കൃഷ്ണമൃഗത്തെ വേട്ടയാടി കൊന്ന കേസില് സല്മാന് ഖാന് അഞ്ചുവര്ഷം തടവ് ;10,000 രൂപ പിഴ ; വിധി ജോധ്പൂര് കോടതിയുടേത്
കൃഷ്ണമൃഗത്തെ വേട്ടയാടി കൊന്ന കേസില് ബോളിവുഡ് നടന് സല്മാന് ഖാന് അഞ്ചു വര്ഷം തടവും പതിനായിരം രൂപ പിഴയും ശിക്ഷ വിധിച്ചു. രാജസ്ഥാനിലെ ജോധ്പുര് വിചാരണ കോടതി ചീഫ് ജുഡീഷ്യല് മജിസ്ട്രേറ്റ് ദേവ് കുമാര് ഖത്രിയാണ് വിധി പുറപ്പെടുവിച്ചത്. അതേസമയം, കൂട്ടുപ്രതികളും ബോളിവുഡ് താരങ്ങളുമായ സൈഫ് അലി ഖാന്, തബു, നീലം കൊത്താരി, സോണാലി ബാന്ദ്രെ എന്നിവരെ വിചാരണ കോടതി വെറുതെവിട്ടു. വിചാരണ കോടതിയുടെ ശിക്ഷാ വിധിക്കെതിരെ സല്മാന് ഖാന് മേല്ക്കോടതിയെ സമീപിക്കാം.
1998ല് രജിസ്റ്റര് ചെയ്ത കേസില് 20 വര്ഷത്തിന് ശേഷമാണ് സല്മാന് ഖാനെ കുറ്റക്കാരനായി കണ്ടെത്തിയത്. വന്യജീവി നിയമ പ്രകാരമുള്ള പരമാവധി ശിക്ഷയായ ആറു വര്ഷം തടവ് നല്കണമെന്ന് പ്രോസിക്യൂഷന് കോടതിയോട് ആവശ്യപ്പെട്ടപ്പോള് സല്മാന് നടത്തുന്ന സാമൂഹിക പ്രവര്ത്തനങ്ങള് കണക്കിലെടുത്തി കുറഞ്ഞ ശിക്ഷ നല്കണമെന്ന് പ്രതിഭാഗവും വാദിച്ചു.
1972ലെ വന്യജീവി നിയമം 9, 51, ഐ.പി.സി 149 എന്നിവ പ്രകാരം സംരക്ഷിത വനമേഖലയില് അനധികൃതമായി അതിക്രമിച്ചു കടന്നു, വംശനാശ ഭീഷണി നേരിടുന്ന ജീവിയെ വേട്ടയാടി കൊന്നു, ലൈസന്സ് ഇല്ലാത്ത ആയുധം ഉപയോഗിച്ച് വേട്ടയാടി, സംഘം ചേരല് എന്നീ കുറ്റങ്ങളാണ് സല്മാനെതിരെ വിചാരണ കോടതി കണ്ടെത്തിയത്. സല്മാന് തന്നെയാണ് കൃഷ്ണമൃഗത്തിന് നേരെ തോക്ക് ഉപയോഗിച്ച് വെടിയുതിര്ത്തെന്ന പ്രോസിക്യൂഷന് വാദം വിചാരണ കോടതി അംഗീകരിച്ചു.
സംഭവ ദിവസം സിനിമ താരങ്ങളായ നാലു സഹയാത്രികര് സഞ്ചരിച്ച ജിപ്സി സല്മാനാണ് ഒാടിച്ചിരുന്നത്. കൃഷ്ണമൃഗത്തെ കണ്ടയുടന് സല്മാന് വാഹനം നിര്ത്തുകയും കൈവശം ഉണ്ടായിരുന്ന തോക്ക് ഉപയോഗിച്ച് വെടിയുതിര്ക്കുകയും ചെയ്തെന്നാണ് പ്രോസിക്യൂഷന് വാദിച്ചത്. എന്നാല്, പട്ടിയുടെ കടിയേറ്റ് കുഴിയില് വീണാണ് കൃഷ്ണമൃഗം ചത്തതെന്ന് സല്മാന്റെ അഭിഭാഷകന് എച്ച്.എം സരസ്വത് ചൂണ്ടിക്കാട്ടി.
കൂട്ടുപ്രതികള്ക്കെതിരെ കുറ്റകൃത്യം ചെയ്യാന് സംഘടിച്ചെന്ന കുറ്റമാണ് ചുമത്തിയിരുന്നത്. എന്നാല്, പ്രോസിക്യൂഷന് വാദം തള്ളിയ കോടതി ഇവര്ക്കെതിരായ കുറ്റങ്ങള് തെളിയിക്കാന് തെളിവില്ലെന്ന് വ്യക്തമാക്കി.
1998 ഒക്ടോബര് ഒന്നിന് രാജസ്ഥാനിലെ കങ്കാണി ഗ്രാമത്തില് രണ്ട് കൃഷ്ണമൃഗത്തെ വേട്ടയാടിയ സംഭവത്തില് സല്മാന് പുറമെ സൈഫ് അലി ഖാന്, തബു, നീലം കൊത്താരി, സോണാലി ബാന്ദ്രെ എന്നിവര്ക്കെതിരെയാണ് കേസ് രജിസ്റ്റര് ചെയ്തിരുന്നത്. സല്മാന് അടക്കം മുഴുവന് പ്രതികളുടെ വിധി കേള്ക്കാന് എത്തിയിരുന്നു. സല്മാന് വേണ്ടി അഭിഭാഷകന് എച്ച്.എം സരസ്വത് ഹാജരായി.
വംശനാശത്തിന്റെ വക്കിലെത്തിയ ബ്ലാക്ക് ബക്ക് എന്ന അപൂര്വ മാനിനെ 1998 ഒക്ടോബര് ഒന്നിന് വേട്ടയാടുകയും നിയമവിരുദ്ധമായി ആയുധങ്ങള് കൈവശം വെക്കുകയും ചെയ്ത കേസിലാണ് സല്മാന് ഖാന് വിചാരണ നേരിടുന്നത്. ബാക്കി താരങ്ങള് സല്മാനോടൊപ്പമുണ്ടായിരുന്നതിനാലാണ് കേസിലകപ്പെട്ടത്. 'ഹം സാത് സാത് ഹൈ' എന്ന സിനിമയുടെ ചിത്രീകരണത്തിനിടെ ആയിരുന്നു സംഭവം.ലൈസന്സ് ഇല്ലാത്ത ആയുധം കൈവശം വെച്ച കേസില് സല്മാനെ മറ്റൊരു കോടതി നേരത്തെ വെറുതെവിട്ടിരുന്നു.
https://www.facebook.com/Malayalivartha