ശശി സാര്‍ എനിക്കു വേണ്ടി കാത്തിരുന്നു പക്ഷെ സംഭവിച്ചത് മറ്റൊന്ന്...
മലയാള സിനിമയുടെ ഹിറ്റ് സംവിധായകന്‍ ഐവി ശശിയുടെ വേര്‍പാടില്‍ അനുശോചനം അറിയിച്ച് നടി മഞ്ജു വാര്യര്‍. ശശി സാറിനൊപ്പം ഒരു സിനിമ എന്ന സ്വപ്നം നടക്കാത്തതിന്റെ ദുഖവും മഞ്ജു പങ്കുവെച്ചു.
'മലയാള സിനിമയിലെ ഒരു അതുല്യ പ്രതിഭ കൂടി നമ്മെ വിട്ടു പോയിരിക്കുന്നു. ഒരു പക്ഷെ എന്നെപ്പോലെ തന്നെ സിനിമയില്‍ ഒട്ടു മിക്കവര്‍ക്കും 'ഹിറ്റ് മേക്കര്‍' അല്ലെങ്കില്‍ 'മാസ്റ്റര്‍ ക്രാഫ്റ്റ്‌സ്മാന്‍' എന്ന വാക്ക് കേള്‍ക്കുമ്പോള്‍ ആദ്യം മനസ്സിലേക്ക് ഓടിയെത്തുന്ന പേര് ഐ. വി.ശശി എന്നായിരിക്കും.
താരങ്ങളെക്കാള്‍ കരുത്തനായ സംവിധായകനായി, ദക്ഷിണേന്ത്യന്‍ സിനിമയില്‍ എന്നല്ല ഇന്ത്യന്‍ സിനിമയില്‍ തന്നെ ആര്‍ക്കും മറികടക്കാനാവാത്ത നേട്ടങ്ങള്‍ കൊയ്ത ഐ. വി. ശശി സര്‍ മൂന്നു വര്‍ഷങ്ങള്‍ക്കു മുമ്പ് ഒരു സിനിമ മനസ്സില്‍ ആലോചിച്ചപ്പോള്‍ എനിക്കു വേണ്ടിയും ഒരു കഥാപാത്രം കരുതിയിരുന്നു എന്നു ഞാന്‍ അഭിമാനത്തോടെ ഓര്‍ക്കുന്നു.
പക്ഷെ ആ സിനിമ സംഭവിച്ചില്ല. സിനിമയില്‍ ഒരു കാലഘട്ടത്തെ സൃഷ്ടിച്ച ആ വലിയ സംവിധായകനോടൊപ്പം പ്രവര്‍ത്തിക്കാനുള്ള ഭാഗ്യം എനിക്കുണ്ടായില്ല. എന്നെന്നും ഓര്‍ക്കാന്‍ ഒരുപാട് നല്ല സിനിമകള്‍ സമ്മാനിച്ച പ്രിയപ്പെട്ട ശശി സര്‍, മലയാള സിനിമയെ സ്‌നേഹിക്കുന്ന ഏതൊരാളുടെയും ഉള്ളില്‍ അങ്ങ് എന്നും ജീവിക്കും. അങ്ങേക്ക് ഏറ്റവും പ്രിയപ്പെട്ട ആ തൊപ്പി അങ്ങയുടെ പേരില്‍ത്തന്നെ എന്നും അറിയപ്പെടും' എന്ന് മഞ്ജു ഫെയ്‌സ്ബുക്കില്‍ കുറിച്ചു.
ചൊവ്വാഴ്ച രാവിലെ ചെന്നൈയില്‍ വെച്ചായിരുന്നു അന്ത്യം. ദേഹാസ്വസ്ഥ്യത്തെത്തുടര്‍ന്ന് ആശുപത്രിയിലേയ്ക്ക് കൊണ്ടു പോകും വഴിയായിരുന്നു മരണം. നിരവധി സിനിമാ പ്രവര്‍ത്തകര്‍ വസതിയിലെത്തി. കോഴിക്കോട് സംസ്‌കാരം നടത്താന്‍ ആലോചിച്ചിരുന്നെങ്കിലും ചെന്നൈയില്‍ മതിയെന്ന് സ്ഥിതീകരിച്ചു.
https://www.facebook.com/Malayalivartha
