പ്രമേഹ രോഗികൾക്ക് ആശ്വസിക്കാവുന്ന വാർത്തയാണ് പുറത്തുവന്നിരിക്കുന്നത്. പ്രമേഹ രോഗികളില്‍ പഞ്ചസാരയുടെ അളവ് കുറയ്ക്കാന്‍ സഹായിക്കുന്ന ആയുര്‍വേദ മരുന്ന് കണ്ടെത്തിയിരിക്കുകയാണ് നമ്മുടെ ഇന്ത്യന്‍ ഗവേഷകർ. കോവിഡ് വാക്‌സിന് പിന്നാലെ ഇന്‍ഡ്യന്‍ ഗവേഷകരുടെ ഈ കണ്ടുപിടുത്തത്തിൽ ലോകമെമ്പാടും അവരെ പ്രശംസകൾ കൊണ്ടു മൂടുകയാണ്.

ആയുര്‍വേദ മരുന്നായ ബിജിആര്‍-34, വെറും പന്ത്രണ്ട് ആഴ്ചയ്ക്കുള്ളില്‍ പ്രമേഹ രോഗികളില്‍ പഞ്ചസാരയുടെ അളവ് കുറയ്ക്കാന്‍ സഹായിക്കുമെന്നാണ് ഗവേഷകര്‍ പഠനത്തില്‍ കണ്ടെത്തിയത്. ഈ മരുന്ന് പ്രമേഹത്തെ നിയന്ത്രിക്കുന്നതിനു പുറമേ, ബീറ്റാ കോശങ്ങളെ ശക്തിപ്പെടുത്തുന്നുവെന്നും കോശങ്ങളുടെ പ്രവര്‍ത്തനം വര്‍ധിപ്പിക്കുന്നതിലൂടെ, പ്രമേഹം അതിവേഗം കുറയുന്നുവെന്നും പഠനത്തില്‍ കണ്ടെത്തുന്നു.

പഞ്ചാബിലെ ചിത്‌കര യൂനിവേഴ്‌സിറ്റിയിലെ ഗവേഷകര്‍ അടുത്തിടെ 100 പ്രമേഹ രോഗികളിലാണ് പഠനം നടത്തിയത്. പഠനത്തെ കുറിച്ച്‌ സെര്‍ബിയന്‍ ജേണല്‍ ഓഫ് എക്സ്പിരിമെന്റല്‍ ആന്‍ഡ് ക്ലിനികല്‍ റിസര്‍ച്ചിന്റെ ഏറ്റവും പുതിയ പതിപ്പില്‍ ബിജിആര്‍-34 ന്റെ മേന്മകള്‍ വിശദീകരിക്കുന്നുണ്ട്. ഗവേഷകര്‍ 100 പ്രമേഹ രോഗികളെ രണ്ട് ഗ്രൂപുകളായി തിരിച്ചാണ് പഠനം നടത്തിയത്.

ഒരു ഗ്രൂപിന് അലോപതി മരുന്നായ സിറ്റാഗ്ലിപ്റ്റിനും മറ്റൊരു ഗ്രൂപിന് ആയുര്‍വേദ മരുന്നായ ബിജിആര്‍-34 ഉം നല്‍കി. ഇതിനുശേഷം, നാല്, എട്ട്, 12 ആഴ്ചകള്‍ക്ക് ശേഷം രോഗികളില്‍ വന്ന മാറ്റങ്ങള്‍ വിശകലനം ചെയ്തപ്പോള്‍ ബിജിആര്‍-34 മരുന്ന് നാലാഴ്ച കൊണ്ട് പ്രമേഹത്തെ നിയന്ത്രിക്കാൻ സാധിക്കുന്നതായി കണ്ടെത്തി.

പഠനത്തില്‍, ഗ്ലൈക്കേറ്റഡ് ഹീമോഗ്ലോബിന്റെ അടിസ്ഥാന മൂല്യം 8.499 ശതമാനമാണെന്ന് ഗവേഷകര്‍ കണ്ടെത്തി, എന്നാല്‍ BGR-34 എടുക്കുന്ന രോഗികളില്‍ നാലാഴ്ചയ്ക്ക് ശേഷം ഈ മൂല്യം 8.061 ശതമാനമായി രേഖപ്പെടുത്തി.

