അസഹ്യമായ ചെവി ചൊറിച്ചില്‍ ഉള്ളവരുണ്ട്. ചെവി ചൊറിയുമ്പോള്‍ കൈയില്‍ കിട്ടുന്ന വസ്തു അത് ബഡ്‌സ് ആകട്ടെ, സേഫ്റ്റി പിന്നോ ഹെയര്‍പിന്നോ പേനയോ ആകട്ടെ ചെവിയിലിട്ട് തിരിക്കലും ചെവിതോണ്ടി എടുത്ത് ചൊറിയലുമെല്ലാം എല്ലാവരും പരീക്ഷിച്ച് മടുത്തിരിക്കും. ഇതൊന്നും ചെയ്യാന്‍ പാടില്ലെന്ന് അറിയുന്നവരും ചെവി ചൊറിയുന്നതിന്റെ അസ്വസ്ഥത കൂടുമ്പോള്‍ ഇതെല്ലാം പരീക്ഷിക്കുകയും അതിന്റെ സുഖം അനുഭവിക്കുകയും ചെയ്യും.

പലപ്പോഴും ചെവിക്കുള്ളില്‍ മുറിവുണ്ടാകുന്നതിനും അണുബാധക്കും ഇത് ഇടവരുത്തും. മുതിര്‍ന്നവരെ കണ്ട് കുട്ടികള്‍ അനുകരിക്കുന്നതും അപകടകരമാണ്. ചെവിക്കുള്ളില്‍ ചെറിയ രോമങ്ങളുണ്ട്. ചിലരിലെ രോമങ്ങള്‍ സെന്‍സിറ്റിവിറ്റി കൂടിയതായിരിക്കും. അവ ചെറിയ പൊടി പടലങ്ങള്‍ പറ്റുമ്പോഴേക്കും അസ്വസ്ഥമാകും. ഇതാണ് ഇടക്കിടെ ചൊറിച്ചില്‍ അനുഭവപ്പെടുന്നതിന്റെ പ്രധാനകാരണം. വരണ്ട ത്വക്ക് ഉള്ളവര്‍ക്കും ചെവി ചൊറിച്ചില്‍ ഉണ്ടാകാന്‍ സാധ്യതയുണ്ട്.

ചെവി ചൊറിച്ചില്‍ അവസാനിപ്പിക്കാന്‍ ചില വീട്ടുവൈദ്യങ്ങള്‍ പരീക്ഷിക്കാവുന്നതാണ്.

കറ്റാര്‍വാഴക്കുള്ളിലെ ജെല്‍ എടുക്കുക. തല ചെരിച്ചു പിടിച്ച് മൂന്ന് നാലു തുള്ളി ജെല്‍ ചെവിക്കുള്ളില്‍ ഇറ്റിക്കുക. അല്‍പ്പ സമയം അത് ചെവിക്കുള്ളില്‍ തങ്ങാന്‍ അനുവദിക്കുക. ആന്തരിക കര്‍ണത്തിലെത്തുന്ന കറ്റാര്‍ വാഴ ജെല്‍ അവിടത്തെ പിഎച്ച് ലെവല്‍ സാധാരണ നിലയിലാക്കാന്‍ സഹായിക്കും. കൂടാതെ ചെവിയിലെ വരണ്ട ത്വക്കിനെ എണ്ണമയമുള്ളതാക്കുകയും ചൊറിച്ചിലും അസ്വസ്ഥതകളും മാറ്റുകയും ചെയ്യും.

അണുനാശക സ്വഭാവമുള്ളതാണ് ഇഞ്ചി. അതുകൊണ്ട് തന്നെ ഇത് ചെവിവേദനയും ചൊറിച്ചിലും മാറ്റും. ഇഞ്ചിനീര് നേരിട്ട് ചെവിയിലേക്ക് ഒഴിക്കരുത്. ബാഹ്യകര്‍ണ്ണത്തിലേ ഒഴിക്കാവൂ.

ചെവി ചൊറിച്ചിലിന് ശമനം നല്‍കുന്ന പല ഓയിലുകളും ഉണ്ട്. വെളിച്ചെണ്ണ, വെജിറ്റബിള്‍ ഓയില്‍, ഒലീവ് ഓയില്‍, ടീ ട്രീ ഓയില്‍ എന്നിവ ഉദാഹരണങ്ങളാണ്. ഒരു സ്പൂണ്‍ ഓയില്‍ എടുത്ത് അല്‍പ്പം ചൂടാക്കുക. സഹിക്കാവുന്ന ചൂടേ ആകാവൂ. ഒരു ഡ്രോപ്പറില്‍ ചൂടാക്കിയ ഓയില്‍ എടുത്ത് തല ചെരിച്ചു പിടിച്ച് ചെവിയില്‍ ഇറ്റിക്കാം. രണ്ടു മിനുട്ടിന് ശേഷം തല നേരെയാക്കി ഓയില്‍ കളയാം. കൂടുതല്‍ ഉണ്ടെങ്കില്‍ തുടച്ചു കളയാവുന്നതാണ്.

വെളുത്തുള്ളി ചതച്ച്, ചൂടാക്കിയ എണ്ണയിലോ അല്ലെങ്കില്‍ എള്ളെണ്ണയിലോ അല്‍പ്പ നേരം കുതിര്‍ത്ത് വെക്കുക. എണ്ണയില്‍ നിന്ന് വെളുത്തുള്ളി അരിച്ചെടുക്കുക. ശേഷം എണ്ണ കര്‍ണ്ണ നാളത്തില്‍ ഒഴിക്കാം. ഇത് ചെവി ചൊറിച്ചിലിന് വളരെ നല്ല പരിഹാര മാര്‍ഗമാണ്.