കവര്‍ച്ചയും കളളക്കടത്തും തടയല്‍ സംസ്ഥാനത്ത് ആവശ്യാനുസരണം പോലീസില്ലെന്ന പരാതി നിലവിലുള്ളപ്പോള്‍ സംസ്ഥാനത്തെ എല്ലാ ഐഎഎസ് ഉദ്യോഗസ്ഥര്‍ക്കും രണ്ട് പോലീസുകാരെ സുരക്ഷക്ക് നല്‍കാനുള്ള ഫയല്‍ സര്‍ക്കാരില്‍ ജീവന്‍ വയ്ക്കുന്നു. ആഭ്യന്തരമന്ത്രിയുടെ പ്രൈവറ്റ് സെക്രട്ടറിയും യുവ ഐഎഎസുകാരനായതിനാല്‍ സംഗതി നിഷ്പ്രയാസം സാധിക്കുമെന്നാണ് ഐഎഎസ് അസോസിയേഷന്റെ കണക്കുകൂട്ടല്‍. ശുചിത്വമിഷന്‍ ഡയറക്ടര്‍ ഡോ. വാസുകിയെ സിപിഎം ഉപരോധിച്ചതോടെയാണ് ഐഎഎസുകാരുടെ സുരക്ഷക്ക് പോലീസുകാര്‍ വേണമെന്ന വാദം ശക്തമായത്.

സംസ്ഥാനത്ത് പോലീസ് സംരക്ഷണം നല്‍കി വരുന്നത് മന്ത്രിമാര്‍ക്ക് മാത്രമല്ല. ഹൈക്കോടതി ജഡ്ജിമാര്‍ക്കും അതേപദവി വഹിക്കുന്ന കമ്മീഷന്‍ ചെയര്‍മാന്‍മാര്‍ക്കും പോലീസ് സംരക്ഷണം നല്‍കുന്നുണ്ട്. ഇതിനു പുറമെ സുരക്ഷാ ഭീഷണി നേരിടുന്ന എംഎല്‍എ മാര്‍ക്കും പൊതു പ്രവര്‍ത്തകര്‍ക്കും പോലീസ് സംരക്ഷണം നല്‍കുന്നുണ്ട്. ഐഎഎസുകാര്‍ പണ്ടു മുതലെ പോലീസ് സംരക്ഷണം ആവശ്യപ്പെടുന്നത്. എന്നാല്‍ ചീഫ് സെക്രട്ടറിമാര്‍ക്കൊഴികെ മറ്റുളളവര്‍ക്ക് സംരക്ഷണം നല്‍കുന്നില്ല. കളക്ടര്‍മാര്‍ക്കും പോലീസുകാരെ നല്‍കുന്നുണ്ട്.
പേഴ്‌സണല്‍ സെക്യൂരിറ്റി ഓഫീസര്‍മാര്‍ വേണ്ടവര്‍ എഴുതി നല്‍കണമെന്ന് സര്‍ക്കാര്‍ വര്‍ഷങ്ങള്‍ക്കു മുമ്പേ ഐഎഎസുകാരോട് ആവശ്യപ്പെട്ടിരുന്നു. എന്നാല്‍ എഴുതി നല്‍കിയവര്‍ക്ക് ഒരു മറുപടി നല്‍കാന്‍ പോലും സര്‍ക്കാര്‍ തയ്യാറായില്ല. അതേസമയം വിരമിച്ച ഐപിഎസ് ഉദ്യോഗസ്ഥര്‍ക്ക് വരെ പോലീസ് സംരക്ഷണം നല്‍കുന്നുണ്ടെന്നാണ് ഐഎഎസുകാര്‍ ആരോപിക്കുന്നത്. ഇതില്‍ സ്വകാര്യ സ്ഥാപനങ്ങളില്‍ ജോലി ചെയ്യുന്ന മുന്‍ ഐപിഎസുമാരുമുണ്ടെന്നാണ് ആക്ഷേപം.
ആഭ്യന്തരമന്ത്രിയുടെ സെക്രട്ടറിയാണ് ഫയലിന് ചരടു വലിക്കുന്നത്. ഐഎഎസുകാരെ പ്രീണിപ്പിച്ച് ഒപ്പം നിര്‍ത്താന്‍ ആഗ്രഹിക്കുന്ന രമേശ് ചെന്നിത്തല ശ്രമത്തെ സഹായിക്കുമെന്നാണ് ഐഎഎസുകാര്‍ പ്രതീക്ഷിക്കുന്നത്. പ്രത്യേക ജോലിയൊന്നുമില്ലെങ്കിലും രണ്ടു പോലീസുകാരുമായി ചെന്നിറങ്ങുമ്പോള്‍ ഗമ ഒന്നു വേറെ തന്നെയാണെന്നാണ് ഐഎഎസ് പ്രഭുക്കന്മാര്‍ പറയുന്നത്.
വിഷയം മുഖ്യമന്ത്രിയുടെ ശ്രദ്ധയില്‍ കൊണ്ടു വരാനും ഐഎഎസുകാര്‍ തീരുമാനിച്ചിട്ടുണ്ട്. സര്‍ക്കാരാകട്ടെ ആവശ്യത്തിന് പോലീസുകാരില്ലെന്ന പരിദേവനം ആവര്‍ത്തിക്കും. പോലീസ് സംരക്ഷണത്തിനു പകരം സ്വകാര്യ സെക്യൂരിറ്റി ഏജന്‍സിയുടെ സേവനം ഇപ്പോള്‍ സംരക്ഷണം നല്‍കിവരുന്നവര്‍ക്ക് നല്‍കാനാണ് സര്‍ക്കാര്‍ ആലോചിക്കുന്നത്. സംരക്ഷണം ആജീവാനന്തം നല്‍കാനുള്ള സംവിധാനം സര്‍ക്കാരിനില്ലെന്നാണ് പരാതി. ഏതായാലും ഐഎഎസുകാര്‍ക്ക് സംരക്ഷണം നല്‍കുന്ന കാര്യത്തില്‍ അനുകൂല തീരുമാനം ഉണ്ടാവാനാണ് സാധ്യത. യുവ ഐപിഎസുകാര്‍ക്കു വരെ ഇപ്പോഴും ഗണ്‍മാന്‍ സൗകര്യം നല്‍കി വരുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha