തത്കാലം സിനിമാഭിനയം മാറ്റി വച്ച് വിവിധ സ്ഥാപനങ്ങളുടെ ബ്രാന്റ് അംബാസിഡറാകാന്‍ നടന്‍ സുരേഷ്‌ഗോപി തീരുമാനിച്ചു. ഇതിന്റെ ഭാഗമായി കേരള സംസ്ഥാന ലീഗല്‍ സര്‍വ്വീസസ് അതോറിറ്റിയുടെ അംബാസിഡറാകും. പണമല്ല താരത്തിന്റെ വിഷയം. പബ്‌ളിസിറ്റി മാത്രമാണ്.
കെല്‍സ എന്ന ചുരുക്കപേരില്‍ അറിയപ്പെടുന്ന കേരള ലീഗല്‍ സര്‍വീസസ് അതോറിറ്റി സാധാരണക്കാര്‍ക്ക് വേണ്ടി വ്യവഹാരങ്ങള്‍ നടത്തുന്ന അര്‍ദ്ധ ജുഡീഷ്യല്‍ സ്ഥാപനമാണ്. കേസ് നടത്താന്‍ പണമില്ലാത്തവര്‍ക്ക് ധൈര്യമായി കെല്‍സയില്‍ ചെല്ലാം. അവര്‍ സൗജന്യ നിയമ സഹായം നല്‍കും. കെല്‍സക്ക് കീഴില്‍ ജില്ലാ താലൂക്ക് തല സമിതികളുണ്ട്. ഹൈക്കോടതി ജഡ്ജിയാണ് കെല്‍സയുടെ ചെയര്‍മാന്‍.
ഊര്‍ജ്ജസംരക്ഷണത്തിനു വേണ്ടിയുള്ള സര്‍ക്കാര്‍ പ്രചരണ പദ്ധതിയുടെ ചുമതലയും സുരേഷ്‌ഗോപിക്കായിരുന്നു. മൂന്നു ചിത്രങ്ങളില്‍ അഭിനയിക്കാന്‍ കരാര്‍ ആയിട്ടുണ്ടെങ്കിലും തത്കാലം സിനിമയില്‍ നോട്ടമില്ലെന്നാണ് സുരേഷ്‌ഗോപി പറയുന്നത്.
വിവിധ സര്‍ക്കാര്‍ പദ്ധതികളുമായി സഹകരിക്കാനാണ് സുരേഷ്‌ഗോപിയുടെ തീരുമാനം. ഇതിന് നിരവധി ഗുണങ്ങളുണ്ട്. ജനങ്ങളുമായി ബന്ധപ്പെട്ട് നില്‍ക്കുന്ന പരിപാടിയായതിനാല്‍ പബ്‌ളിസിറ്റി ചുമ്മാതെ കിട്ടും. ജനങ്ങളുമായി ചേര്‍ന്നു നില്‍ക്കുന്നു എന്ന പേരും സമ്പാദിക്കാം.
ആത്യന്തികമായി ഇലക്ഷനാണ് സുരേഷ്‌ഗോപിയുടെ ലക്ഷ്യം. ബി.ജെ.പി ഇക്കുറി സുരേഷ്‌ഗോപിയെ രംഗത്തിറക്കാനാണ് സാധ്യത. നരേന്ദ്രമോഡിയുമായി സുരേഷ്‌ഗോപി അടുപ്പം പുലര്‍ത്തുന്നുണ്ട്. ഗുജറാത്ത് മുഖ്യമന്ത്രിയായിരിക്കെ സുരേഷ്‌ഗോപി നരേന്ദ്രമോഡിയെ സന്ദര്‍ശിച്ചിരുന്നു. സംസ്ഥാനത്ത് ബിജെപിയുമായി അടുപ്പം പുലര്‍ത്തുന്ന നേതാക്കളില്‍ സുരേഷ്‌ഗോപിയുമുണ്ട്.
ജനങ്ങള്‍ക്ക് താത്പര്യമുള്ള പദ്ധതികളുമായി സഹകരിക്കാനുള്ള സുരേഷ്‌ഗോപിയുടെ തീരുമാനത്തിന് പിന്നില്‍ ബിജെപിയാണുള്ളത്. സകല പൊതു പരിപാടികളിലും സുരേഷ്‌ഗോപി സജീവമാണ്. നെറ്റിയിലെ കുങ്കുമക്കുറി ബിജെപിയുമായുള്ള ബന്ധം വ്യക്തമാക്കുന്നുണ്ട്. തിരുവനന്തപുരം, നേമം മണ്ഡലങ്ങളാണ് ലക്ഷ്യം.
സിനിമയില്‍ അഭിനയിക്കാന്‍ സുരേഷ്‌ഗോപി ആവശ്യപ്പെടുന്നത് കോടികളാണ്. അത് പലപ്പോഴും നിര്‍മ്മാതാക്കളെ പിന്നോട്ടടിക്കുന്നുണ്ട്. അതേ സമയം സര്‍ക്കാര്‍ സംരംഭങ്ങളുമായി സഹകരിക്കുന്നത് സൗജന്യമായാണ്. കെല്‍സയുമായി സഹകരിച്ചാണ് അമൃതാചാനല്‍ കഥയില്ലിത് ജീവിതം എന്ന ഹിറ്റ് പരിപാടി നിര്‍മ്മിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha