മമ്മൂട്ടി-ജോഷി-ഡെന്നിസ് ജോസഫ് ടീമിന്റെ ഏറ്റവും വലിയ സൂപ്പര്‍ഹിറ്റുകളിലൊന്നായ ന്യൂഡല്‍ഹി എന്ന ചിത്രത്തിന്റെ ക്‌ളൈമാക്‌സ് കൊണ്ടുവന്നത് ടൈംസ് ഓഫ് ഇന്ത്യയിലെ ഒരു വാര്‍ത്തയാണ്. തിരക്കഥാകൃത്ത് ഡെന്നിസ് ജോസഫ് തന്നെയാണ് ഇക്കാര്യം വെളിപ്പെടുത്തിയത്. ന്യൂഡല്‍ഹിക്ക് മുന്‍പ് ഇറങ്ങിയ മമ്മൂട്ടി-ജോഷി-ഡെന്നീസ് ജോസഫ് ചിത്രങ്ങളെല്ലാം പരാജയമായിരുന്നു. പ്രത്യേകിച്ച് മമ്മൂട്ടിയുടെ. മമ്മൂട്ടി ചിത്രമാണെങ്കില്‍ തിയേറ്ററില്‍ ആള് കയറാത്ത കാലം. 

പക്ഷെ, മമ്മൂട്ടി എന്ന നടനില്‍ വിശ്വാസം ഉള്ളത് കൊണ്ടാണ് ജോഷിയും ഡെന്നിസ് ജോസഫും അദ്ദേഹത്തെ വീണ്ടും നായകനാക്കിയത്. ലൊക്കേഷനില്‍ ഇരുന്നാണ് തിരക്കഥ എഴുതിയത്. പക്ഷെ, ക്‌ളൈമാക്‌സ് എത്ര ആലോചിച്ചിട്ടും കിട്ടിയില്ല. ചിലതൊക്കെ എഴുതിയെങ്കിലും അതൊന്നും ചിത്രത്തിന്റെ കഥാതന്തുവിന് പറ്റിയതല്ലായിരുന്നു. ഷൂട്ടിംഗിനായി ഡല്‍ഹി കേരളഹൗസിലായിരുന്നു അന്നെല്ലാവരും താമസിച്ചിരുന്നത്. ഒരു ദിവസം രാവിലെ ടൈംസ് ഓഫ് ഇന്ത്യയുടെ ഒന്നാം പേജിലൊരു വാര്‍ത്ത വന്നു. പ്രസിലെ അച്ചടി സാധനങ്ങള്‍ ഉപയോഗിക്കുമ്പോള്‍ എടുക്കേണ്ട സേഫ്റ്റി മെഷേഴ്‌സിനെ കുറിച്ചുള്ള പുസ്തകം അച്ചടിക്കുന്നതിനിടെ ഒരാളുടെ കൈ മെഷീനില്‍ കുരുങ്ങി അറ്റുപോയി. മഷിക്ക് പകരം ചോരയിലാണ് പുസ്തകത്തിന്റെ പല താളുകളും അച്ചടിച്ച് വന്നത്.

ആ വാര്‍ത്ത വായിച്ചതും ഡെന്നീസ് ജോസഫിന് സന്തോഷമായി. ചിത്രത്തിന് പറ്റിയ ക്‌ളൈമാക്‌സ് ഇത് തന്നെ. വില്ലന്റെ മരണ വാര്‍ത്ത അയാളുടെ തന്നെ ചോരയില്‍ അച്ചടിച്ച് വരുക. അതിനപ്പുറം ഒരു ക്‌ളൈമാക്‌സ് ഇല്ല. ഈ സംഭവം വെച്ച് സീന്‍ എഴുതി. ജോഷിയെ കാണിച്ചു. അദ്ദേഹത്തിനും സന്തോഷമായി. മമ്മൂട്ടിയുടെ രണ്ടാം വരവിന്റെ തുടക്കമായിരുന്നു ന്യൂഡല്‍ഹി. തമിഴ്‌നാട്ടില്‍ ചിത്രം 100 ദിവസം ഓടി. ഹിന്ദി, കന്നട , തെലുങ്ക് ഭാഷകളില്‍ റീമേക്കും ഉണ്ടായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha