സിനിമയിലെ മികച്ച കഥാപാത്രങ്ങളുടെ പേരിലും സിനിമയ്ക്ക് പുറത്ത് വളരെ സാധാരണക്കാരനായ വ്യക്തി എന്ന നിലയിലും ഏറെ ആരാധകരുള്ള താരമാണ് ജയറാം. തെന്നിന്ത്യയിലെ വിവിധ ഭാഷകളിൽ പുതിയചിത്രങ്ങളുമായി തിരക്കിലാണ് താരം. ഒരു ചടങ്ങിനെത്തിയ ജയറാമിന്റെ കുസൃതി നിറഞ്ഞ പെരുമാറ്റത്തിന്റെ വീഡിയോ ആണ് സമൂഹമാധ്യമങ്ങളിലെ പുതിയ വൈറൽ കാഴ്ച. ആരാധകരോട് ചിരിച്ച്, സംസാരിച്ച് നടക്കുന്നതിനിടയിൽ 'ജയറാമേ' എന്നൊരു വിളി. താരത്തെ അങ്ങനെ വിളിച്ചതാകട്ടെ ഒരു കുട്ടിയും. ഇതുകേട്ട് ജയറാം തിരിഞ്ഞുനോക്കുന്നതും, അദ്ദേഹത്തിന്റെ പ്രതികരണത്തിന്റെയും വീഡിയോയാണ് സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്.

ഇത്രയും പേരുടെ മുന്നിൽവച്ച് പേര് വിളിക്കാൻ ഇവനിത്രയും ധൈര്യമോ എന്ന ഭാവത്തോടെ ആംഗ്യം കാണിച്ചുകൊണ്ടാണ് ജയറാം കുട്ടിയെ നോക്കുന്നത്. ജയറാമിന്റെ മുഖഭാവം വീഡിയോ കാണുന്നവരെ ചിരിപ്പിക്കുമെന്ന കാര്യത്തിൽ സംശയമില്ല. "ആൾക്കൂട്ടത്തിൽ നിന്നും ജയറാമേ....എന്ന കുട്ടിയുടെ വിളി!... എത്ര മനോഹരമായിട്ടാണ് ഈ മനുഷ്യൻ കൈകാര്യം ചെയ്തത്" എന്ന അടിക്കുറിപ്പോടെ "ജയറാം ലൈവ്" എന്ന ഫേസ്ബുക്ക് പേജിലാണ് വീഡിയോ പ്രത്യക്ഷപ്പെട്ടിരിക്കുന്നത്. കുട്ടിയോടുള്ള ജയറാമിന്റെ പ്രതികരണം സോഷ്യൽ മീഡിയ ഏറ്റെടുത്തിരിക്കുകയാണ്. തന്നെ പേരെടുത്തുവിളിച്ചുള്ള കുട്ടിയോട് എത്ര സുന്ദരമായാണ് ജയറാം പ്രതികരിച്ചത് എന്ന രീതിയിലാണ് വരുന്ന ഭൂരിഭാ​ഗം പ്രതികരണങ്ങളും. വളരെ സിമ്പിളായ താരമാണ് ജയറാമെന്നും കമന്റുകൾ വരുന്നുണ്ട്.