ബാഹുബലിയിലൂടെ ഇന്ത്യ മുഴുവൻ ആരാധകരെ നേടിയ കഥാപാത്രമാണ് ദേവസേന. ബാഹുബലിയുടെ നായിക എന്നതിനപ്പുറം കഥാപാത്രത്തിൻ്റെ പ്രധാന്യംകൊണ്ടു തന്നെ ദേവസേനയെ അവതരിപ്പിച്ച അനുഷ്ക ഷെട്ടിയ്ക്കും പ്രേക്ഷക പ്രീതി ഭാഷാ വ്യത്യാസമില്ലാതെ നേടിയെടുക്കാൻ സാധിച്ചു. തമിഴിലും തെലുങ്കിലും താരമായിരുന്ന അനുഷ്ക ബാഹുബലിയിലൂടെ മലയാളം, കന്നട, ഹിന്ദി ഭാഷകളിലും താരമായി മാറി. എന്നാൽ സമീപകാലത്ത് ഈ നായിക വെള്ളിത്തിരയിൽ നിന്നും മാറി നിൽക്കുന്ന കാഴ്ചയായിരുന്നു പ്രേക്ഷകർ കണ്ടത്. എങ്കിലും ആരാധകർ എക്കാലത്തും അനുഷ്കയെ അന്വേഷിച്ചുകൊണ്ടിരുന്നു. 2020 ൽ പുറത്തിറങ്ങിയ നിശബ്ദം എന്ന ഹൊറർ ചിത്രത്തിലാണ് അനുഷ്കയെ പ്രേക്ഷകർ ഒടുവിലായി കണ്ടത്. ഇപ്പോഴിതാ പ്രിയ നായിക അഭിനയത്തിൽ നിന്നും ഇടവേള എടുത്തതിന്റെ കാരണം തിരയുകയാണ് ആരാധകർ.

കുറച്ചു നാൾ മുമ്പ് ഒരു അഭിമുഖത്തിൽ തനിക്ക് അപൂർവവും വിചിത്രവുമായി ഒരു രോഗമുള്ളതായി അനുഷ്ക ഷെട്ടി വെളിപ്പെടുത്തിയിരുന്നു. എനിക്ക് ചിരിക്കുന്ന രോഗമുണ്ട്. ചിരിക്കുന്നത് ഒരു പ്രശ്നമാണെന്ന് നിങ്ങൾക്ക് തോന്നിയേക്കാം? എനിക്കത് പ്രശ്നമാണ്. ഞാൻ ചിരിക്കാൻ തുടങ്ങിയാൽ 15 മുതൽ 20 മിനിറ്റ് വരെ ഞാൻ തുടരും. കോമഡി രംഗങ്ങൾ കാണുമ്പോഴോ ഷൂട്ട് ചെയ്യുമ്പോഴോ എനിക്ക് ചിരി നിർത്താൻ പറ്റാതെ വരും. പലപ്പോഴും പല തവണ സിനിമകളുടെ ഷൂട്ടിംഗ് പോലും തടസപ്പെട്ടിട്ടുണ്ടെന്നും പറയുകയാണ് അനുഷ്ക.

ഇപ്പോഴിതാ മൂന്നു വർഷത്തെ ഇടവേളയ്ക്കു ശേഷം അനുഷ്‍ക ഷെട്ടി വൻ തിരിച്ചുവരവിന് ഒരുങ്ങുകയാണ്. ‘മിസ് ഷെട്ടി മിസ്റ്റർ പൊളിഷെട്ടി’ എന്ന തെലുങ്ക് ചിത്രത്തിലൂടെയാണ് അനുഷ്‍ക തിരിച്ചെത്തുന്നത്. മഹേഷ് ബാബു പി. സംവിധാനം ചെയ്യുന്ന ചിത്രത്തിൽ നവീനാണ് നായകൻ. ചിത്രത്തിൽ ഷെഫിൻ്റെ റോളാണ് അനുഷ്ക അവതരിപ്പിക്കുന്നത്. ചിത്രത്തിൻ്റെ പോസ്റ്റർ റീലിസ് ചെയ്തതു മുതൽ അനുഷ്കയുടെ തിരിച്ച വരവ് ആഘോഷമാക്കുകയാണ് ആരാധകരും. സിനിമയിൽ നിന്നും മാറി നിന്നെങ്കിലും 41 കാരിയായ അനുഷ്കയുടെ പ്രണയത്തെപ്പറ്റിയും വിവാഹത്തെപ്പറ്റിയും നിരവധി വാർത്തകൾ പ്രചരിച്ചിരുന്നു. ബാഹുബലിയിലെ നായകൻ പ്രഭാസുമായി അനുഷ്ക പ്രണയത്തിലാണെന്നും വാർത്ത പുറത്തുവന്നിരുന്നു. എന്നാൽ ഇതു സംബന്ധിച്ച് ഔദ്യോഗിക സ്ഥിരീകരണം പുറത്തു വന്നില്ല. 2009ൽ ബില്ല എന്ന സിനിമയുടെ സെറ്റിലാണ് പ്രഭാസും അനുഷ്കയും ആദ്യമായി ഒന്നിക്കുന്നത്. പിന്നീട് മിർച്ചി, ബാഹുബലി രണ്ടു ഭാഗങ്ങളിലും ഇരുവരും ഒന്നിച്ച് അഭിനയിച്ചിരുന്നു. 2005ൽ സൂപ്പർ എന്ന തെലുങ്ക് ചിത്രത്തിലൂടെയാണ് അനുഷ്ക അഭിനയ രംഗത്തെത്തുന്നത്. 2015 ൽ പുറത്തിറങ്ങിയ രുദ്രമ ദേവി അഭിനേത്രി എന്ന നിലയിൽ അനുഷ്കയ്ക്കു വളരെ പെരുമ നേടിക്കൊടുത്തിരുന്നു. തെലുങ്കിലെ സൂപ്പർ നായികയായ താരം പിന്നീട് തമിഴ് സൂപ്പർ താരങ്ങളുടെ നായികയായും പ്രേക്ഷക ഇഷ്ടം നേടിയിരുന്നു.

ബാഹുബലിയ്ക്കു ശേഷം മലയാള താരങ്ങളായ ജയറാം, ഉണ്ണി മുകുന്ദൻ എന്നിവർക്കൊപ്പം അഭിനയിച്ച ബാഗ്മതിയും വിജയം നേടിയ ചിത്രമാണ്. സുരേഷ് ഗോപിയുടെ നായികയായി ഒറ്റക്കൊമ്പൻ എന്ന ചിത്രത്തിലൂടെ അനുഷ്ക മലയാളത്തിലേക്ക് എത്തുന്നതായി ഇടക്കാലത്ത് വാർത്ത പരന്നിരുന്നു. മാത്യൂസ് തോമസ് സംവിധാനം ചെയ്യുന്ന ചിത്രത്തിൽ സുരേഷ് ഗോപിയുടെ ഭാര്യ വേഷത്തിലാകും അനുഷ്ക പ്രത്യക്ഷപ്പെടുന്നത്. 40 കോടി ബജറ്റിലൊരുങ്ങുന്ന ചിത്രം ആക്ഷൻ ജോണറിലാണ് ഒരുക്കുന്നത്. വിദേശ രാജ്യങ്ങളിലടക്കം ഷൂട്ടിംഗ് നടക്കും. വീണ്ടും സിനിമയിൽ സജീവമാവുകയാണ് ബാഹുബലി നായിക. നാഗാർജുനയ്‌ക്കൊപ്പം 2005-ൽ പുറത്തിറങ്ങിയ സൂപ്പർ എന്ന തെലുങ്ക് ചിത്രത്തിലൂടെയാണ് അനുഷ്‌ക അഭിനയരംഗത്തിലേക്ക് കാലെടുത്ത് വെയ്‌ക്കുന്നത്. ഈ ചിത്രത്തിന്റെ വിജയത്തെ തുടർന്നായിരുന്നു നടി തെലുങ്ക് ചിത്രങ്ങളിൽ സജീവമായത്.