ബോളിവുഡ് താരങ്ങളെ വിടാതെ പിന്തുടരുന്നവരാണ് പാപ്പരാസികൾ. താരങ്ങൾ ആരുടെ കൂടെ എവിടെയൊക്കെ പോകുന്നു എന്നതടക്കമുള്ള എല്ലാ കാര്യങ്ങളും പാപ്പരാസികൾ ക്യാമറയിൽ പകർത്താറുമുണ്ട്. പലപ്പോഴും പാപ്പരാസികളുടെ താരങ്ങളുടെ മേലുള്ള ഇടപെടൽ അൽപ്പം കടന്നുപോകാറുമുണ്ട്. മലൈക അറോറയുടെ അമ്മ ജോയ്‌സിയുടെ എഴുപതാം പിറന്നാൾ ആഘോഷത്തിൽ പങ്കെടുക്കാൻ എത്തിയപ്പോൾ എല്ലാവരുടെയും ശ്രദ്ധ ആകർഷിച്ചത് സെയ്‌ഫിനെയും കരീനയേയുമായിരുന്നു. പാർട്ടി കഴിഞ്ഞ് താമസസ്ഥലത്ത് എത്തിയ തങ്ങളെ പിന്തുടർന്ന പാപ്പരാസികൾക്ക് സെയ്‌ഫ് നൽകിയ രസകരമായ മറുപടിശ്രദ്ധ നേടിയിരുന്നു.

'ഒരു കാര്യം ചെയ്യൂ, ഞങ്ങളുടെ കിടപ്പുമുറി വരെ പിന്തുടരൂ" എന്നാണ് പാപ്പരാസികളോട് അതൃപ്തനായി സെയ്‌ഫ് പറയുന്നത്. 'സെയ്ഫ് സാർ, ഞങ്ങൾ നിങ്ങളെ സ്നേഹിക്കുന്നു, എന്നു ഫോട്ടോഗ്രാഫർമാരിൽ ഒരാൾ സെയ്‌ഫിനോട് പറയുമ്പോൾ ഞങ്ങൾക്കും നിങ്ങളെ ഇഷ്ടമാണ് എന്നു പറഞ്ഞു പുഞ്ചിരിച്ചുകൊണ്ട് കരീനയുടെ കൈപിടിച്ചു പോവുന്ന സെയ്‌ഫിനെ വീഡിയോയിൽ കാണാമായിരുന്നു. എന്നാൽ ഇതിലിപ്പോൾ വിശദീകരണവുമായെത്തിയിരിക്കുകയാണ് താരം. പാപ്പാരിസകൾക്കെതിരെ താരം നിയമനടപടിയെടുക്കുമെന്ന തരത്തിൽ അഭ്യൂഹങ്ങളുയർന്നിരുന്നു. എന്നാൽ നിയമനടപടിയോ വീടിന്റെ സുരക്ഷ ജീവനക്കാർക്കെതിരായ നടപടിയോ സ്വീകരിക്കുന്നില്ലെന്ന് സെയ്ഫ് പ്രസ്താവനയിലൂടെ വ്യക്തമാക്കി. സ്വകാര്യ ഇടത്തേക്കാണ് അവർ കടന്നു കയറിയത്. സുരക്ഷ ജീവനക്കാരെ മറികടന്നാണ് അവരെത്തിയത്. ഞങ്ങളുടെ സ്ഥലത്ത് കടന്നു കയറി 20 ഓളം ക്യാമറാമാൻമാർ ലൈറ്റുകൾ വച്ചു. ഇത് തെറ്റായ പെരുമാറ്റമാണ്. ഞാനും കുടുംബവും പാപ്പരാസികളുമായി എപ്പോഴും സഹകരിക്കുന്നവരാണ്. എന്നാൽ അതിർവരമ്പ് എവിടെയാണെന്ന് അവർ മനസിലാക്കണം. അവർ അതിനോടകം ആ അതിർവരമ്പ് കടന്നിരുന്നു. അതുകൊണ്ടാണ് ഞാൻ ബെഡ്റൂമിലേക്ക് വരൂ എന്ന് ദേഷ്യത്തോടെ പറഞ്ഞതെന്ന് സെയ്ഫ് വ്യക്തമാക്കി.