നടന്‍ ഭീമന്‍ രഘു സംവിധാനം ചെയത ചാണ ഈ മാസം 17 ന് തിയറ്ററുകളില്‍ എത്തും. ചിത്രത്തിലെ നായക കഥാപാത്രത്തെ അവതരിപ്പിക്കുന്നതും ഭീമന്‍ രഘുവാണ്. താരത്തിന്റെ ആദ്യ സംവിധാന സംരംഭമാണിത്. പുതുമുഖം മീനാക്ഷി ചന്ദ്രനാണ് ചിത്രത്തിലെ നായിക. ഇപ്പോഴിതാ സെക്രട്ടറിയേറ്റിന് മുന്നിൽ ഒറ്റയാൾ സമരവുമായി എത്തിയിരിക്കുകയാണ് നടൻ ഭീമൻ രഘു. 'പാവപ്പെട്ടവർക്ക് നീതി ഉറപ്പാക്കുക' എന്ന ബാനറും കൈയിൽ പിടിച്ചാണ് അദ്ദേഹത്തിന്റെ സമരം. പൊലീസുകാർ നടനൊപ്പം സെൽഫിയെടുക്കുകയും ചെയ്യുന്നുണ്ട്. കൈയിൽ പഴയ ചാണയും കീറിയ സഞ്ചിയും പിടിച്ച്, കൈലി മുണ്ടുമിട്ടാണ് രഘുവെത്തിയത്.

എന്താണ് സംഭവമെന്ന് ആദ്യം ചുറ്റുമുള്ളവർക്കൊന്നും മനസിലായില്ല. തുടർന്ന് അദ്ദേഹം തന്നെ കാര്യം പറഞ്ഞു. പുതിയ ചിത്രമായ 'ചാണ'യുടെ പ്രമോഷനുവേണ്ടിയാണ് എത്തിയത്. 'നമ്മളുടെ കൂട്ടത്തിലുള്ള ഒരു ആർട്ടിസ്റ്റുകളും ഇതുപോലൊരു പ്രമോഷനുവേണ്ടി ഇറങ്ങില്ല. ജനങ്ങളുമായി ഇൻട്രാക്ട് ചെയ്യണം. എങ്കിൽ മാത്രമേ പടത്തിന് ഗുണം കിട്ടത്തുള്ളൂ. ഹീറോയിസത്തിലേക്ക് ഇതുവരെ വരാൻ സാധിച്ചിട്ടില്ല. ഇപ്പോൾ ഒരു ഹീറോയിസത്തിലേക്ക് വന്നപ്പോൾ എനിക്ക് തന്നെ തോന്നി ഞാൻ ചെയ്തിരിക്കുന്ന കഥാപാത്രം വളരെ രസകരമാണെന്ന്.

അതുകൊണ്ട് മാത്രമാണ് ഞാൻ ഈ കഥ തിരഞ്ഞെടുത്ത്, ഞാൻ തന്നെ സംവിധാനം ചെയ്ത് ജനങ്ങളുടെ ഇടയിലേക്കിറക്കാൻ തീരുമാനിച്ചത്. അത് വളരെ മനോഹരമായി ചെയ്തിട്ടുമുണ്ട്. മൂന്ന് അവാർഡുകൾ ഞങ്ങൾ വാങ്ങിച്ചു. പടം റിലീസ് ചെയ്യുന്നതിന് മുമ്പ് തന്നെ മൂന്ന് അവാർഡുകൾ കിട്ടിയതുതന്നെ വലിയ കാര്യം. ജനങ്ങളുമായി ഇൻട്രാക്ട് ചെയ്യണമെന്നത് എന്റെ വലിയ ആഗ്രഹമാണ്. അതുകാരണം ഞാൻ ഇറങ്ങിയതാണെന്നും ഭീമൻ രഘു പറഞ്ഞു. സംഭവമെന്തായാലും വൈറലായി ഇരിക്കുകയാണ്.