സ്ത്രീകള്ക്ക് സെക്സ് ടോയ് സി.ഇ.എസില് പ്രദര്ശിപ്പിക്കാന് അനുവദിച്ചില്ല
അതിനൂതനമായ സാങ്കേതികവിദ്യാ ആശയങ്ങളുടെ പ്രദര്ശനം നടക്കുന്ന കണ്സ്യൂമര് ഇലക്ട്രോണിക്സ് ഷോയില് വിവേചനമെന്ന് പരാതി. ഗൂഗിള്, സാംസങ്, ആപ്പിള് പോലെ മുന്നിര കമ്പനികളെല്ലാം അണിനിരക്കുന്ന ഈ പ്രദര്ശനമേള ഈ വര്ഷം സെക്സ് ടോയികളുടെ പേരില് പുതിയ വിവാദത്തില് പെട്ടിരിക്കുകയാണ്. മേള ലിംഗപരമായ പക്ഷപാതിത്വം കാണിക്കുന്നുണ്ടെന്നാണ് ആരോപണം.
ലാസ് വെഗാസില് നടക്കുന്ന മേളയില് സ്ത്രീകളുടെ ലൈംഗികാസ്വാദനത്തിനായുള്ള ഓസി (Ose) എന്ന റോബോട്ടിക് ഡില്ഡോ ഉപകരണത്തിന് ലഭിച്ച പുരസ്കാരം പിന്വലിക്കുകയും മേളയില് നിന്നും വിലക്കുകയും ചെയ്തതാണ് വിവാദങ്ങള്ക്കിടയാക്കിയത്.
ഒരു കൂട്ടം വനിതകളുടെ നേതൃത്വത്തിലുള്ള സെക്സ്ടോയ് കമ്പനിയായ ലോറ ഡികാര്ലോ എന്ന സ്ഥാപനമാണ് കണ്സ്യൂമര് ഇലക്ട്രോണിക്സ് ഷോയ്ക്കെതിരെ ആരോപണം ഉന്നയിച്ചിരിക്കുന്നത്.
പുരുഷന്മാര്ക്കായുള്ള സെക്സ് ടോയികള്ക്ക് വര്ഷങ്ങളായി മേളയില് തുറന്ന സ്വീകാര്യത നല്കുമ്പോള് സ്ത്രീകള്ക്കായുള്ള ഉപകരണത്തിന് വിലക്കേര്പ്പെടുത്തിയ തീരുമാനം ലിംഗവിവേചനമാണെന്ന് ലാറ ഡികാര്ലോയുടെ സ്ഥാപകയും സിഇഓയുമായ ലോറ ഹാഡ്ഡോക്ക് പറഞ്ഞു. ഇത്രയും വലിയൊരു മേളയില് സ്ത്രീകളുടെ ലൈംഗികത അതിശക്തമായി നിശബ്ദമാക്കപ്പെടുകയാണ് എന്നും അവര് ആരോപിച്ചു.
സ്ത്രീകള്ക്കായുള്ള റോബോട്ടിക് മസാജര് വിലക്കുകയും പുരുഷന്മാരുടെ സെക്സ് റോബോട്ടിന് അനുമതി നല്കുകയും ചെയ്യുന്ന നിങ്ങള്ക്ക് നിഷ്പക്ഷരാണെന്ന് ഭാവിക്കാനാവില്ലെന്നും മേളയുടെ സംഘാടകരായ കണ്സ്യൂമര് ടെക്നോളജി അസോസിയേഷന് (സിടിഎ) നല്കിയ കത്തില് അവര് കുറ്റപ്പെടുത്തി.
റോബോട്ടിക്സ് ആന്റ് ഡ്രോണ് വിഭാഗത്തിലാണ് റോബോട്ടിക്ക് ഡില്ഡോയ്ക്ക് പുരസ്കാര സമിതി പുരസ്കാരം പ്രഖ്യാപിച്ചത്. എന്നാല് ഈ ഉപകരണത്തിന് പ്രസ്തുത വിഭാഗത്തില് ഉള്പ്പെടുത്തി പുരസ്കാരം നല്കാനാവില്ലെന്നാണ് സിടിഎ അധികൃതരുടെ ഔദ്യോഗിക വിശദീകരണം. മേളയില് നിന്നും ഒഴിവാക്കിയതിനും ഇതേ കാരണം തന്നെയാണ് സിടിഎ വക്താവായ സാറാ ബ്രൗണ് ചൂണ്ടിക്കാട്ടിയത്.
https://www.facebook.com/Malayalivartha