ഇന്നലെയും അതിന്റെ തലേന്നുമൊക്കെ മമ്മൂട്ടി വിളിച്ചു. ഇടയ്ക്ക് ഒരാഴ്ച കൂടുമ്പോഴാണ് വിളിക്കുക. അപ്പോഴൊന്നും രോഗത്തെക്കുറിച്ച് പറയില്ല. ആദ്യഘട്ടത്തില്‍ ഭക്ഷണത്തിന് ടേസ്റ്റില്ല, നടക്കാന്‍ ബുദ്ധിമുട്ടുണ്ടായിരുന്നു. അതൊന്നും അത്ര പ്രധാന്യമുള്ള കാര്യമല്ലെന്ന മട്ടിലാണ് മമ്മൂട്ടി സംസാരിച്ചിരുന്നത്. ബാക്കി പല കാര്യങ്ങളുമാണ് മമ്മൂട്ടി സംസാരിച്ചുകൊണ്ടിരുന്നത്. ചിലപ്പോള്‍ പൊളിറ്റിക്‌സായിരിക്കും, ചിലപ്പോള്‍ കൃഷിയായിരിക്കും. എനിക്ക് ഇതിനെപ്പറ്റിയിട്ടൊന്നും മൂപ്പരുടെ അത്ര അറിവില്ല.

എന്തെങ്കിലും കാര്യത്തിന് അങ്ങനെയാണെന്ന് തോന്നുന്നില്ലെന്ന് പറഞ്ഞാല്‍ നിനക്കെന്താണ് തോന്നുന്നതെന്ന് ചോദിക്കും. അപ്പോള്‍ നമ്മള്‍ കുടുങ്ങും. ഇങ്ങനത്തെ വര്‍ത്തമാനങ്ങളൊക്കെയാണ് ഉണ്ടാകുക. അല്ലാതെ ബൗദ്ധിക ചര്‍ച്ചകളൊന്നുമുണ്ടാകില്ല. പക്ഷേ കുറേ നേരം സംസാരിച്ചാല്‍ നിരവധി വിഷയങ്ങളുണ്ടാകും. എന്നാല്‍ അതൊന്നും ആധികാരികമായിരിക്കില്ല കേട്ടോ. മൂപ്പര്‍ക്ക് ഇതൊക്കെ പറയാന്‍ ഒരാളെക്കിട്ടണം. ഇന്നലെ ക്യാമറയെക്കുറിച്ച് പഠിപ്പിക്കലായിരുന്നു.

കുറേനാള്‍ മുമ്പ് വിളിച്ചപ്പോള്‍ ഇപ്പോള്‍ ഭക്ഷണത്തിന് ടേസ്‌റ്റൊക്കെ ഉണ്ടെന്ന് പറഞ്ഞിരുന്നു. തെറാപ്പിയുടെ ആദ്യ കാലത്ത് ഭക്ഷണത്തിന് ടേസ്റ്റ് ഉണ്ടായിരുന്നില്ല. സ്‌മെല്‍ പോയിട്ടുണ്ടായിരുന്നു. അതൊക്കെ റിക്കവര്‍ ചെയ്തു. രോഗിയുടെ എനര്‍ജിയില്ലായ്മയൊന്നും ഒരിക്കലും ഉണ്ടായിട്ടില്ല.' വി കെ ശ്രീരാമന്‍ പറഞ്ഞു.