ഷാരൂഖ് ഖാന്‍ നായകനായ 'പഠാന്‍' ഇന്ത്യന്‍ ബോക്‌സ്ഓഫിസില്‍ ചരിത്രവിജയം നേടിയ സിനിമയാണ്. ആഗോള തലത്തില്‍ 1050കോടി രൂപയാണ് ചിത്രം നേടിയത്. 270കോടി ആയിരുന്നു സിനിമയുടെ ബജറ്റ് എന്നാണ് റിപ്പോര്‍ട്ട്. റിലീസ് ദിനത്തില്‍ തന്നെ 57 കോടി രൂപയാണ് 'പഠാന്‍' നേടിയത്. കരാര്‍ പ്രകാരം ഷാരൂഖ് ഖാന് 200കോടി ആണെന്നാണ് പുറത്തുവരുന്ന റിപ്പോര്‍ട്ട്. കണക്കുകള്‍ പ്രകാരം ഇന്ത്യയില്‍നിന്ന് നേടിയ ഗ്രോസ് കളക്ഷന്‍ 657.85 കോടിയും നെറ്റ് കളക്ഷന്‍ 543.22 കോടിയുമാണ്. വിദേശത്തുനിന്ന് 392.55 കോടി ഗ്രോസും. ആകെ 1050.40 കോടി.

തുടര്‍ച്ചയായ പരാജയങ്ങളെ തുടന്ന് സിനിമയില്‍ നിന്ന് ഇടവേള എടുത്ത ഷാരൂഖ് ഖാന്റെ തിരിച്ചുവരവായിരുന്നു 'പഠാന്‍'. ഇപ്പോഴിതാ ഷാരൂഖ് ഖാന് ലഭിച്ച പ്രതിഫലത്തിനെ കുറിച്ചുള്ള റിപ്പോര്‍ട്ടാണ് പുറത്തുവന്നിരിക്കുന്നത്. സിനിമ ആരംഭിക്കുന്നതിന് മുന്നോടിയായി ഷാരൂഖ് ഖാന്‍ പണം വാങ്ങിയിട്ടില്ലായിരുന്നു. പകരം സിനിമയുടെ ലാഭവിഹിതം പങ്കുവയ്ക്കുന്ന കരാറില്‍ നിര്‍മാതാവായ യഷ് രാജ് ഫിലിംസും നടനും ഒപ്പുവച്ചു. ഇതുപ്രകാരം നിര്‍മാതാവിന് ലഭിക്കുന്ന ലാഭത്തിന്റെ 60 ശതമാനം നടന് നല്‍കണം.

ഓവസീസ്, ഡിസ്ട്രിബ്യൂഷന്‍, സാറ്റലൈറ്റ്, ഓഡിയോ, ഒടിടി തുടങ്ങിയവയില്‍ എല്ലാം ചിത്രം കോടികള്‍ വാരി. മുഴുവന്‍ വരുമാനവും പരിഗണിക്കുമ്പോള്‍ 270 കോടി മുടക്കിയ യഷ് രാജ് ഫിലിംസിന് ലഭിച്ചത് 603 കോടിയാണ്. അതായത് 333 കോടി രൂപ ലാഭം.