മിനിസ്‌ക്രീനിലും ബിഗ് സ്‌ക്രീനിലും ഒരുപോലെ താരമാണ് സ്വാസിക. സിനിമയില്‍ ഇടയ്ക്കു വന്നുപോകുമെങ്കിലും ടെലിവിഷനില്‍ അവതാരകയായും പരന്പരകളിലും നൃത്ത പരിപാടികളിലും സജീവ സാനിധ്യമാണ് ഈ നായിക. ഒപ്പം തന്നെ ഫ്‌ളവേഴ്‌സ് ടിവിയിലെ ഹിറ്റ് പരന്പര സീതയിലെ ടൈറ്റില്‍ കഥാപാത്രമായും കുട്ടികളുടെ ഇഷ്ട പ്രോഗ്രാം കട്ടുറുന്പിലെ അവതാരകയായും കുടുംബ പ്രേക്ഷകര്‍ക്കും പ്രിയങ്കരിയാണ് സ്വാസിക. ഈസ്റ്റര്‍ റിലീസായ കുട്ടനാടന്‍ മാര്‍പാപ്പയില്‍ ഒരു നിര്‍ണായക കഥാപാത്രമായി എത്തുന്ന സ്വാസിക സിനിമയുടെ വിശേഷങ്ങള്‍ പങ്കുവയ്ക്കുന്നു.

സ്വാസികയുടെ വാക്കുകള്‍

ജീനു എന്നാണ് എന്റെ കഥാപാത്രത്തിന്റെ പേര്. ചാക്കോച്ചന്റെ പഴയ കാമുകിയുടെ വേഷമാണ്. സ്‌കൂള്‍ സമയത്തെ പ്രണയത്തിനു ശേഷം അതുവേണ്ടെന്നുവച്ചു പോവുകയും വര്‍ഷങ്ങള്‍ക്കു ശേഷം തമ്മില്‍ കണ്ടുമുട്ടുന്നതുമായ ഒരു കഥാപാത്രം. ജീനുവുമായുള്ള പ്രണയത്തകര്‍ച്ചയ്ക്കു ശേഷം ജീവിതത്തില്‍ പെണ്ണുവേണ്ട എന്നുതീരുമാനിച്ച് മാര്‍പാപ്പയെപ്പോലെ ജീവിക്കുന്നതാണ് ചാക്കോച്ചന്റെ കഥാപാത്രം. ഹ്യൂമറസ് പശ്ചാത്തലത്തില്‍ പ്രണയവും തേപ്പുമൊക്കെയായി പ്രേക്ഷകര്‍ക്ക് ഇഷ്ടപ്പെടുന്ന സിനിമയായിരിക്കും കുട്ടനാടന്‍ മാര്‍പാപ്പ.

മലയാളത്തില്‍ അഭിനയിച്ച സിനിമകളില്‍ പ്രേക്ഷകര്‍ ഏറെ ശ്രദ്ധിച്ചത് കട്ടപ്പനയിലെ ഋത്വിക് റോഷനാണ്. കട്ടപ്പനയിലെ ഋത്വിക് റോഷനും സ്വര്‍ണക്കടുവയും സീരിയലുകള്‍ക്കിടയില്‍ വലിയൊരു ഇടവേളയ്ക്കു ശേഷം ഞാന്‍ ചെയ്ത സിനിമകളായിരുന്നു. ചാക്കോച്ചനൊപ്പമുള്ള കുട്ടനാടന്‍ മാര്‍പാപ്പ തിയറ്ററിലെത്തിയ സന്തോഷത്തിലാണ് ഇപ്പോള്‍. ഇനിയും നമ്മളിലേക്കെത്തുന്ന കഥാപാത്രങ്ങളെ മികച്ചതാക്കി നല്ല ടീമിനൊപ്പം സിനിമ ചെയ്യണമെന്നാണ് ആഗ്രഹം.

