തമിഴ് സിനിമാ നടനും നിര്‍മാതാവുമായ വിശാലിന് മദ്രാസ് ഹൈക്കോടതിയില്‍ നിന്ന് തിരിച്ചടി. 2016ല്‍ 'മരുതു' എന്ന ചിത്രത്തിന്റെ നിര്‍മാണത്തിനായി ഗോപുരം ഫിലിംസിന്റെ അന്‍പു ചെഴിയനില്‍ നിന്ന് 21.29 കോടി രൂപ വായ്പയെടുത്തതുമായി ബന്ധപ്പെട്ട കേസില്‍, 30% പലിശയോടു കൂടി 30.05 കോടി രൂപ പ്രമുഖ നിര്‍മാണ കമ്പനിയായ ലൈക്ക പ്രൊഡക്ഷന്‍സിന് തിരികെ നല്‍കണമെന്ന് കോടതി ഉത്തരവിട്ടു.

2019ല്‍ വിശാല്‍ ലൈക്ക പ്രൊഡക്ഷന്‍സുമായി ഒരു കരാര്‍ ഒപ്പിട്ടിരുന്നു. അതനുസരിച്ച് അന്‍പു ചെഴിയന്റെ വായ്പ ലൈക്ക ഏറ്റെടുത്തു. വിശാലിന്റെ നിര്‍മാണ കമ്പനിയായ വിശാല്‍ ഫിലിം ഫാക്ടറിയുടെ ഭാവി ചിത്രങ്ങളുടെ അവകാശങ്ങള്‍ വായ്പ തീര്‍ക്കുന്നതുവരെ ലൈക്കയ്ക്ക് നല്‍കാമെന്ന് ധാരണയായിരുന്നു ഇത്. എന്നാല്‍, വിശാല്‍ ഈ കരാര്‍ ലംഘിച്ച് 'വീരമേ വാഗൈ സൂടും' എന്ന ചിത്രത്തിന്റെ അവകാശങ്ങള്‍ മറ്റൊരു കമ്പനിക്ക് വിറ്റതായി ലൈക്ക ആരോപിച്ചു.

ഇതിനെ തുടര്‍ന്നാണ് 2021ല്‍ ലൈക്ക പ്രൊഡക്ഷന്‍സ് മദ്രാസ് ഹൈക്കോടതിയെ സമീപിച്ചത്. കോടതി നടപടികളുടെ തുടക്കത്തില്‍, വിശാലിനോട് 15 കോടി രൂപ സെക്യൂരിറ്റിയായി നിക്ഷേപിക്കാന്‍ കോടതി നിര്‍ദേശിച്ചിരുന്നു. എന്നാല്‍, വിശാല്‍ തന്റെ ആസ്തി വിവരങ്ങള്‍ സമര്‍പ്പിക്കുന്നതിലും കോടതി നിര്‍ദേശങ്ങള്‍ പാലിക്കുന്നതിലും വീഴ്ച വരുത്തി.

കൂടാതെ, തന്റെ കൈയ്യില്‍ പണമില്ലെന്ന് വിശാല്‍ വാദിച്ചു. അതേ ദിവസം മറ്റൊരു നിര്‍മാണ കമ്പനിയില്‍ നിന്ന് 1 കോടി രൂപ സ്വീകരിച്ചതായി കോടതിയുടെ ശ്രദ്ധയില്‍പ്പെട്ടു. തുടര്‍ന്ന് വിശാലിന്റെ നിസഹരണത്തെ കോടതി ശക്തമായി വിമര്‍ശിച്ചു. അതേ സമയം വിശാല്‍, 30% പലിശനിരക്ക് അന്യായമാണെന്നും തമിഴ്‌നാട് പലിശ നിരോധന നിയമം 2003ന്റെ ലംഘനമാണെന്നും വാദിച്ചെങ്കിലും, കോടതി ഈ വാദം തള്ളി.

വന്‍തുകകള്‍ വായ്പ എടുക്കുന്നവര്‍ക്ക് ഈ നിയമം ബാധകമല്ലെന്നും വിശാല്‍ 30% പലിശ നല്‍കാന്‍ കരാറില്‍ ഒപ്പിട്ടതിനാല്‍ അത് നിയമപരമായി ബാധ്യതയുള്ളതാണെന്നും കോടതി വ്യക്തമാക്കി. നടന്റെ കേസിലെ പെരുമാറ്റം 'ഒഴിഞ്ഞുമാറുന്നതും' 'നീതിയോട് അനുസരണക്കേട് കാണിക്കുന്നതും' ആണെന്ന് വിമര്‍ശിച്ച ജസ്റ്റിസ് പി.ടി. ആശ, വിശാല്‍ നല്‍കിയ 2.6 കോടി രൂപ അന്തിമ തുകയില്‍ ക്രമീകരിക്കുമെന്നും ലൈക്കയുടെ കോടതി ചെലവുകള്‍ വഹിക്കാനും വിശാലിനോട് നിര്‍ദേശിച്ചു. ഈ വിധി തമിഴ് സിനിമാ വ്യവസായത്തില്‍ വലിയ ചര്‍ച്ചയ്ക്ക് വഴിവെച്ചിട്ടുണ്ട്. വിശാല്‍ നടന്മാരുടെ സംഘടനയായ നടികര്‍ സംഘം ജനറല്‍ സെക്രട്ടറിയായും പ്രവര്‍ത്തിക്കുന്നതിനാലാണ് ഇത്.