ഓട്ടോക്കാരനായി തുടങ്ങി മിമിക്രിയിലൂടെ തിളങ്ങി തെന്നിന്ത്യന്‍ സിനിമ ലോകത്ത് തന്റേതായ ഇരിപ്പിടം സ്വന്തമാക്കിയ നടനായിരുന്നു കലാഭവന്‍ മണി. താരത്തിന്റെ അപ്രതീക്ഷിത വിയോഗം ഈ ഏഴാം ചരമവാർഷിക ദിനത്തിലും പലർക്കും ഉള്‍ക്കൊള്ളാന്‍ സാധിച്ചിട്ടില്ല. സിനിമ രംഗത്ത് വെന്നിക്കൊടി പാറിച്ചപ്പോഴും തന്റെ ചുറ്റുമുള്ള സാധാരണക്കാരായ മനുഷ്യരെ ചേർത്തു നിർത്താനും അവർക്ക് വേണ്ട സഹായങ്ങള്‍ നല്‍കാനും കലാഭവന്‍ മണിയെന്ന മനുഷ്യന്‍ ഒരിക്കലും മറന്നിരുന്നില്ല. മരണത്തിന്റെ ഒരാഴ്ച മുൻപ് മണി സ്റ്റേജ് ഷോയുമായി ഒറ്റപ്പാലത്തിനടുത്ത് ശ്രീകൃഷ്ണപുരത്തെത്തി. പതിനായിരങ്ങളെ കണ്ട് മണി വേദി മറന്ന് പാടി, ആടി. ആവേശം കൊണ്ടു. പാടിയ നാടൻ പാട്ടുകളിൽ ചിലത് ഇപ്പോൾ കേൾക്കുമ്പോൾ അറം പറ്റിയ വരികൾ ആയി തോന്നുന്നു. അന്ന് മണിയുടെ അവസാനവേദി. 'ഞാൻ ഇനിയും വരും ,നിങ്ങളുടെ സ്‌നേഹം വേണം... ഒപ്പം സ്വതസിദ്ധമായ, പ്രശസ്തമായ ആ ചിരിയും. ' പക്ഷേ, മണി വാക്ക് തെറ്റിച്ചു. സ്‌നേഹവും, ഓർമ്മയും ,ചിരിയും ,നന്മയും മാത്രം ബാക്കിയാക്കി മണി യാത്ര പോയി. തിരിച്ചു വരാത്ത ലോകത്തേക്ക് കാത്തിരിക്കുന്നവർക്കും, സ്‌നേഹിക്കുന്നവർക്കും മുന്നിൽ മണി പിന്നെ ഒരിയ്ക്കലും വന്നില്ല. ഇനി മണി വരില്ലെന്ന സത്യത്തിന്, ദു:ഖത്തിന്, കണ്ണീരിന്, വിയോഗത്തിന്, വേദനയ്ക്ക് ഇന്ന് ഏഴ് വയസ് തികയുമ്പോൾ മണിയെ അറിഞ്ഞിട്ടുള്ളവർ അദ്ദേഹത്തെ മറക്കില്ല. അവർ ഇന്നും ആ മനുഷ്യനെ വേദനയോടെ സ്നേഹത്തോടെ ഓർക്കുകയാണ്.