ആ സിനിമയില്‍ അഞ്ചു ദിവസത്തെ ഷൂട്ടിംഗ് മാത്രമാണ് ഉണ്ടായിരുന്നത്. നല്ലൊരു സിനിമയാകുമെന്നു പ്രതീക്ഷിച്ചെങ്കിലും തേപ്പുകാരി എന്ന കഥാപാത്രം പ്രേക്ഷകര്‍ ഇത്ര സ്വീകരിക്കുമെന്നു കരുതിയിരുന്നില്ല. ഇപ്പോഴും ട്രോളുകളിലും കോളജ് സ്റ്റുഡന്റസിന്റെ ഇടയിലും ആ കഥാപാത്രം നിറഞ്ഞു നില്‍ക്കുന്നുണ്ട്. ഞാന്‍ ചെയ്തതില്‍ അത്രത്തോളം ഐഡന്റിറ്റി നല്‍കിയൊരു മറ്റൊരു കഥാപാത്രമില്ല.

നൃത്തവും നാടകവു മൊക്കെ സ്‌കൂള്‍തലം മുതലുണ്ട്. പരസ്യം ചെയ്താണ് തുടങ്ങുന്നത്. ഒന്‍പതാം ക്ലാസില്‍ പഠിക്കുന്ന സമയത്ത് ഒരു മാഗസിന്റെ കവര്‍ എന്റെ ഫോട്ടോ ആയിരുന്നു. ആ സമയത്താണ് തമിഴ് സംവിധായകന്‍ സുന്ദര്‍ എന്റെ ഫോട്ടോ കണ്ട് ഓഡിഷനിലേക്കു വിളി ക്കുന്നത്. അങ്ങനെയാണ് 2011ല്‍ അദ്ദേഹത്തിന്റെ ആദ്യ തമിഴ് സിനിമ വൈഗയില്‍ നായികയാകുന്നത്. അതിനു ശേഷം കുറച്ചു തമിഴ് ചിത്രങ്ങള്‍ കൂടി ചെയ്തു. പിന്നീടാണ് മലയാളത്തിലേക്കെത്തുന്നത്.

തുടക്കസമയത്ത് മികച്ച തമിഴ് സിനിമകള്‍ ചെയ്‌തെങ്കിലും പിന്നീടു മികച്ച അവസരങ്ങള്‍ കിട്ടിയിരുന്നില്ല. അതിനുശേഷമാണ് മലയാളത്തില്‍ അയാളും ഞാനും തമ്മില്‍, സിനിമ കന്പനി, ഒറീസ തുടങ്ങിയ ചിത്രങ്ങളില്‍ അഭിനയിക്കുന്നത്. അപ്പോഴേക്കും സീരിയലില്‍ നിന്നും അവസരങ്ങളെത്തി. ഒന്നും ചെയ്യാതിരിക്കുന്നതിനേക്കാള്‍ നല്ലതാണെന്ന തോന്നലാണ് സീരിയലിലേക്കെത്തിച്ചത്.

കാസ്റ്റിംഗ് കൗച്ച്, പുരുഷ മേധാവിത്വം എന്നിവയൊക്കെ എല്ലാ ഇന്‍ഡസ്ട്രിയിലുമുള്ളതാണ്. അത്തരത്തില്‍ ഒരാള്‍ നമ്മളെ സമീപിക്കുന്‌പോള്‍ അതു നമ്മുടെ മാത്രം ഇഷ്ടത്തിന്റെ പുറത്തു പോകുന്നതാണ്. നേട്ടത്തിനുവേണ്ടി അതിനു പിന്നാലെ പോകുന്നവരുണ്ടാകും. പക്ഷേ, നമ്മുടെ കഴിവിലുള്ള വിശ്വാസവും നല്ല അവസരങ്ങള്‍ തേടിയെത്തുമെന്ന ധൈര്യവുമുണ്ടെങ്കില്‍ നമുക്കതിനെ തരണം ചെയ്യാന്‍ സാധിക്കും. എന്തായാലും നിര്‍ബന്ധപൂര്‍വമോ ബലാല്‍ക്കാരമോ ആയി അത്തരമൊരു അനുഭവം നേരിടേണ്ടി വരില്ലെന്ന പൂര്‍ണ സുരക്ഷിതത്വം സിനിമ മേഖലയ്ക്കുണ്ടെന്നാണ് എന്റെ അഭിപ്രായം.