ആദ്യകാല തെന്നിന്ത്യന്‍ നടി ശാന്തി അന്തരിച്ചു
കോട്ടയം, സംക്രാന്തി സ്വദേശിനിയായ ആദ്യകാല തെന്നിന്ത്യന്‍ നടി കെ.വി. ശാന്തി (81) അന്തരിച്ചു. വാര്‍ധക്യ സഹജമായ അസുഖങ്ങളെത്തുടര്‍ന്ന് ഇന്നലെ പുലര്‍ച്ചെ കോടമ്പാക്കത്തെ വസതിയിലായിരുന്നു അന്ത്യം. ശാന്തി വര്‍ഷങ്ങളായി കോടമ്പാക്കത്താണു താമസം. സംസ്‌കാരം നടത്തി.
എസ്.പി. പിള്ളയാണ് മികച്ച നര്‍ത്തകിയായിരുന്ന ശാന്തിയെ സിനിമാലോകത്തേക്കു കൈപിടിച്ചുയര്‍ത്തിയത്. 1953-ല്‍ പുറത്തിറങ്ങിയ 'പൊന്‍കതിര്‍' എന്ന ചിത്രത്തിലെ നര്‍ത്തകിയുടെ വേഷത്തിലൂടെയായിരുന്നു ശാന്തിയുടെ അരങ്ങേറ്റം. 1950-70 കാലഘട്ടത്തില്‍ പുറത്തിറങ്ങിയ അറുപതോളം ചിത്രങ്ങളില്‍ വേഷമിട്ടു.
തെലുങ്ക്, തമിഴ് സിനിമകള്‍ കൂടാതെ 1956-ല്‍ പുറത്തിറങ്ങിയ 'ചോരി ചോരി' എന്ന ഹിന്ദി ചിത്രത്തിലും അഭിനയിച്ചിട്ടുണ്ട്. മേരിലാന്‍ഡ് സ്റ്റുഡിയോയുടെ ചിത്രങ്ങളിലെ സജീവ സാന്നിധ്യമായിരുന്നു ശാന്തി.
അക്കല്‍ദാമ, ദേവി കന്യാകുമാരി, ഭക്തകുചേല, ലേഡി ഡോക്ടര്‍, നെല്ല്, കാട്, പ്രതികാരം, കൊച്ചനിയത്തി, സ്വപ്നങ്ങള്‍, പോസ്റ്റ്മാന്‍, കാമം ക്രോധം മോഹം, അധ്യാപിക തുടങ്ങിയവയാണു പ്രധാനചിത്രങ്ങള്‍. ഭര്‍ത്താവ്: ജി. ശശികുമാര്‍. മകന്‍: ശ്യാം. മരുമകള്‍: ഷീല.
https://www.facebook.com/Malayalivartha
