ഒരു സമയത്ത് എനിക്ക് വന്നിരുന്നതൊക്കെ ബോള്‍ഡ് വേഷങ്ങളായിരുന്നു. അത്തരം വേഷങ്ങള്‍ മടുത്തിരിക്കെയാണ് സോള്‍ട്ട് ആന്റ് പെപ്പറിലെ ലൈറ്റായ കഥാപാത്രത്തെ അവതരിപ്പിക്കാനുള്ള അവസരം ലഭിക്കുന്നത്.
നിരവധി ചിത്രങ്ങളുടെ ഓഫറുകള്‍ വരുന്നതില്‍ എനിക്ക് സന്തോഷമുണ്ട്. മലയാളത്തില്‍ ബോള്‍ഡ് കഥാപാത്രങ്ങള്‍ ചെയ്തുമടുത്തെന്നും രതിനിര്‍വേദത്തേക്കാളൊക്കെ കാമാതുരമായ ഒരു വേഷം ചെയ്യാന്‍ തനിക്ക് ആഗ്രഹമുണ്ടെന്ന് നടി ശ്വേതാ മേനോന്‍ പറയുന്നു.

എന്നാല്‍ കോട്ടണ്‍സാരിയിലുള്ള ശക്തമായ സ്ത്രീ കഥാപാത്രങ്ങളെ വീണ്ടും വീണ്ടും അവതരിപ്പിക്കാന്‍ എനിക്ക് താത്പര്യമില്ല.
അതുകൊണ്ട് തന്നെയാണ് 'നേവല്‍ എന്ന ജുവല്‍' എന്ന സിനിമയില്‍ തികച്ചും വ്യത്യസ്തമാര്‍ന്ന ഒരു കഥാപാത്രത്തെ സ്വീകരിക്കാന്‍ താന്‍ തയ്യാറായതും. ശ്വേതാമേനോന്‍ പറയുന്നു. രഞ്ജിലാല്‍ ദാമോദരന്റെ നേവല്‍ എന്ന ജുവല്‍ എന്ന ചിത്രത്തില്‍ ഒരു പുരുഷകഥാപാത്രമായാണ് ശ്വേത എത്തുന്നത്.

വളരെ ഫാസിനേറ്റിങ് ആയിട്ടുള്ള കഥയാണ് ചിത്രത്തിലേത്. കേരളത്തില്‍ ജനിച്ചുവളരുന്ന ഒരു പെണ്‍കുട്ടി. അവള്‍ക്ക് 12 ാമത്തെ വയസില്‍ 65 കാരനായ ഒരു അറബിയെ വിവാഹം ചെയ്യേണ്ടി വരുന്നു. 14 വയസാകുമ്പോഴേക്കും ഒരു കുഞ്ഞിന്റെ അമ്മയാകേണ്ടി വരുന്നു. പിന്നീട് കുഞ്ഞിന്റേയും അമ്മയുടേയും ഒന്നിച്ചുള്ള വളര്‍ച്ച. ഏതാനും വര്‍ഷം കഴിയുന്നതോടെ പെണ്‍കുട്ടിയുടെ ഭര്‍ത്താവ് മരണപ്പെടുന്നതും തുടര്‍ന്നുള്ള സംഭവങ്ങളുമാണ് ചിത്രം പറയുന്നത്.

അച്ഛനില്ലാത്ത ഒരു കുഞ്ഞിനെ സമൂഹം നോക്കിക്കാണുന്ന അവസ്ഥ മനസിലാകുന്നതോടെ കുഞ്ഞിന്റെ അച്ഛനായി ഈ പെണ്‍കുട്ടി മാറുന്നതാണ് ചിത്രത്തിന്റെ ഇതിവൃത്തം. കഥാപാത്രത്തിന്റെ പൂര്‍ണതയ്ക്കായി തന്റെ കഴിവിന്റെ പരമാവധി ഈചിത്രത്തിന് വേണ്ടി സമര്‍പ്പിച്ചിട്ടുണ്ടെന്നും ശ്വേതാ മേനോന്‍ പറയുന്നു.