ഭ്രമരത്തിന്റെ ചിത്രീകരണത്തിന്റെ ഒരു ഭാഗം നെല്ലിയാമ്പതിയിലായിരുന്നു. അവിടുത്തെ ഏറ്റവും വന്യമായ ഒരു പ്രദേശത്തായിരുന്നു ഷൂട്ടിംഗ്. ലൊക്കേഷന്‍ ഹണ്ടിന് വരുമ്പോള്‍ കാട്ടുപോത്തിനെയും ആനയെയുമൊക്കെ കണ്ടിരുന്നു. അതോടെ ക്യാമറാമാന്‍ ഉള്‍പ്പെടെയുള്ളവര്‍ തിരിഞ്ഞു. ഇവിടെ ഷൂട്ട് ചെയ്യാന്‍ ബുദ്ധിമുട്ടാണ്, ഏത് നിമിഷവും അപകടം ഉണ്ടാകും, കുറെക്കൂടി മാറി സമതലപ്രദേശത്തേയ്ക്ക് മാറി ഷൂട്ട് ചെയ്യാം എന്നൊക്കെ അവര്‍ പറഞ്ഞുകൊണ്ടിരുന്നു. നിങ്ങള്‍ ഷൂട്ട് ചെയ്‌തോളൂ ഞാനുണ്ടാകില്ല എന്നാണ് നിര്‍മ്മാതാവ് പോലും വിളിച്ചുപറഞ്ഞത്. ഈ എതിരഭിപ്രായങ്ങള്‍ സംവിധായകന്‍ ബ്ലസിയെ തളര്‍ത്തി.
എല്ലാവരും ഇടഞ്ഞുനില്‍ക്കുകയായിരുന്നു. ഒരു ഉച്ച തിരിഞ്ഞാണ് ലാലേട്ടന്‍ ലൊക്കേഷനിലെത്തിയത്. ബ്ലസി ലാലേട്ടനോട് കാര്യം പറഞ്ഞു.
മോനെ ഇങ്ങനെയുള്ള സ്ഥലങ്ങളിലല്ലേ ഷൂട്ട് ചെയ്യേണ്ടത്. അപ്പോഴല്ലേ ആ സിനിമയ്ക്കും അതിന്റെ ഡെപ്ത്തുണ്ടാകൂ... സംവിധായകനെതിരെ ഉയരേണ്ടിയിരുന്ന കരുത്തുള്ള ശബ്ദം ലാലിന്റേതായിരുന്നു. പക്ഷേ അദ്ദേഹം വളരെ പോസിറ്റീവായ ഒരു നിലപാടെടുത്തതോടെ മറ്റെല്ലാ എതിരഭിപ്രായങ്ങളും കെട്ടടങ്ങി. ബ്ലസി വാശിക്കാരനാണ്. വാശി സിനിമയിലാണ്, ആത്മാര്‍ത്ഥതയിലാണ്. അതിനെ പൂര്‍ണ്ണമായും മനസ്സിലാക്കിയിട്ടുള്ള നടനാണ് ലാല്‍.
ഒരു പഴഞ്ചന്‍ ജീപ്പിലാണ് മോഹന്‍ലാല്‍ അവിടുത്തെ മലമടക്കുകളിലൂടെയെല്ലാം വണ്ടിയോടിച്ച് പോയത്. പ്രദേശവാസികള്‍ പോലും ഡ്രൈവ് ചെയ്യാന്‍ മടിച്ചു മാറിനിന്ന സ്ഥലങ്ങളാണ് അതെന്ന് ഓര്‍ക്കണം. ചില സമയങ്ങളില്‍ ഷോട്ട് കഴിഞ്ഞ് ലാലിനൊപ്പം ആ ജീപ്പില്‍ കയറേണ്ട സന്ദര്‍ഭങ്ങള്‍ പലര്‍ക്കുമുണ്ടായിട്ടുണ്ട്. ആ സമയത്ത് ഭയന്ന് വിറങ്ങലിച്ചു പോയിട്ടുണ്ട്. ജീപ്പ് ഓടിക്കുന്നത് കണ്ടാല്‍, ലോറി ഓടിക്കുന്നത് കണ്ടാല്‍ വര്‍ഷങ്ങളായി ഈ വാഹനങ്ങള്‍ ഓടിച്ചുനടക്കുന്ന ഒരാളാണെന്നേ നമുക്ക് തോന്നൂ. ലാലിന്റെ ഡ്രൈവിംഗ് സ്‌കില്‍ കണ്ട ചിത്രം കൂടിയാണിത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha