പൊതുവേദിയില്‍ പിഷാരടിയെ കൊണ്ട് തല മൊട്ടയടിപ്പിച്ച് ജയറാം. ജയറാം, ചാക്കോച്ചന്‍ എന്നിവരെ നായകരാക്കി രമേഷ് പിഷാരടി ആദ്യമായി സംവിധാനം ചെയ്യുന്ന ചിത്രമാണ് പഞ്ചവര്‍ണ്ണതത്ത. ചിത്രത്തില്‍ പക്ഷി വില്‍പ്പനക്കാരന്റെ വേഷത്തിലെത്തുന്ന ജയറാം അന്ന് തല മൊട്ടയടിച്ചപ്പോള്‍ സപ്പോര്‍ട്ടായി മൊട്ടയടിക്കാമെന്ന് പിഷാരടി പറഞ്ഞിരുന്നു. പക്ഷേ പിന്നീട് പിഷാരടി ജയറാമിന് പിടികൊടുക്കാതെ മുങ്ങി നടക്കുകയായിരുന്നു. എന്നാല്‍ ഫഌവേഴ്‌സ് ടിവിയുടെ ഇന്ത്യന്‍ ഫിലിം അവാര്‍ഡ് പുരസ്‌കാര വേദിയില്‍ വെച്ച് ജയറാം പിഷാരടിയെ കൈയ്യോടെ പിടികൂടി മൊട്ടയടിപ്പിച്ചു. ഈ വേദിയില്‍ ജയറാം അവതാരകനായി എത്തുകയായിരുന്നു. ചെണ്ടമേളത്തിന്റെയും മറ്റും അകമ്പടിയോടെയായിരുന്നു മൊട്ടയടി.

ചിത്രത്തിന്റെ ട്രെയിലറും ഗാനവും പുറത്തിറങ്ങിയിരുന്നു. ഹരിചരനും ജ്യോത്സനയും ചേര്‍ന്നാലപിച്ച ഈ ഗാനം ഹിറ്റായിരുന്നു. വിഷു റിലീസായാണ് ചിത്രം തീയറ്ററുകളില്‍ എത്തുക. മണിയന്‍പിള്ള രാജു പ്രൊഡക്ഷന്‍സിന്റെ ബാനറിലാണ് നിര്‍മ്മാണം. സപ്തതരംഗ് എന്ന പുതിയ നിര്‍മ്മാണ വിതരണ കമ്പനിയുമായി സഹകരിച്ചാണ് മണിയന്‍പിള്ള രാജു ഈ ചിത്രം ഒരുക്കുന്നത്.

സീനിയേഴ്‌സ് എന്ന ചിത്രത്തിനു ശേഷം ജയറാമും കുഞ്ചാക്കോ ബോബനും ഒന്നിക്കുന്ന ചിത്രമെന്ന പ്രത്യേകതയും ഈ ചിത്രത്തിനുണ്ട്. ചിത്രത്തില്‍ ജയറാം വ്യത്യസ്ത ലുക്കിലാണ് പ്രത്യക്ഷപ്പെടുന്നത്. തലമുണ്ഡനം ചെയ്ത് അല്പം കുടവയറും, വലിയ ചെവിയുമൊക്കെയായുള്ള ജയറാമിന്റെ പുതിയ രൂപം കൗതുകമുണര്‍ത്തുന്നതാണ്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ സോഷ്യല്‍ മീഡിയയില്‍ ശ്രദ്ധ നേടിയിരുന്നു.

ജീവിതത്തിലെ രണ്ടു വ്യത്യസ്ത ധ്രവുങ്ങളില്‍ കഴിയുന്ന രണ്ടുപേര്‍ ഒന്നിക്കുന്നതും ഇവരുടെ ജീവിതത്തില്‍ അരങ്ങേറുന്ന സംഭവങ്ങളുമാണ് മുഴുനീള നര്‍മ്മ മുഹൂര്‍ത്തങ്ങളിലൂടെ ചിത്രം അവതരിപ്പിക്കുന്നത്. അനുശ്രീയാണ് നായിക. സലിം കുമാര്‍, മണിയന്‍പിള്ള രാജു, ധര്‍മ്മജന്‍ ബൊള്‍ഗാട്ടി, അശോകന്‍, ജോജു ജോര്‍ജ്ജ്, കുഞ്ചന്‍, ബാലാജി, സാജന്‍ പള്ളുരുത്തി, നന്ദന്‍, ഉണ്ണി, മല്ലികാ സുകുമാരന്‍, പാര്‍വ്വതി സോമനാഥ് എന്നിവരും ചിത്രത്തില്‍ അണിനിരക്കും.

രമേഷ് പിഷാരടിയും ഹരി.പി നായരും ചേര്‍ന്നാണ് തിരക്കഥ. സന്തോഷ് വര്‍മ്മ, ഹരിനാരായണന്‍ എന്നിവരുടെ ഗാനങ്ങള്‍ക്ക് എം.ജയചന്ദ്രന്‍, നാദിര്‍ഷ എന്നിവര്‍ ഈണം പകരും. പ്രദീപ് നായര്‍ ഛായാഗ്രഹണവും വി. സാജന്‍ എഡിറ്റിംഗും നിര്‍വ്വഹിക്കും.