ഇതിനുശേഷം, എട്ടാമത്തെയും 12-ാമത്തെയും ആഴ്ചയില്‍ രോഗികളുടെ അവസ്ഥ കണ്ടപ്പോള്‍, അതേ മൂല്യങ്ങള്‍ യഥാക്രമം 6.56 ഉം 6.27 ഉം ആണെന്ന് കണ്ടെത്തി. അതുപോലെ, ക്രമരഹിതമായ പഞ്ചസാര പരിശോധനയില്‍, രോഗികളുടെ ശരാശരി പഞ്ചസാര 250 ല്‍ നിന്ന് 114 mg / dl ആയി കുറഞ്ഞു. അതേസമയം, ഒഴിഞ്ഞ വയറിലെ പഞ്ചസാര 12 ആഴ്ചയില്‍ 176 ല്‍ നിന്ന് 74 ആയും ഭക്ഷണത്തിന് ശേഷം 216 ല്‍ നിന്ന് 87 mg/dL ആയും കുറയുകയും ചെയ്തു.

നാഷണല്‍ ബൊടാനിക്കല്‍ റിസര്‍ച് ഇന്‍സ്റ്റിറ്റ്യൂട് , സെന്‍ട്രല്‍ ഇന്‍സ്റ്റിറ്റ്യൂട് ഓഫ് മെഡിസിനല്‍ ആന്‍ഡ് അരോമാറ്റിക് പ്ലാന്റ്സ് എന്നിവിടങ്ങളിലെ സിഎസ്‌.ഐ.ആര്‍ ലാബുകളില്‍ നിന്നുള്ള ഗവേഷകര്‍ വികസിപ്പിച്ചെടുത്ത ബിജിആര്‍-34 എ.ഐ.എം.ഐ.എല്‍ ഫാര്‍മസ്യൂടികല്‍സ് നിര്‍മ്മിക്കുകയും വിപണനം ചെയ്യുകയും ചെയ്യുന്നു.

ഇതുവരെ നിരവധി രാജ്യങ്ങളില്‍ നിന്ന് അന്താരാഷ്ട്ര അംഗീകാരം നേടിയിട്ടുണ്ട്. സ്റ്റാന്‍ഡേര്‍ഡൈസേഷന്‍, വെരിഫികേഷന്‍, സേഫ്റ്റി എന്നിവയ്ക്കുള്ള പരിശോധനയ്ക്ക് ശേഷം ഇത് രോഗികള്‍ക്ക് ലഭ്യമാക്കിയതായി കഴിഞ്ഞ വര്‍ഷം കേന്ദ്ര ആയുഷ് മന്ത്രി സര്‍ബാനന്ദ സോനോവാളും പറഞ്ഞിരുന്നു.

ഗവേഷകരുടെ അഭിപ്രായത്തില്‍, കോവിഡ് വൈറസിന്റെ ഉയര്‍ന്ന അപകടസാധ്യത പ്രമേഹ രോഗികളില്‍ കാണപ്പെടുന്നു. അത്തരമൊരു സാഹചര്യത്തില്‍, തുടര്‍ച്ചയായ നിരീക്ഷണത്തിനും ചികിത്സയ്ക്കുമൊപ്പം ഈ രോഗികളോട് കോവിഡില്‍ നിന്ന് ജാഗ്രത പുലര്‍ത്തണമെന്നും അവര്‍ പറയുന്നു. അടുത്തിടെ കൊവിഡ് വാക്സിനേഷന്‍ നടത്തിയതിന് ശേഷവും, അത്തരം രോഗികളില്‍ അണുബാധ കുറഞ്ഞത് മുതല്‍ ഗുരുതരമായ അവസ്ഥ വരെ കാണപ്പെട്ടിട്ടുണ്ട്.