ബ്ലാക്ക് ആന്റ് വൈറ്റ് സിനിമകളുടെ കാലഘട്ടത്തില്‍ മലയാളത്തില്‍ ഹിറ്റുകള്‍ സ‍ൃഷ്ടിച്ച നടി ഷീലയ്ക്ക് ഇന്നും ആരാധകർ ഏറെയാണ്. . ഷീലയ്ക്ക് ലഭിച്ചത് പോലെ അഭിനയപ്രധാന്യമുള്ള കഥാപാത്രങ്ങൾ മലയാളത്തിൽ മറ്റൊരു നടിക്കും ലഭിച്ചില്ല. ചെമ്മീൻ, കള്ളിച്ചെല്ലമ്മ, തുടങ്ങിയ സിനിമകൾ ഇതിന് ഉദാഹരണമാണ്. സിനിമകളിൽ ഇപ്പോൾ പഴയത് പോലെ സജീവമല്ല ഷീല. തനിക്ക് പ്രാധാന്യമുള്ള വേഷങ്ങളെ നടി ഇപ്പോഴും ചെയ്യുന്നുള്ളൂ. ഇപ്പോഴിതാ ഷീല നൽകിയ ഒരു അഭിമുഖത്തിലെ വാക്കുകളാണ് ശ്രദ്ധ നേടുന്നത്.

ഇനിയൊരു ജന്മം തനിക്ക് വേണ്ടെന്നാണ് ഷീല പറയുന്നത്. 'ആശകൾ തീർക്കാതെ പോവുന്നവരാണ് വീണ്ടും ജന്മമെടുക്കുന്നത്. എന്റെ എല്ലാ ആശകളും തീർന്നു. ദൈവം എനിക്ക് എല്ലാം തന്നു. തൃപ്തിയാണ്. ഞാൻ എന്റെ വിൽ എഴുതി വെച്ചിട്ടുണ്ട്. എനിക്കൊരു മകനേ ഉള്ളൂ. സ്വത്തിന്റെ കാര്യത്തിലൊന്നും വിൽപത്രം വേണ്ട കാര്യമില്ല. കാരണം ഒറ്റ മോനല്ലേ. പക്ഷെ അവസാന ആഗ്രഹം എഴുതിയിട്ടുണ്ട്'.കൂടാതെ 'ഞാൻ മരിച്ചാൽ എന്നെ ദഹിപ്പിക്കണം. ഞങ്ങളുടെ വിശ്വാസ പ്രകാരം കുഴിച്ചിടുകയേ ഉള്ളൂ. പക്ഷെ എന്നെ ദഹിപ്പിക്കണം. ആ ചാമ്പൽ കൊണ്ട് വന്ന് ഭാരതപ്പുഴയിൽ ഒഴുക്കണം. അതാണ് എന്റെ അവസാനത്തെ ആഗ്രഹം. ഒരുപക്ഷെ അത് ചെയ്തില്ലെങ്കിൽ ഇനിയൊരു ജൻമം വരും. ഞാൻ പറയും എടാ ചെയ്‌തേക്കണം കേട്ടോയെന്ന്'. ഷീല പറഞ്ഞു. 'സിനിമയിൽ അഭിനയിക്കുന്നത് എന്റെ ശ്വാസം പോലെയാണ്. കൊല്ലത്തിൽ ഒരു പടമോ രണ്ട് കൊല്ലത്തിൽ ഒരു പടം അഭിനയിച്ചാലോ മതി. ഏത് തൊഴിലായാലും നമ്മൾ റിട്ടേർഡ് ആവാൻ പാടില്ല. റിട്ടേർഡായാൽ നമ്മൾ ചത്തു. മരണം വരേക്കും എന്തെങ്കിലും ജോലി ചെയ്ത് കൊണ്ടിരിക്കണം. ഒരുപാട് പടത്തിൽ അഭിനയിച്ച് എനിക്ക് മതിയായെന്നും ഷീല പറഞ്ഞു.