മികച്ച അഭിപ്രായം നേടി തീയറ്ററുകളില്‍ വിജയ പ്രദര്‍ശനം തുടരുന്ന അങ്കമാലി ഡയറീസിന്റെ ഷോ ഹോള്‍ഡ് ചെയ്യാന്‍ ശ്രമിക്കുന്നുവെന്ന ആരോപണമുന്നയിച്ച് സാന്ദ്രാ തോമസ്. ഷോ കാണാന്‍ എത്തിയ ആളുകളെ മണിക്കൂറുകളോളം പുറത്തു നിര്‍ത്തി പിന്നീട് സിനിമ കാണാന്‍ ആളില്ലെന്ന് ആരോപിച്ച് പുതിയ റിലീസ് നടത്താനാണ് ഇത്തരം നീക്കമെന്ന് ആരോപണം ഉണ്ടായിരുന്നു. നല്ല രീതിയില്‍ പ്രദര്‍ശനം തുടരുന്ന ചിത്രം മാറ്റാന്‍ ശ്രമിക്കുന്നത് സിനിമയെ കൊല്ലുന്നതിന് തുല്യമാണെന്ന് സാന്ദ്ര പറഞ്ഞു.

സാന്ദ്രാ തോമസിന്റെ ഫേസ്ബുക്ക് പോസ്റ്റിന്റെ പൂര്‍ണ രൂപം

മലയാള സിനിമയില്‍ പുതിയ ശൈലീ മാറ്റത്തിനൊപ്പം നിന്ന്, 86 പുതുമുഖങ്ങളെക്കൊണ്ട് തിയറ്ററുകള്‍ പിടിച്ചടക്കിയ അങ്കമാലീ ഡയറീസിനെ തിയറ്ററുകളില്‍ നിന്ന് പടിയടച്ച് പുറത്താക്കുന്നത് സിനിമയെ കൊലപ്പെടുത്തുന്നതിന് തുല്യമാണ് . ഇങ്ങനെ ചെയ്യുന്നവര്‍ ഓര്‍ക്കേണ്ട ഒന്നുണ്ട് . ആവര്‍ത്തന വിരസതയും അതിമാനുഷ കഥകളും കണ്ട് മടുത്ത പ്രേക്ഷകര്‍ തിരിഞ്ഞു നോക്കാത്തത് കൊണ്ട് തിയറ്ററുകള്‍ പൂട്ടേണ്ടി വന്ന ഒരു സമീപകാലം താണ്ടി വന്നതാണ് മലയാള സിനിമ . പുതിയ ആശയങ്ങളുമായി എത്തിയവര്‍ക്ക് ധൈര്യവും പണവും നല്‍കാന്‍ നിര്‍മാതാക്കളും ഉണ്ടായതു കൊണ്ടാണ് സിനിമ വസന്തകാലത്തിലേക്ക് തിരിച്ചെത്തിയത് . അവരുടെ നെഞ്ചില്‍ കത്തി കയറ്റി കൊടും ലാഭം മാത്രം നോക്കി പടം കളിക്കുക എന്ന മര്യാദയില്ലായ്മയാണ് ചില തിയറ്ററുടമകള്‍ ചെയ്യുന്നത്. 

കുടുംബ പ്രേക്ഷകരടക്കം ഏറ്റെടുത്ത് നിറഞ്ഞ സദസില്‍ ഓടുന്ന അങ്കമാലി ഡയറീസ് ഹോള്‍ഡ് ഓവര്‍ ചെയ്യാനുള്ള ശ്രമം തല്ലുകൊള്ളിത്തരം തന്നെയാണ് . പുതിയ സിനിമകളുടെ ആദ്യ ദിന കളക്ഷന്‍ മാത്രം ലക്ഷ്യം വച്ചുള്ള ഈ ചൂതാട്ടം നല്ല സിനിമയുടെ നിര്‍മാതാവിനെ ചതിച്ച് തോല്‍പ്പിക്കലാണ് . നല്ല രീതിയില്‍ ഓടുന്ന സിനിമ ഹോള്‍ഡ് ഓവര്‍ ചെയ്തല്ല പുതിയ സിനിമയ്ക്ക് കളമുണ്ടാക്കേണ്ടത് .

ഒന്നുകൂടി :
തിയറ്ററുടമകള്‍ ഒന്നു മനസിലാക്കണം , തിയറ്ററിന് മുന്നില്‍ പ്രേക്ഷകര്‍ കാത്തു നില്‍ക്കുന്നത് നിങ്ങള്‍ക്കിഷ്ടമുള്ള സിനിമ കാണാനല്ല . അവര്‍ക്കിഷ്ടമുള്ള സിനിമ കാണാനാണ് .