തെലുങ്ക് സിനിമാതാരം ഉദയ് കിരണിന്റെ ആത്മഹത്യ വീണ്ടും വാര്‍ത്തകളില്‍ നിറയുന്നു. തെലുങ്ക് സൂപ്പര്‍ താരം ചിരഞ്ജീവിയുടെ മകളുമായി വിവാഹം ഉറപ്പിച്ചിരുന്ന ഉദയ് കിരണ്‍ 2014ലാണ് ജീവനൊടുക്കിയത്. 2014 ജനുവരി 5ന് ഹൈദരാബാദിലെ വീട്ടില്‍ തൂങ്ങി മരിക്കുകയായിരുന്നു. ചിരഞ്ജീവിയുടെ മകള്‍ സുസ്മിതയുമായി വിവാഹം ഉറപ്പിച്ചിരുന്ന താരമാണ് ഉദയ് കിരണ്‍. എന്നാല്‍ പിന്നീട് ആ വിവാഹം നടന്നില്ല.

വിവാഹം മുടങ്ങിയതിനെ മറ്റൊരു യുവതിയുമായി ഉദയ് കിരണ്‍ വിവാഹം കഴിച്ചിരുന്നു. എന്നാല്‍ ഉദയ് കിരണിന് പിന്നീട് സിനിമകളില്‍ അവസരം കുറയുകയും മാനസിക സമ്മര്‍ദ്ദത്തെ തുടര്‍ന്ന് ജീവനൊടുക്കുകയുമായിരുന്നു. കിരണിന് സിനിമയില്‍ അവസരങ്ങള്‍ കുറഞ്ഞത് ചിരഞ്ജീവിയുടെ ഇടപെടലിനെ തുടര്‍ന്നാണെന്ന് ആരോപണം ഉയര്‍ന്നിരുന്നു. എന്നാല്‍ ചിരഞ്ജീവിക്കെതിരായ ആരോപണങ്ങള്‍ നിഷേധിച്ച് ഉദയ് കിരണിന്റെ സഹോദരി ശ്രീദേവി രംഗത്ത് വന്നു.

കിരണിന്റെ മരണത്തിന്റെ ഉത്തരവാദി ചിരഞ്ജീവിയല്ലെന്ന് ശ്രീദേവി പറഞ്ഞു. നേരത്തെ മറ്റൊരു പെണ്‍കുട്ടിയുമായി ഉദയ് പ്രണയത്തിലായിരുന്നു. ആ ബന്ധം തകര്‍ന്നപ്പോള്‍ ഉദയ് മാനസികമായി തകര്‍ന്നു. ആ വിഷമത്തില്‍ നിന്നും അവനെ കൈപിടിച്ചു കൊണ്ടു വന്നത് ചിരഞ്ജീവി ആയിരുന്നു. മകളുമായുള്ള വിവാഹത്തിന് മുന്‍കൈ എടുത്തതും അദ്ദേഹമായിരുന്നു. എന്നാല്‍ അത് നടന്നില്ല. ചിരഞ്ജീവിക്ക് അവനെ വലിയ ഇഷ്ടമായിരുന്നു. അദ്ദേഹം ഒരിക്കലും അവനെ ഉപദ്രവിക്കില്ലെന്നും ശ്രീദേവി പറഞ്ഞു.

തെലുഗു വണ്ണിന് നല്‍കിയ അഭിമുഖത്തിലാണ് ശ്രീദേവി ഇക്കാര്യം പറഞ്ഞത്. സുസ്മിതയുമായുള്ള വിവാഹം വേണ്ടന്ന് വച്ചത് ഇരുവരും തമ്മിലുള്ള അഭിപ്രായഭിന്നതകള്‍ കൊണ്ടാണെന്നും ശ്രീദേവി പറഞ്ഞു. തെലുഗിലെ യുവ സൂപ്പര്‍ താര നിരയിലേക്ക് ഉയരുന്നതിനിടെയാണ് അപ്രതീക്ഷിതമായി ഉദയ് കിരണ്‍ ജീവനൊടുക്കിയത്.