അരുവിക്കരയില്‍ ബി.ജെ.പിയുടെ വോട്ട് ഇടതുപക്ഷത്തിന് ലഭിച്ചിട്ടില്ലെന്ന് എല്‍.ഡി.എഫ് സ്ഥാനാര്‍ത്ഥിയായി വിജയിച്ച ജി സ്റ്റീഫന്‍. തിരഞ്ഞെടുപ്പ് ഫലത്തിന് ശേഷം മലയാളി വാര്‍ത്തക്ക് അനുവദിച്ച പ്രത്യേക അഭിമുഖത്തില്‍ സംസാരിക്കുകായിരുന്നു അദ്ദേഹം. 2015 യില്‍ 34000 ലധികം വോട്ട് ബി.ജെ.പി സ്ഥാനാര്‍ത്ഥി നേടി. 2019യിലെ ലോക്‌സഭാ തിരഞ്ഞെടുപ്പില്‍ 29000 വോട്ടുകള്‍ അവര്‍ മണ്ഡലത്തില്‍ നേടി. കഴിഞ്ഞ തദ്ദേശ തിരഞ്ഞെടുപ്പിലും അവര്‍ 31000 ലധികം വോട്ട് അവര്‍ നേടി. എന്നാല്‍ നിയമസഭാ തിരഞ്ഞെടുപ്പില്‍ അവരുടെ വോട്ട് എവിടെ പോയി എന്നത് സംബന്ധിച്ച് കേരള സമൂഹമാണ് ചര്‍ച്ച ചെയ്യേണ്ടത്. ഇടതുപക്ഷം വര്‍ഗീയതക്കും കോപ്പറേറ്റ് ലോബിക്കും എതിരെ വ്യക്തമായ നിലപാട് സ്വീകരിക്കുന്ന പ്രസ്ഥാനമാണ്. അതുകൊണ്ട് തന്നെ ബി.ജെ.പിയുടെ വോട്ട് ഇടതുപക്ഷത്തിന് ലഭിക്കുമെന്ന് ഒരിക്കലും കരുതാന്‍ സാധിക്കില്ലെന്നും സ്റ്റീഫന്‍ വ്യക്തമാക്കി.

എല്‍.ഡി.എഫ് സര്‍ക്കാരിന്റെ ജനക്ഷേമത്തിനുള്ള അംഗീകാരമാണ് അരുവിക്കരയിലെ സി.പി.എമ്മിന്റെ വിജയം. ഒപ്പം മൂന്ന് പതിറ്റാണ്ട് കാലം നീണ്ടു നിന്ന വികസന മുരടിപ്പിന് അവസാനം വേണമെന്ന് ജനം തീരുമാനിച്ചു. കേരളത്തിലെ 99 മണ്ഡലത്തിലും സംഭവിച്ചത് തന്നെയാണ് അരുവിക്കരയിലും സംഭവിച്ചത്. എല്‍.ഡി.എഫ് പറഞ്ഞതും പ്രവര്‍ത്തിച്ചതും ജനം സ്വീകരിച്ചുവെന്നും അദ്ദേഹം പറഞ്ഞു.

രാഷ്ട്രീയത്തിന്റെ പേരില്‍ കിഫ്ബിയുടെ പദ്ധതികള്‍ മണ്ഡലത്തില്‍ നടപ്പിലാക്കാന്‍ ശബരിനാഥ് മടിച്ചു. ഇത് മണ്ഡലത്തിലെ വികസനത്തിന് തടസമായി. അരുവിക്കരുടെ സമഗ്രവികസനത്തിന് ടൂറിസം മേഖലയിലും പരമ്പരാഗത മേഖലയിലും പുതിയ വികസന പദ്ധതികള്‍ നടപ്പിലാക്കുമെന്ന് ജി സ്റ്റീഫന്‍ മലയാളി വാര്‍ത്തോയോട് പറഞ്ഞു.