ഡല്‍ഹി ജന്തര്‍മന്ദറില്‍ നടന്ന യുവജന സമരങ്ങളെ പിന്തുണച്ച് താന്‍ പങ്കുവച്ച നിലപാടില്‍ ഉറച്ചുനില്‍ക്കുന്നതായി നടിയും മോഹന്‍ലാലിന്റെ മകളുമായ വിസ്മയ മോഹന്‍ലാല്‍. ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് തന്റെ നിലപാടുകളെക്കുറിച്ച് വിസ്മയ വ്യക്തമാക്കിയത്. നാളെ ഏത് പാര്‍ട്ടി അധികാരത്തില്‍ വന്നാലും ഭരണകൂടത്തിന്റെ ഇത്തരം നടപടികളോട് തന്റെ നിലപാട് ഇതുതന്നെയായിരിക്കുമെന്ന് വിസ്മയ വ്യക്തമാക്കി. ബലപ്രയോഗത്തിന് പകരം സംവാദങ്ങളാണ് ഉണ്ടാകേണ്ടതെന്നും, മനുഷ്യത്വത്തിന് മേലെയാകരുത് രാഷ്ട്രീയമെന്നും നടി പറയുന്നു.

കോക്രോച്ച് ജനത പാര്‍ട്ടിയുടെ നേതൃത്വത്തില്‍ നടന്ന വിദ്യാര്‍ഥി പ്രതിഷേധത്തിന് നേരെ ഉണ്ടായ പൊലീസ് നടപടിയെ അപലപിച്ച് വിസ്മയ ഇന്‍സ്റ്റഗ്രാമില്‍ പങ്കുവച്ച പോസ്റ്റ് വലിയ വിവാദങ്ങള്‍ക്ക് വഴിവച്ചിരുന്നു. സംവാദങ്ങള്‍ക്ക് പകരം ശബ്ദമുയര്‍ത്തുന്നവരെ അടിച്ചമര്‍ത്തുന്നതിനെതിരെയും, പൗരന്മാരോട് ഭരണകൂടം ഇങ്ങനെയാണോ പെരുമാറേണ്ടത് എന്നുമായിരുന്നു വിസ്മയ പോസ്റ്റിലൂടെ ചോദിച്ചത്. എന്നാല്‍ താരത്തിെന്റെ പോസ്റ്റിന് പിന്നാലെ കേന്ദ്രസര്‍ക്കാരിനെ അനുകൂലിക്കുന്നവരില്‍ നിന്ന് വലിയ രീതിയിലുള്ള സൈബര്‍ ആക്രമണങ്ങളാണ് നേരിടേണ്ടി വന്നത്.

അതേസമയം വിയറ്റ്‌നാമില്‍ ജനിച്ചുവളര്‍ന്ന വിസ്മയയ്ക്ക് രാഷ്ട്രീയത്തെക്കുറിച്ച് അറിവില്ലെന്നായിരുന്നു സംവിധായകന്‍ മേജര്‍ രവിയുടെ പ്രതികരണം. സമരത്തിന് പിന്നിലെ ഗൂഢാലോചന അറിയാതെ, പൊലീസ് മര്‍ദനം കണ്ടപ്പോള്‍ മനുഷ്യത്വത്തിന്റെ പുറത്ത് മാത്രം പ്രതികരിച്ചതാണെന്നും അദ്ദേഹം വ്യക്തമാക്കിയിരുന്നു. എന്നാല്‍ ഭരണപക്ഷത്തെ അനുകൂലിക്കുന്ന മേജര്‍ രവിയുടെ പ്രതികരണത്തെയും പൂര്‍ണമായും തള്ളുന്നതായിരുന്നു വിസ്മയയുടെ നിലപാട്.