്നത്. കങ്കണയുടെ രണ്ടാമത്തെ സംവിധാന സംരംഭമാണിത്. 2019 ല്‍ പുറത്തിറങ്ങിയ 'മണികര്‍ണിക: ദി ക്വീന്‍ ഓഫ് ഝാന്‍സി' ആയിരുന്നു കങ്കണ ആദ്യമായി സംവിധാനം ചെയ്ത ചിത്രം. എന്നിരുന്നാലും, കൃഷ് ജഗര്‍ലമുടിക്കൊപ്പമാണ് കങ്കണ ഇത് സംവിധാനം ചെയ്തത്.