കൂര്ക്കംവലി മറ്റു പല രോഗങ്ങളുടെയും ലക്ഷണമാണ്
നല്ല ഉറക്കം ആഗ്രഹിക്കാത്തവരായി ആരും തന്നെയില്ല. ഉറക്കം നമ്മുടെ ആരോഗ്യത്തിന് ഏറ്റവും പ്രധാനവുമാണ്. എന്നാല് കൂര്ക്കം വലിച്ചുളള ഉറക്കം മറ്റുളളവരുടെ ഉറക്കം കിടത്തും എന്നു മാത്രമല്ല സ്വന്തം ഉറക്കം ഇല്ലാതാക്കുകയും ചെയ്യും. കൂര്ക്കം വലി മറ്റു പല രോഗങ്ങളുടേയും ലക്ഷണമാണെന്നാണ് ആരോഗ്യ വിദഗ്ധര് പറയുന്നത്. അതുകൊണ്ട് കൂര്ക്കംവലിക്കാര് ലക്ഷണങ്ങള് നോക്കി എത്രയും വേഗം ചികിത്സ തേടണമെന്നാണ് ആരോഗ്യവിദഗ്ധര് പറയുന്നത്. ഇത്തരക്കാരെ തേടിവരുന്ന അസുഖങ്ങള് ഏതൊക്കെയെന്നു നോക്കാം.
ഒബ്സ്ട്രക്ടീവ് സ്ലീപ് അപ്നിയ : ഈ അസുഖം ഉളളവരിലും കൂര്ക്കംവലി കാണപ്പെടുന്നുണ്ട്. ഇത്തരക്കാര്ക്കു പകലുറക്കം കൂടുതലായിരിക്കും. ഹൃദ്രോഗങ്ങള് പിടിപെടാനുള്ള സാധ്യതയും കൂടുതലായിരിക്കും. ഉറങ്ങുമ്പോള് വായുസഞ്ചാരമാര്ഗം നിരന്തരമായി സങ്കോചിക്കുന്നതാണ് സ്ലീപ് അപ്നിയയ്ക്കു കാരണമാകുന്നത്. ഈ തടസ്സം പൂര്ണമായോ ഭാഗികമായോ ആകാം. ഇടവിടാതെയുള്ള കൂര്ക്കംവലിയില് വായുസഞ്ചാരം വളരെയധികം നിയന്ത്രിക്കപ്പെടുന്നു. വല്ലപ്പോഴും മാത്രമാണ്, അതായത് 15 ശതമാനത്തില് താഴെയാണ് കൂര്ക്കംവലിയെങ്കില് അപകടസാധ്യത കുറവായിരിക്കും. വീട്ടില് കൂര്ക്കംവലിക്കുന്ന സമയം റിക്കോര്ഡ് ചെയ്ത് ശതമാനം കണ്ടെത്താം.
മെറ്റബോളിക് സിന്ഡ്രം : ഈ രോഗത്തിന്റെ ഗുരുതര ആരോഗ്യപ്രശ്നത്തിന്റെ ഫലമായും ഇതു കാണാം. ഉയര്ന്ന രക്തസമ്മര്ദം, ബ്ലഡ് ഷുഗര്, ശരിയായ നിലയിലല്ലാത്ത കൊളസ്ട്രോള് ലെവല്, ഉദരത്തില് കൊഴുപ്പ് അടിഞ്ഞുകൂടുക എന്നിവയാണ് മെറ്റബോളിക് സിന്ഡ്രത്തില് വരുന്നത്. ഇവ പ്രമേഹം, പക്ഷാഘാതം, ഹൃദ്രോഗങ്ങള് എന്നിവയിലേക്കു വഴിതെളിക്കാം.
പ്രമേഹം : കൂര്ക്കംവലിയും പ്രമേഹവും തമ്മില് അഭേദ്യബന്ധമുണ്ടെന്നാണ് ഗവേഷകര് പറയുന്നത്, പ്രത്യേകിച്ച് സ്ത്രീകളില്. കൂടാതെ, നേരത്തേ ആര്ത്തവം നിലച്ച് പോളിസിസ്റ്റിക് ഓവറി സിന്ഡ്രത്തിന്റെ ലക്ഷണമായും ഇതു കാണാറുണ്ട്.
ഹൃദ്രോഗങ്ങള്, ഹൈപ്പര്ടെന്ഷന്, ഡിസ്ലിപിഡീമിയ : ഉയര്ന്ന കൊളസ്ട്രോള് നിയന്ത്രണവിധേയമല്ലാതാകുമ്പോള് അത് ഡിസ്ലിപിഡീമിയയ്ക്കു കാരണമാകുന്നു. ഇതാകട്ടെ അതിരോസ്ക്ലിറോസിസ് (ഹൃദയത്തിലേക്കുള്ള രക്തധമനിക്കുള്ളില് പ്ലേക്ക് അടിഞ്ഞുകൂടുന്ന അവസ്ഥ) സിറോസിസ്, ഹൃദ്രോഗങ്ങള് എന്നിവയിലേക്കു നയിക്കുകയും ചെയ്യും. ഉയര്ന്ന രക്തസമ്മര്ദവും കൂര്ക്കംവലിയും തമ്മിലും ബന്ധമുണ്ട്. കൂര്ക്കംവലിയുടെ തോത് അനുസരിച്ച് ഹൈപ്പര്ടെന്ഷന്റെ വ്യാപ്തിയും വര്ധിക്കുന്നു. കൂര്ക്കംവലി, പ്രായം, ബോഡി മാസ് ഇന്ഡക്സ്, ആല്ക്കഹോള് ഉപയോഗം എന്നിവ ഹൈപ്പര്ടെന്ഷനിലെ അപകടമേഖലകളാണ്.
https://www.facebook.com/Malayalivartha
