ചുമ പലപ്പോഴും അധികമാരും കാര്യമാക്കാറില്ല.രാത്രികാല ചുമ, വ്യായാമത്തിന് ശേഷമുള്ള ചുമ, ശ്വാസം മുട്ടലോട് കൂടിയുള്ളവ, ചുമയ്ക്കുമ്പോള്‍ രക്തം തുപ്പല്‍, വരണ്ട ചുമ ഇങ്ങനെ ചുമ പലതരത്തിലുണ്ട്.സത്യം പറഞ്ഞാൽ ചുമ ഒരു രോഗമേ അല്ല, എന്നാൽ ശക്തമായ ഒരു രോഗലക്ഷണമാണ് .

പ്രധാനമായും രണ്ട് രീതിയിലുള്ള ചുമയാണ് ഉണ്ടാവുക. ഇതില്‍ കഫത്തോട് കൂടിയുള്ള ചുമ, രോഗാണുബാധയെ തുടര്‍ന്നാണ് ഉണ്ടാവുക. എന്നാല്‍ വരണ്ട ചുമയ്ക്കാകട്ടെ പല കാരണങ്ങളും ഉണ്ടാകാം. വരണ്ട ചുമയാണ് ഏറെക്കാലം നീണ്ടുനില്‍ക്കാന്‍ സാധ്യതയുള്ളതും രോഗികളെ വലയ്ക്കുന്നതെന്നും ഡോക്ടര്‍മാര്‍ പറയുന്നു. 60-65 ശതമാനം ചുമകളും അപകടരഹിതമായിത്തന്നെ സ്വയമങ്ങ് മാറിപ്പോവാറുമുണ്ട്. എന്നാല്‍, 35-40 ശതമാനം ചുമയെ ഗൗരവമായിത്തന്നെ കാണണം......

സാധാരണഗതിയില്‍ പനി, ജലദോഷം എന്നിവയ്‌ക്ക് ഒപ്പം ചുമ പിടിപെടാറുണ്ട്. എന്നാല്‍ അത്തരം ചുമയൊക്കെ അസുഖം മാറുന്നതിനൊപ്പം ഭേദമാകാറുണ്ട്. രണ്ടാഴ്‌ചയില്‍ അധികമായി ഗുരുതരമായ ചുമ തുടരുന്നുണ്ടെങ്കില്‍ അത് ശ്രദ്ധിക്കണം. ഇതും ബ്രോങ്കൈറ്റിസും ആസ്‌ത്മ, ന്യുമോണിയ എന്നിവയുടെ ലക്ഷണമാണ്. എന്നാല്‍ നിര്‍ത്താതെയുള്ള ചുമ ചിലപ്പോൾ ഹൃദ്രോഗത്തിന്‍റെ ലക്ഷണമായും കാണാറുണ്ട് . ഹൃദയത്തിന്‍റെ പ്രവര്‍ത്തനത്തില്‍ അസ്വാഭാവികതയുള്ളതായിട്ടുണ്ടെങ്കിൽ ചുമയ്‌ക്കൊപ്പം മഞ്ഞ, പിങ്ക് നിറങ്ങളിലുള്ള കഫം വരാനുള്ള സാധ്യത ഉണ്ട് . അത് പോലെ ശ്വാസകോശത്തില്‍ രക്തസ്രാവമുണ്ടാകുന്നതുകൊണ്ടാകാം പിങ്ക് നിറത്തിലുള്ള കഫം വരുന്നത്.

ചുമയോടൊപ്പം പടി കയറുമ്പോഴും നടക്കുമ്പോഴും കിതപ്പും കഷീണവും അനുഭവപ്പെടുന്നുവെങ്കില്‍ അത്‌ നിസാരമായി കാണരുത്‌. ഹൃദ്രോഗത്തിന്‍െറ ലകഷണങ്ങളില്‍ പ്രധാനമാണിത്‌

ചുമ, വിറയലോട് കൂടിയ പനി, മഞ്ഞ നിറത്തിലോ പച്ച നിറത്തിലോ ഉള്ള കഫം, ശ്വാസം മുട്ടല്‍, തുടങ്ങിയ ലക്ഷണങ്ങളൊക്കെ ന്യൂമോണിയ ഉള്ളവരിൽ കാണപ്പെടുന്നതാണ് . അതുകൊണ്ട് ഇത്തരം ചുമയുള്ളവർ കഫത്തിന്റെ കള്‍ച്ചര്‍ പരിശോധന, നെഞ്ചിന്റെ എക്‌സറെ എന്നിവയിലൂടെ രോഗനിർണയം നടത്തേണ്ടതാണ്

അലര്‍ജി, ആസ്മ , വയറ്റില്‍ അസിഡിറ്റി, സൈനസൈറ്റിസ് എന്നിവയൊക്കെ വിട്ടുമാറാത്ത ചുമ ഉണ്ടാകാറുണ്ട് . കാലാവസ്ഥാ വ്യതിയാനങ്ങള്‍ കൊണ്ടും ചുമ വരാം. എങ്കിലും ഡോക്ടറെ കണ്ട് പ്രശ്‌നമില്ലെന്ന് ഉറപ്പുവരുത്തുന്നതാണ് ഉചിതം.

കുഞ്ഞുങ്ങളുടെ ചുമയുടെയും കഫക്കെട്ടിന്റെയും കാരണം മിക്കപ്പോഴും വെെറസ് ബാധയാണ്. ചുമ, പനി, ശ്വാസംമുട്ടൽ തുടങ്ങിയ അസ്വസ്ഥതകളോ കുറച്ചു ദിവസം നീണ്ടു നിൽക്കുന്ന ചുമ, കഫത്തോട് കൂടിയ ചുമ എന്നിവയോ കണ്ടാൽ ഡോക്ടറെ കാണിക്കണം.
കുഞ്ഞ് നന്നായി പാൽ കുടിക്കാതിരിക്കുക, ഇടയ്ക്കിടെ ഉണർന്നു കരയുക എന്നിവ കഫക്കെട്ടിനോടൊപ്പം കണ്ടാൽ ഉടനെ ഡോക്ടറെ കാണുക. ശിശുരോ​ഗ വിദ​ഗ്ധന്റെ നിർദേശപ്രകാരം കുഞ്ഞുങ്ങൾക്ക് മരുന്നുകൾ നൽകുക. തൊണ്ട , മൂക്ക്, ശ്വാസനാളം തുടങ്ങിയവയിലെ അണുബാധ കൊണ്ട് ഉണ്ടാകുന്ന കഫക്കെട്ടിനൊപ്പം മിക്കവാറും പനിയും ഉണ്ടാകും. രോ​ഗാണുക്കളെ പുറന്തള്ളാനുള്ള ശരീരത്തിന്റെ കുറുക്ക് വഴിയാണ് പനി.