വിജയുമായുള്ള 15 വര്ഷത്തെ പിണക്കം അവസാനിപ്പിക്കാന് തയാറെന്ന് നെപ്പോളിയന്
മലയാളി സിനിമാപ്രേമികളുടെ മനം കവര്ന്ന താരമാണ് നെപ്പോളിയന്. മലയാളത്തിലും തമിഴിലും തെലുങ്കിലുമൊക്കെ വില്ലനായി നിറഞ്ഞു നിന്നിരുന്ന താരം കുറച്ചുനാളായി സിനിമയില് നിന്ന് വിട്ടു നില്ക്കുകയാണ്. ഇപ്പോള് നെപ്പോളിയനെ വാര്ത്തകളില് നിറക്കുന്നത് തമിഴ് സൂപ്പര്താരം വിജയുമായുള്ള ഒരു വഴക്കിന്റെ പേരിലാണ്. 15 വര്ഷമായി വിജയുമായി പിണക്കത്തിലാണ് നെപ്പോളിയന്. എന്നാല് പിണക്കം മാറ്റാനാന് ആഗ്രഹിക്കുന്നുവെന്ന് വ്യക്തമാക്കിയിരിക്കുകയാണ് താരം ഇപ്പോള്.
2007ല് പോക്കിരി സിനിമയുടെ ഷൂട്ടിങ്ങിനിടെയാണ് ഇരുവരും തമ്മിലുള്ള ബന്ധം തകരുന്നത്. അതിനു ശേഷം വിജയ് അഭിനയിച്ച സിനിമകള് കാണുന്നതുപോലും നിര്ത്തി എന്നാണ് പറയുന്നത്. ''പിണക്കം അവസാനിപ്പിക്കാന് തയാറുണ്ടോ എന്ന് വിജയ്യോട് ചോദിക്കണമെന്നുണ്ട്. പതിനഞ്ച് വര്ഷമായി ഞങ്ങള് തമ്മില് കാണുകയോ സംസാരിക്കുകയോ ചെയ്യാതായിട്ട്. ഇത്രയും ഇടവേളയ്ക്കുശേഷം അദ്ദേഹം എന്നോട് സംസാരിക്കാന് തയാറാകുമോ എന്ന് അറിയില്ല. പക്ഷേ സംസാരിക്കാന് ഞാന് റെഡിയാണ്." നെപ്പോളിയന് പറഞ്ഞു. ഒരു അഭിമുഖത്തിനിടെയാണ് താരം വ്യക്തമാക്കിയത്.
നെപ്പോളിയന് തന്റെ ആരാധകരേയും കൂട്ടി പോക്കിരി സെറ്റില് എത്തിയതാണ് പ്രശ്നങ്ങള്ക്ക് കാരണമായത്. വിജയ്യെ നേരില് കണ്ട് ഫോട്ടോ എടുക്കണമെന്ന് സുഹൃത്തുക്കള് പറഞ്ഞതോടെ അവരേയും കൂട്ടി നെപ്പോളിയന് പോക്കിരിയുടെ സെറ്റില് എത്തുകയായിരുന്നു. എന്നാല് ഇവര് വരുന്ന കാര്യത്തെക്കുറിച്ച് നെപ്പോളിയന് വിജയ്യോട് സൂചിപ്പിച്ചിരുന്നില്ല. സുഹൃത്തുക്കളുമായി നെപ്പോളിയന് എത്തുമ്ബോള് ആക്ഷന് ചിത്രീകരണം കഴിഞ്ഞ് കാരവനില് വിശ്രമിക്കുകയായിരുന്നു വിജയ്. ഇവര് നേരെപോയ കാരവനില് തട്ടുകയായിരുന്നു. ഇതു കണ്ടെത്തിയ സെക്യൂരിറ്റി ഇവരെ തടഞ്ഞു.
വിജയ്യോട് ചോദിച്ച് അനുവാദം വാങ്ങി കടത്തിവിടാമെന്ന് നെപ്പോളിയനോട് പറഞ്ഞു. എന്നാല് ഇത് നെപ്പോളിയന് ഭയങ്കര നാണക്കേടുണ്ടാക്കി. അദ്ദേഹം സെക്യൂരിറ്റിയുമായി വഴക്കിട്ടു. പുറത്ത് ബഹളം കേട്ട വിജയ് കാരവാനില് നിന്നും പുറത്തെത്തി. വിജയ്യെ കണ്ടതും നെപ്പോളിയന് തന്റെ ആവശ്യം പറഞ്ഞു. ഷൂട്ടിങിന്റെ ടെന്ഷനിലും മറ്റും തളര്ന്നിരിക്കുകയായിരുന്ന വിജയ് പെട്ടന്ന് നെപ്പോളിയനോട് ദേഷ്യപ്പെടുകയായിരുന്നു. ഈ സംഭവത്തിനുശേഷം ഇരുവരും തമ്മില് കാണുകയോ സംസാരിക്കുകയോ ചെയ്തിട്ടില്ല.
https://www.facebook.com/Malayalivartha
