സംസാരിക്കുമ്പോള് ഗോഷ്ഠി കാണിക്കുന്നതു പോലെ 'വെട്ടല്' ഉണ്ടാക്കുന്ന ടിക്സ് ഡിസോര്ഡര്!
ബാല്യം മുതല് തലയ്ക്കും കഴുത്തിനും ഒരു ചെറിയ വെട്ടല്. മുന്നില് നില്ക്കുന്ന വ്യക്തിയോട് 'എന്ത്' എന്ന് ആംഗ്യഭാഷയില് ചോദിക്കുമ്പോള് ഉള്ളതു മാതിരി ഒരു ചെറിയ വെട്ടല്. അത് തലയ്ക്കും കഴുത്തിനുമുണ്ടാകാം. ചിലപ്പോള് ഇടതു കഴുത്തും ഇടതു നെഞ്ചിലുമാകും ഈ ചെറിയ വെട്ടല് ഉണ്ടാകുന്നത്. ഒരാളോടു നേര്ക്കു നേര് നിന്നു വര്ത്തമാനം പറയുമ്പോഴും ഈ വെട്ടല് ഉണ്ടാകും. ഇത്തരം ലക്ഷണങ്ങളുണ്ടെങ്കില് ഇത് 'ടിക്സ് ഡിസ്ഓര്ഡര്' അഥവാ ടൗററ്റ്സിന്ഡ്രോം എന്ന അവസ്ഥയാണ് എന്നു പറയാം.
ഇതു കുട്ടിക്കാലം മുതലേ ചിലപ്പോള് കാണാറുണ്ട്. ഒരു ഗോഷ്ഠി, കാണിക്കുന്ന മാതിരി വരാമെന്നതിനാല് കാണുന്നവരില് ചിലര് അവരെ കൊഞ്ഞനം കാട്ടുന്നതാണെന്നുവരെ സംശയിച്ചേക്കാം. മനസ്സുവച്ചാല് കുറച്ചു നേരത്തേക്ക് പിടിച്ചു നിര്ത്താമെന്നതിനാല് ഇതിനെ പാര്ക്കിന്സണ് രോഗത്തില് നിന്നും മറ്റും വേര്തിരിക്കാം.
ഇതിനൊന്നും പ്രത്യക്ഷമോ പരോക്ഷമോ ആയ ശാരീരിക കാരണങ്ങള് ഒന്നും തന്നെ കാണാറില്ല. എന്നാലും അപസ്മാരം, തലച്ചോറിനകത്തെ രോഗാണുപ്രസരം, തലച്ചോറിനകത്തെ തടിപ്പു വളര്ച്ചകള് മുതലായ രോഗങ്ങളൊന്നും ഇല്ലെന്ന് ഉറപ്പു വരുത്തണം.
ഉറക്കത്തിന്റെ ആരംഭത്തില് പല കുട്ടികളിലും ചെറുപ്പക്കാരിലും കൈയോ കാലോ ഞെട്ടി തെറിച്ചു പോയേക്കാം. അതിന് 'മയോക്ലോനസ്' എന്നു പറയാം. അതും രോഗമായി കരുതാനില്ല. കുട്ടികളില് കണ്ടു വരുന്നതു പലപ്പോഴും താനേ മാറുന്നുണ്ട്.
ചിലരില് മറ്റു ചില മാനസിക പ്രശ്നങ്ങളും കൂടെ കണ്ടേക്കാം. ഉദാ: വിഷാദരോഗം, ഉറക്കത്തിലോ അല്ലാതെയോ ശബ്ദപരമായ ബഹളം, ശക്തമായി തൊണ്ട ശുദ്ധീകരിക്കുന്ന ശബ്ദം, വലിയ മുക്കലും മൂളലും, വല്ലപ്പോഴും അലര്ച്ച, ചുമ, ഉറക്കത്തില് സംസാരം, അടക്കാനാവാതെ ചീത്തവാക്കുകള് പറയാന് വ്യഗ്രത. ഒരേ വാക്കുകളുടെ ആവര്ത്തനം പ്രത്യേകിച്ച് അപ്പോള് കേട്ടത്, നഖം കടി, അടക്കാനാവാത്ത ചില ചേഷ്ടകള് മുതലായവ.
ചേഷ്ടകള്ക്കായിരിക്കും ചിലപ്പോള് മുന്തൂക്കം കൊടുക്കേണ്ടി വരുന്നത്. ഇതിനു ചെറിയ പാരമ്പര്യ പ്രവണത കാണുന്നുണ്ട്. രോഗലക്ഷണങ്ങള്ക്കൊപ്പം മറ്റു മാനസിക പ്രശ്നങ്ങളും നിലവിലുണ്ടെങ്കില് അതിനായിരിക്കും ചികിത്സ വേണ്ടത്. പലതും ചുറ്റുവട്ടത്തില് പറഞ്ഞ് ഒതുക്കാം. മ്ലേച്ഛസംസാരങ്ങള് രോഗമാണെന്നു മനസ്സിലാക്കി സഹന ശക്തിയില്ക്കൂടി അനുകമ്പയോടെ, പരസ്പര ധാരണയിലൂടെ കുറെയൊക്കെ സംസാരിച്ചു പറഞ്ഞു തീര്ത്തു പരിഹരിക്കാവുന്നതാണ്.
https://www.facebook.com/Malayalivartha
