മലയാളത്തില്‍ അവസരം കുറഞ്ഞതിന് പിന്നില്‍ ചിലരുടെ ശ്രമമുണ്ടെന്ന വെളിപ്പെടുത്തലിനെക്കുറിച്ച് ഭാമ. തന്നെ സിനിമയില്‍ ഉള്‍പ്പെടുത്തിയാല്‍ വലിയ തലവേദനയാകുമെന്ന പ്രചരണം നടത്തി തുടര്‍ച്ചയായി അവസരം മുടക്കാന്‍ ശ്രമിക്കുന്ന ആളെക്കുറിച്ച് ഭാമ വനിതാ വാരികയുടെ അഭിമുഖത്തിലാണ് വെളിപ്പെടുത്തിയിരുന്നത്. ഇത് ആരെന്ന് നടി പറഞ്ഞിരുന്നില്ല. നടന്‍ ദിലീപിനെക്കുറിച്ചാണ് ഭാമയുടെ പ്രതികരണം എന്ന രീതിയില്‍ ചില മാധ്യങ്ങളില്‍ വാര്‍ത്ത വന്നതിനെത്തുടര്‍ന്നാണ് വിശദീകരണവുമായി താരം എത്തിയത്.

എല്ലാവര്‍ക്കും നമസ്‌കാരം,

ഇപ്പോള്‍ പ്രചരിച്ചുകൊണ്ടിരിക്കുന്ന ഒരു വാര്‍ത്തയുടെ സത്യാവസ്ഥ നിങ്ങളെ ബോധ്യപ്പെടുത്തുവാന്‍ വേണ്ടി മാത്രമാണ് ഇപ്പോള്‍ ഇങ്ങനെയൊരു പോസ്റ്റ് ഇടുന്നത്.

പ്രമുഖ വാരികയായ വനിതക്ക് ഞാന്‍ നല്‍കിയ ഇന്റര്‍വ്യൂ വിലെ ചില പ്രസക്തഭാഗങ്ങള്‍ ആണ് എല്ലാവര്‍ക്കും തെറ്റിധാരണ നല്‍കാന്‍ കാരണമായതെന്ന് ഞാന്‍ കരുതുന്നു. 'പ്രസ്തുത വാരികയ്ക്ക് നല്‍കിയ അഭിമുഖത്തില്‍ പറഞ്ഞ വ്യക്തി നടന്‍ ദിലീപ് അല്ല എന്ന് ആദ്യമേ പറഞ്ഞുകൊള്ളട്ടെ'.ഒരാഴ്ച മുന്‍പ് മറ്റൊരു മാധ്യമത്തില്‍ മുതിര്‍ന്ന പത്രലേഖകന്‍ എഴുതിയ റിപ്പോര്‍ട്ടില്‍ എനിക്ക് യാതൊരുവിധ ബന്ധവുമില്ലായെന്നും ഇപ്പോള്‍ ഞാന്‍ നല്‍കിയ അഭിമുഖത്തിലെ വാക്കുകള്‍ ബന്ധിപ്പിച്ചു വാര്‍ത്തകള്‍ വളച്ചൊടിക്കരുതെന്നും അഭ്യര്‍ത്ഥിക്കുന്നു.

സ്‌നേഹത്തോടെ,
ഭാമ

ഭാമയോട് ദിലീപ് വിദേശ ഷോയ്ക്കിടെ അപമര്യാദയായി പെരുമാറിയെന്നും തുടര്‍ന്ന് സിനിമയിലെ അവസരങ്ങള്‍ ഇല്ലാതാക്കിയെന്നും സിനിമാ മംഗളത്തിലെ പരമ്പരയില്‍ പെല്ലിശേരി എഴുതിയിരുന്നു. ഇക്കാര്യവും നടി നിഷേധിച്ചിട്ടുണ്ട്. വാരികയുടെ പേരും ലേഖകനെയും പരാമര്‍ശിക്കാതെയാണ് ഭാമ ഇക്കാര്യം വ്യക്തമാക്കിയിരിക്കുന്നത്. ഒരാഴ്ച മുന്‍പ് മറ്റൊരു മാധ്യമത്തില്‍ മുതിര്‍ന്ന പത്രലേഖകന്‍ എഴുതിയ റിപ്പോര്‍ട്ടുമായി,തനിക്ക് യാതൊരുവിധ ബന്ധവുമില്ലായെന്നും ഇപ്പോള്‍ നല്‍കിയ അഭിമുഖത്തിലെ വാക്കുകള്‍ ബന്ധിപ്പിച്ചു വാര്‍ത്തകള്‍ വളച്ചൊടിക്കരുതെന്നും ഭാമ അഭ്യര്‍ത്ഥിക്കുന്നു

ഇവര്‍ വിവാഹിതരായാല്‍' എന്ന ചിത്രത്തില്‍ അഭിനയിക്കുന്ന കാലത്ത്, അതിലെ അവസരം മുടക്കാന്‍ ചിലര്‍ ശ്രമിച്ചിരുന്നുവെന്ന് സംവിധായകന്‍ സജി സുരേന്ദ്രന്‍ പറഞ്ഞിരുന്നുവെന്ന് ഭാമ പറയുന്നു. 'സിനിമ അനൗണ്‍സ് ചെയ്തപ്പോഴേ ഒരാള്‍ വിളിച്ച് എന്നെ മാറ്റാന്‍ ആവശ്യപ്പെട്ടുവെന്ന് സജി സുരേന്ദ്രന്‍ പറഞ്ഞു. എല്ലാം ഫിക്‌സ് ചെയ്തുകഴിഞ്ഞെന്ന് അദ്ദേഹം പറഞ്ഞപ്പോള്‍ ഞാന്‍ അവര്‍ക്ക് തലവേദനയാകുമെന്ന് മുന്നറിയിപ്പ് നല്‍കി,' ഭാമ പറയുന്നു. പിന്നീടും പല സംവിധായകരും ഇത്തരത്തില്‍ തനിക്കുള്ള അവസരം മുടക്കാനുള്ള ശ്രമത്തെക്കുറിച്ച് പറഞ്ഞിട്ടുണ്ടെന്നും വി.എം.വിനു ഒരു പേര് തന്നോട് പറഞ്ഞുവെന്നും പറയുന്നു ഭാമ.

സജി സുരേന്ദ്രന്‍ പറഞ്ഞപ്പോള്‍ അത്ര കാര്യമാക്കിയില്ല. എനിയ്ക്കും സിനിമയില്‍ ശത്രുക്കളോ എന്നൊക്കെ വിചാരിച്ചു. അത് ഒരാളാണോ എന്ന് എനിയ്ക്കറിയില്ല. ഒന്നിലേറെ പേരുണ്ടായേക്കാം. എന്നെ സിനിമയില്‍ ഉള്‍പ്പെടുത്തിയാല്‍ വലിയ തലവേദനയാണെന്നാണ് ആ 'ശത്രുക്കള്‍' പറഞ്ഞുപരത്തുന്നത്. വീണ്ടും ചില സംവിധായകര്‍ എന്നോടിത് തുറന്നുപറഞ്ഞിട്ടുണ്ട്. കുറച്ചുനാള്‍ മുന്‍പ് വി.എം.വിനു സംവിധാനം ചെയ്ത 'മറുപടി'യില്‍ അഭിനയിച്ചു. ഷൂട്ടിംഗ് തീരാറായ ദിവസങ്ങളിലൊന്നില്‍ വിനുച്ചേട്ടന്‍ പറഞ്ഞു, 'നീ എനിയ്ക്ക് തലവേദനയൊന്നും ഉണ്ടാക്കിയില്ലല്ലോ. സിനിമ തുടങ്ങുംമുമ്പ് ഒരാള്‍വിളിച്ച് ആവശ്യപ്പെട്ടിരുന്നു. നിന്നെ മാറ്റണം അല്ലെങ്കില്‍ പുലിവാലാകുമെന്ന്.' ആരാണത് പറഞ്ഞതെന്ന് പറയുമോ എന്ന് അദ്ദേഹത്തെ നിര്‍ബന്ധിച്ചപ്പോള്‍ അദ്ദേഹം ആളെ പറഞ്ഞു. ആ പേര് കേട്ട് ഞാന്‍ ഞെട്ടി. ഞാന്‍ ഒരുപാട് ബഹുമാനിക്കുന്ന ഒരാളായിരുന്നു അത്. ചില ചടങ്ങുകളില്‍വച്ച് കാണാറുണ്ടെന്നല്ലാതെ മറ്റൊരു ബന്ധവും ഞങ്ങള്‍ തമ്മിലില്ല. ഞങ്ങള്‍ക്കിടയില്‍ ഒരു പ്രശ്‌നവുമില്ല. എന്നിട്ടും എന്റെ അവസരങ്ങള്‍ ഇല്ലാതാക്കാന്‍ എന്തിന് ശ്രമിക്കുന്നു എന്നറിയില്ല.

പ്രതിഫലത്തിന്റെയും ഒരു പെണ്‍കുട്ടി എന്ന നിലയില്‍ ആവശ്യമായ സുരക്ഷിതത്വത്തിന്റെയുമൊക്കെ കാര്യത്തില്‍ വിട്ടുവീഴ്ചകള്‍ക്ക് നില്‍ക്കാത്തതുകൊണ്ടാവാം ചിലര്‍ ഇത്തരം പ്രചരണങ്ങള്‍ നടത്തുന്നതെന്നും പറയുന്നു ഭാമ. 'വളരെ പാവമായി സംസാരിക്കുമ്പോള്‍ അത് ചൂഷണം ചെയ്യാനായി ഒരുപാട് പേരെത്തും. ചെറിയ ബജറ്റേ ഉള്ളുവെന്ന് പറഞ്ഞും പ്രതിഫലം മുഴുവനും തരാതെയുമൊക്കെ വഞ്ചിക്കാന്‍ ശ്രമിക്കുന്നവരുണ്ട്. ഇത്തരം സാഹചര്യങ്ങളില്‍ എനിക്ക് മധുരമായി സംസാരിക്കാനറിയില്ല..' ഭാമ പറഞ്ഞവസാനിപ്പിക്കുന്നു.