നടൻ കൊട്ട ശ്രീനിവാസ റാവു മരിച്ചതായി വ്യാജ വാർത്തകൾ. യൂട്യൂബ് ചാനലിലൂടെ വാർത്ത പ്രചരിച്ചതോടെ പ്രതികരിച്ച് നടൻ തന്നെ രംഗത്ത് എത്തുകയായിരുന്നു. താൻ തികച്ചും ആരോഗ്യവാനാണെന്നും യൂട്യൂബ് ചാനലുകളിലൂടെ തന്നെ കുറിച്ച് പ്രചരിക്കുന്ന വാർത്തകൾ വിശ്വസിക്കരുതെന്നും നടൻ വിഡിയോയിൽ പറയുന്നു. ' പൂർണ ആരോഗ്യവാനായിരിക്കുന്നുവെന്ന് അറിയിക്കാൻ വേണ്ടിയാണ് ഈ വിഡിയോ പങ്കുവെക്കുന്നത്. ഞാൻ മരിച്ചുവെന്ന തരത്തിൽ സോഷ്യൽ മീഡിയയിൽ വാർത്ത പ്രചരിപ്പിച്ചതായി അറിഞ്ഞു. ഉഗാദി ആഘോഷങ്ങൾക്കായി തയ്യാറെടുക്കുമ്പോഴാണ് വാർത്ത ശ്രദ്ധയിൽപ്പെട്ടത്. രാവിലെ മുതൽ ഫോൺകോളുകൾ വരികയാണ്. മരണവാർത്ത അറിഞ്ഞ് പൊലീസ് ഉദ്യോഗസ്ഥരും വസതിയിൽ എത്തിയിരുന്നു. ഒരു വാനിലാണ് അവർ എത്തിയത്. പത്തോളം പേർ ഉണ്ടായിരുന്നു. ആദരാഞ്ജലി അർപ്പിക്കാൻ എത്തുന്നവർക്ക് സൗകര്യവും സുരക്ഷയും ഒരുക്കാൻ വേണ്ടിയായിരുന്നു പൊലീസ് എത്തിയത്. ഇത്തരം വ്യാജ മരണവാർത്തകൾ ഒഴിവാക്കാൻ എന്തെങ്കിലും ചെയ്യണമെന്ന് പൊലീസുകാരോട് അഭ്യർഥിച്ചിരിക്കുകയാണ് നടൻ.