നേരത്തെ ദൃശ്യം സിനിമയില്‍ നായകനായി ഉദ്ദേശിച്ചിരുന്നത് മമ്മൂട്ടിയെയായിരുന്നുവെന്ന് സംവിധായകന്‍ ജിത്തുജോസഫ് വെളിപ്പെടുത്തിയത് ഈ അടുത്ത കാലത്താണ്. മമ്മൂട്ടി ചിത്രത്തില്‍ താല്‍പര്യമില്ലെന്ന് അറിയിച്ചതിനാലാണ് താന്‍ മോഹന്‍ലാലിനെ സമീപിച്ചതും ദൃശ്യത്തില്‍ മോഹന്‍ലാല്‍ അഭിനയിക്കുന്നതും. ജിത്തു ജോസഫിനു പിന്നാലെ മറ്റൊരു വെളിപ്പെടുത്തലുമായി സംവിധായകന്‍ ബ്ലസിയും രംഗത്തെത്തി.
ബ്ലസി സംവിധാനം ചെയ്ത പ്രണയത്തില്‍ അഭിനയിക്കേണ്ടിയിരുന്നത് മമ്മൂട്ടിയായിരുന്നുവെന്നാണ് സംവിധായകന്‍ പറഞ്ഞത്. അച്യുതമേനോന്‍ എന്ന കഥാപാത്രമായി മമ്മൂട്ടിയെ മനസില്‍ കണ്ടാണ് ബ്ലസി തിരക്കഥ എഴുതിയത്. എന്നാല്‍ മമ്മുട്ടിയെപ്പോലെ ചിരപരിചിതനായ ഒരു താരത്തിന്റെ യൗവനകാലം ആര് അവതരിപ്പിക്കുമെന്ന് ആശയക്കുഴപ്പം തോന്നിയപ്പോള്‍ ആ പ്രോജക്റ്റ് ഉപേക്ഷിച്ചു. കാസ്റ്റിങ് പാളിയാല്‍ അത് സിനിമയെ കാര്യമായി ബാധിക്കുമെന്നായിരുന്നു തന്റെ ആശങ്കയെന്നും ബ്ലസി പറഞ്ഞു.
അതിനിടെ സ്വകാര്യ സന്ദര്‍ശനത്തിനായി ദുബായില്‍ എത്തിയപ്പോള്‍ കാസനോവയുടെ ചിത്രീകരണവുമായി ബന്ധപ്പെട്ട് മോഹന്‍ലാല്‍ അവിടെ ഉണ്ടായിരുന്നു. അദ്ദേഹവുമായുള്ള കൂടിക്കാഴ്ചയില്‍ ഉപേക്ഷിക്കപ്പെട്ട പ്രോജക്റ്റിനെക്കുറിച്ച് പറഞ്ഞു. കഥ കേട്ടതോടെ മാത്യൂസിനെ താന്‍ അവതരിപ്പിക്കട്ടെയെന്ന് മോഹന്‍ലാല്‍ ചോദിച്ചു. അങ്ങനെയാണ് ചിത്രത്തിലേക്ക് മോഹല്‍ലാല്‍ കടന്നുവരുന്നതെന്ന് ബ്ലസി പറഞ്ഞു.
അതുവരെ ആ കഥയില്‍ എവിടെയും മോഹന്‍ലാല്‍ ഉണ്ടായിരുന്നില്ല. മോഹന്‍ലാല്‍ സമ്മതം അറിയിച്ചതോടെ തന്റെ ചിന്തകളില്‍ മാത്യൂസിന്റെ വളര്‍ച്ചയ്ക്ക് വേഗമുണ്ടായി. അതോടെ തിരക്കഥയെഴുതി പൂര്‍ത്തിയാക്കാനുണ്ടായിരുന്ന അനിശ്ചിതത്വങ്ങളെല്ലാം മാറിക്കിട്ടിയെന്നും അഭിമുഖത്തില്‍ ബ്ലസി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha